Read Maru YOSHU 8 Bible Online

YOSHU 8 - Maru bible

YOSHU 8

¹ASANG wa Yoshu re- gyezo: alhab' re nao we' daga" jhui: mung: Ai: vogaung: khyo do, ye: wa,- dagyaug wa,- sang: dapo: wa, ngo wa- Ai kho:kham re nao re aung: pye' nhao nae". Yao" vobyu- vogaung:- mug:myid wa ni" mae" ngad: li" nae".

²Nao wa Yerikho we' yao" kho:kham re kad' lo: ru we' dakhyo: Ai: vogaung: re we' kho:kham re kad' nae" ngad: ra". Ngadqere: ana" celhang wa aimae" zai we' gug'nyhug' gug'du: jham re naonhaung" yao: yao" qhid' mae" gai: sang: yu: ako". Ai: vogaung: re nhaung thao" shad' khyo" nyag din taung" yezin: nae" qhid' mae" seim" jin" wa,- ga: ta" ra".

³Airumung: Yoshu wa yao" gyezo: alhab' we' Ai: vogaung: re gye yezin: nae" seim" jin" ra". Yao: wa yao" gai: thao" ra" gyetab mae" gyezo: sam tug re khyin: yu mung: vogaung: thoete' mae yevho' na ge,- ngadqere: aimae" dataung" va: ge,- gye zin: nae" jin" jin" kad' ci ge,.

⁵Ngo we' nga" byu qe wa vogaung: khyo te' ye: nae". Ai: vogaung: mae" mo, thug' li" mung: gye li" zin: gelao"- sao qhid' lhang ngonhaung" kad' lo: ru we' dakhyo:- ngonhaung" wa tug' lhang yang: tao" phao nae".

⁶Ngonhaung" wa yao: bam re vogaung: mae" jhui" va" lo" sho' yao: bam cao" khe' li" genae". Yao: bam wa qhid' phyao: ngonhaung" kad' lo: ru we' dakhyo:- ngonhaung" wa yao: bam mae" tao" phao: lo" na: ru ngad: ga: myid: jho: li" genae".

⁷Ailao" naonhaung" wa vho' jo; ra" jo, qo mae" thug' li" mung: vogaung: re sang: yu: pye' li" genae". Naonhaung" nho: Mao"So ASANG wa Ai: vogaung: naonhaung" re byid' li" nae".

⁸Naonhaung" Ai: vogaung: re sang: yu: pye' gethao ASANG amyin" byid' to" ru we' dakhyo:- Ai: vogaung: re myi: ngha" pye' ge, ce: jham wa naonhaung" cao" nae" amyin" jham ngad: ga: ce: amyin" dao: jham we' daga" myi" re nhao: ke' ra".

⁹Aimung: Yoshu wa yao: bam re nhao: ke' ra". Yao: bam wa yao: bam: vho' na jo, qo khyo ye" lo" mung: Ai: vogaung: we' Bethela agyo: Ai: vogaung: ba vao shad' mae yelao" na: ako". Yoshu wa myi" re jamu zaung mae thang: na: ra".

¹⁰Yoshu wa ne, seim no' to" mung:- gyezo: jham re khai: zhang" yu: ra". Aimung: yao: we' Israel au: jhaung qe wa ai bam re Ai: vogaung: khyo jhui" ye" ako".

¹¹Yao: we' daga" na ko" ra" gyezo: qe wa vogaung: kham: mo" shad' khyo ye: mung: mug: au: shad' mae jamu yekad' na: ra". Ai we' yao: bam agyo: mae lao:khaung: dalam: kyo: ra".

¹²Yao: wa byu ngo" taung ko re jhui" yu mung: Ai we' Bethela agyo: vogaung" nho: ba vao shad' vho' na: jo, qo mae nha: to" ra".

¹³Gyezo: qe wa vogaung: mug: am: shad' jamu mo" mae" mo, we' daga" gyepoe qhid' mae" seim" ako". Yoshu wa lao:khaung: mae myi" re thang: na: ra".

¹⁴Ai: vogaung: mae" kho:kham pho" Yoshu nho: byu qere myao lao" yao: wa phyad phyad mau" kad' ra". Yao: we' yao" byu qe wa nhaung thao" shad' khyo" gye zin: nae" seim" to" rure maba mung: qhid' phyao: we' dakhyo: ai: jo, qo mae Israel byu qere gye zin: nae" qhid' mae" Yodan lao:khaung: khyo ye" lo" ra".

¹⁵Yoshu we' yao" byu qe wa nhaung zad: zad: geim kad' ako". Myid pyad' yo khyo tao" phao: ye" ako".

¹⁶Vogaung: mae" yauggai alhab' mo; wa aibam jhao" cao" khe' nae" daga" khai: zhang" yu: ru qhug' ako". Yao: bam Yoshu re cao" khe' ye" lo" zo" re" yao: bam wa vogaung: mae" va: sho' khyo joe" ye" lo" ako".

¹⁷Ai: vogaung: mae" yauggai yaug khao: ngo" wa Israel byu qejhao" cao" khe' ako". Vogaung: wa gug: gam nae" dayaug re: mana lo: acin to: co' ako".

¹⁸Ai: thao ASANG wa Yoshu re- ni" lhae tad' re Ai: vogaung: khyo qang wa, ngo wa aire nao re byid' na: ra"- ga: ta" ra". Yoshu wa yao: re ta" ru we' dakhyo: kad' ra".

¹⁹Yao" lo, tau: ke' we' vho' na: ra" mo, phyad za: to" li" geyang: vogaung: khug khyo tao" vao ye: mung: aire yasang: yu: pye' ako". Yao: bam wa ailao" jao" vogaung: re myi" ngha" ke' ako".

²⁰Ai: vogaung: mae" yauggai qe tug' qu" ke' ko" re myikhug' wa mug: khyo do, lo" rure myao: ako". Yao: bam phao: loe, nae" khyo majo, lo:ngad: ako". Pe"mung:ga"re mug: pyad' khyo tao" phao: lo" ko" ra" Israel byu qe wa ana" wa dam: tug' lhang: lo mung: yao: bam re khe' zin" ako".

²¹Yoshu we' yao" byu qe wa gaje qe Ai: vogaung: re sang: yu: pye' gemung: aire ngha" pye' vako" rure myao gelao"- yao: bam dam: tug' lhang: lo mung: Ai vobyu qere se' pye' ako".

²²Vogaung: mae na ko" ra" Israel byu qe wa gyo" lo mung: gye poe mae loqham: ako". Airumung: Ai vobyu qe wa Israel byu qeyang bin sho' vang" to" rure ba mung: yao: bam alhab' se' pye' qhug' ako". Ai kho:kham mae" je yang: khag' re: maphao: loe,- khag' re: madang ngad: ako".

²³Ai: vogaung: kho:kham kam" wa taung" yu qhug' mung: Yoshu jhao" jhui" lo" ru qhug' ra".

²⁴Israel byu qe wa yao: bam re cao" khe' ko" ra" jo, qo mug: pyad' mae gyevo yaug khao: ngo" re se' pye' ako". Ai: thao yao: bam wa Ai: vogaung: khyo dam: lo mung: aimae yaug khao: ngo" re se' pye' ako".

²⁵Yoshu wa yao" lhae tad' re Ai: vogaung: mae" yaug khao: ngo" re mase' tam" pye' pye' wa Ai: vogaung: re qang: to: mung: myid khyo makhyo" ke' ngad: ra". Yauggai myiqe: byu datug: shid' taung ngad ko" ra" vobyu alhab' re se' pye' ako".

²⁷Israel byu qe wa ASANG Yoshu re ta" to" ru we' dakhyo: vogaung: re sang: yu rumae gug'nyhug' jham we' zai jham re yao: bam: qhid' mae" sang: yu: ako".

²⁸Yoshu wa aire ngha" pye' mung: phyo' sin" to: co' ra". Ai: vogaung wa ana" ba joe" sho' ai we' dakhyo: ngad: jo; ra".

²⁹Yao: wa Ai: vogaung: kho:kham pho" re sag' gae mae taui" lhao: mung: yao" maogaung re myi" thao joe" sho' to: co' ra". Ba gyo" yo, re Yoshu wa ai: maogaung re yu: pye' nae" amyin" byid' ra". Aire vomo" kham: dung: khyo khyo" to" ako". Yao: bam wa aire laugbaui jham myo: sho' yang bam" nghoe' to" ako". Aiwa ana" ba joe" sho' aimae jo; jo; ra".

³⁰Ai: thao Yoshu wa Israel byu qe Mao"So ASANG: qhid' mae" phan dalam: re Eba bam dao mae kad' ra".

³¹Yao: wa- jo, to' zai: yang maphyid' ra" laugbaui jham: yang phan kad' nae" ngad: ra" ga: Moshe nho: tarha" mae ta" to" ru we' dakhyo: ASANG: daui daui yaug ngad: ra" Moshe yang Israel byu qere byid' to" ra" pyang dao: re cao" yang: aire kad' ra". Ai: dao mae yao: bam wa ASANG re xeim: phad' ngaui" byid' ako". Yao: bam wa yao: bam: zam" khug: ra" ngaui" xeim: rere: qhaug' byid' ako".

³²Yoshu wa Israel byu qe: myo, nho aimae yao:- Moshe tung" to" ra" tarha" re laugbaui dao mae dam: kai" tung" ra".

³³Israel byu qe yao: bam: au: jhaung qe- zug: qe- tarha" agyi qe we' yao: bam: phaung mae" taung bug byu qe wa- ASANG: Dao: Thang" Ban" re vo; ra" Levi khinjaung agyi qere myo, nho qang yang:- ASANG: Dao: Thang" Ban" shid' shad' mae ye; jo; ako". Amyu" byu qe agaung: daqi" gu: wa Gerizim bam khyo yao: bam: nhaung thao" qhang yang:- gatau agaung: daqi" gu: wa Eba bam khyo yao: bam nhaung thao" qang yang ye; jo; ako". Shaman" jeju re khae: yu nae" ayo, joe" lo lao" ceru re yao: bam kad' genae" qhid' mae" ASANG: daui daui yaug Moshe amyin" byid' to" ra".

³⁴Ailao"- Yoshu wa- Tarha" paug' mae tung" to" ru we' dakhyo: shaman" jeju we' nhang: kheim: bobo mung: ai tarha" alhab' re thoe qi: qi: za: nghe' ra".

³⁵Yoshu wa myiqe:- zoshao qe we' yao: bam: phaung mae na: jo, ko" ra" taung bug byu qe bobo yang: mo,byu phung: geim" re Moshe nho: amyin" dao: kheim: khao: ngo" re nghe' kyo" ra".