Read Maru YOSHU 9 Bible Online

YOSHU 9 - Maru bible

YOSHU 9

¹Israel byu qenho: aung doe, ra" khyo lahau: wa Yodan gyaung: ba vao shad' mae" bam mug:- jao: dae- mug: am: shad' khyo Lebanon joe" sho' Mug:gaung: panglai: qid yae cao" yang: jao: dae alhab' mae na ko" ra" Hiti- Amori- Khanan- Perizi- Hivi- Yebusi kho:kham qe alhab' mo; khyo hau" nhao" lo" ra".

²Yao: bam alhab' mo, daga" zang" ham: li" mung: Yoshu we' Israel byu qere gye zin: nae" gyephung: jho" qhan" ako".

³Ngadqere: Hivi byu qe ngad ko" ra" Gibeon byu qe wa Yerikho we' Ai: vogaung re Yoshu kad' lai: lo: ra" khyo re the' gyo" ako".

⁴Amung: yao: bam wa yao: re mhug' pyag' nae" myid: phyid' ako". Yao: bam wa zo:ve jham re thaung jad mae ke'- pho: zhang: to" ra" sabyi qang: shoqid thaung jham re loze dao mae seim" zaui: ako".

⁵Yao: bam wa mai bau: jad re gaug: ve,- pho: to" ra" khyid zhaung" jad jham re gaug: zhaung" ci: ako". Yao: bam vin ko" ra" mug jham wa kyaug' ru we' bao" jaung" to" byaug: ru ngad: ra".

⁶Ai: thao yao: bam wa Gigala jo, qo mae jamu khyo ye: mung: Yoshu we' Israel byu qere- ngonhaung" wa gyai va" ra" mung" mae" joe" li" mo, ngad:- ngonhaung" wa naonhaung" we' ngonhaung" myid vang" thao: ce' kad' nae" rure o: ra" ga: ta" ako".

⁷Ngadqere: Israel byu qere wa- ngonhaung" we' naonhaung" pe"mung: myid vang" thao: ce' kad' ang: i? Naonhaung" wa ajhao" mae na mo, gai: ngad: ra"- ga: ta" ako".

⁸Yao: bam wa Yoshu re ngonhaung" wa ni" daui daui mo, angad: ga: ta" ako". Yoshu wa yao: bam re- naonhaung" khag' ngad ko" i? Khai: mae" joe" li" ko" i? ga: myid' ra".

⁹Ailao" yao: bam wa yao: re- lau: de, pho" we" ngonhaung" wa naonhaung" Mao"So ASANG: khyo re the' gyo: yang: gyai va" ra" mung" mae" joe" li" ru ngad:. Ngonhaung" wa Egutu mung" mae yao: kad' lo: ra" khyo ja: khao: ngo" re the' gyo: va".

¹⁰Yodan gyaung: ba thug' shad' mae Amori kho:kham ngad ko" ra" Heshbon kho:kham Sihon we' Ashterod mae na: ra" Bashan kho:kham Oga shid' yaug re yao: pe" kad' lai: lo: ra" khyo rere: the' gyo: va".

¹¹Ngonhaung" au: jhaung qe we' ngonhaung" mung" mae na ko" ra" mung" byu qe alhab' mo, wa- gyaung: khyo qhid' mae" seim" nyhang" mung: naonhaung" re yeqhug' nae" qhid' mae" ngonhaung" re ta" ako". Yao: bam wa ngonhaung" wa naonhaung" daui daui mo, ngad va"- ngonhaung" we' myid vang" thao: ce' kad' nae" naonhaung" re yemho' ge,.

¹²Ngonhaung" zokho re qu" ge, naonhaung" we' jho" qhug' nae" yham mae" to" ra" au: aijham wa lam lam za: ngad: ashi". Ngadqere: qu" ge, ana" wa kyaung mung: bao" jaung" to" byaug: ava".

¹³Ngonhaung" ce: sabyi qang: shoqid thaung sabyi qang: ke' au:- cejham wa asag' ngad: ra". Ngadqere: qu" ge, cejham jad: byaug: ava". Ngonhaung" mai bau: we' khyid zhaung: jham wa gyaung: khyo saung" va: yang: jad: byaug: avako"- ga: ta" kyo" ako".

¹⁴Israel byu qe wa yao: bam: lo, mae" zo:ve damyo" re khae: yu: ako". Ngadqere: aikhyo re ASANG we' majho" qham: ngad: ako".

¹⁵Yoshu wa Gibeon byu qe we' ba nam khyo" myid vang" thao: ce' kad' mung: yao: bam re na nae" akhang" byid' ra". Israel byu phung: geim" nho: au: jhaung qe wa ai: dao: thang" mugsug' re phug' cao" nae" gang" tang: ra" dao:so: byid' ako".

¹⁶Ai: myid vang" thao: ce' bin: kad' thao sam ba re ai: byu qe wa gaigai: yao: ai: nhae mae za: na mo, ngad: rure Israel byu qe ba: yu: ako".

¹⁷Israel byu qe wa to" lo" thao sam ba re ai: byu qe na ko" ra" vogaung: jham khyo joe" ye" ako". Ai: vogaung: jham wa Gibeon- Khephira- Berod- Kiriad Yearim ngad: ako".

¹⁸Ngadqere: Israel byu qe wa ai bam re maqo" se' ngad: ako". Pe"mung:ga"re yao: bam: au: jhaung qe wa Israel nho: Mao"So ASANG: mang re lao: yang: dao:so: kad' to: vageyang: ngad: ako". Amyu" byu qe alhab' mo, wa cekhyo we' sin: yang: au: jhaung qere nyhung: ako".

¹⁹Ngadqere: yao: bam wa- ngonhaung" wa Israel nho: Mao"So ASANG: mang re lao: yang: yao: bam re dao:so: kad' pye' va" ga: tau" ako". Ana" ngonhaung" yao: bam re dae magai: te' ngad: ra".

²⁰Ngonhaung" nho: dao:so: mathao mae ngonhaung" yao: bam re daui: na nhao ca" ra". Ngonhaung" airu: makad' re Mao"So wa ngonhaung" re qobo dae byid' li" nae".

²¹Yao: bam na: jo, geshao:- ngadqere: yao: bam wa ngonhaung" re thao: qho qid khae byid' li" genae" ga: tau" ako". Ceru wa au: jhaung qe pha,jhi" byid' ra" dao: ngad: ra".

²²Yoshu wa Gibeon byu qere yao: jhao" jhui" lo genae" amyin" byid' ra". Yao: wa yao: bam re- naonhaung" cetau mae yao: na mo, angad ko" re- ngonhaung" re mhug' pyag' yang: naonhaung" va: mae" mo, ngad ko" ein: pe"mung: ngonhaung" re ta" ko" i?

²³Naonhaung" ceru: kad' vako" ruyang Mao"So wa naonhaung" re dao: phyid' ava". Naonhaung" wa nga" Mao"So gyang" lho" jo, qo qhid' mae" thao: qho- qid khae: ra" khonhae" re jeim doe; na: li" genae"- ga: ta" ra".

²⁴Yao: bam wa- lau: de, pho" we" pe"mung:ga"re- mung: geim" naonhaung" re byid: nae" ngad mung:- naonhaung" qhid' au: khyo jhin" ye" lo" au:- ai: mung" mae na: ra" mo, alhab' re se' pye' nae" naonhaung" Mao"So ASANG wa yao" daui daui yaug Moshe re dang za: amyin" byid' to: va" rure ngonhaung" ba yang: ngad: ra". Ngonhaung" wa naonhaung" re gyaug yang: ceru: kad' lo: ru ngad: ra". Ngonhaung" kao so' qhid' mae" ngonhaung" gyaug: ra".

²⁵Ana"- ngonhaung" wa ni" lo, mae ngad va" nao jo: ein: myid: ra" khyo" ngonhaung" re kad' wa,- ga: tau" ako".

²⁶Airumung: ceru wa Yoshu kad' ra" khyo ngad: ra". Yao: wa yao: bam re gug: gam byid: mung: aibam re Israel byu qere mase' nhao ngad: ra".

²⁷Ngadqere: yao: wa dayo, mae za: yao: bam re Israel byu qe we' ASANG: phan qhid' mae" thao: qho- qid khae nae" jeim kad' pye' ra". Ana" ba joe" sho' yao: bam wa caung:pa" nae" ASANG: yang khyin: to" ra" jo, qo mae ce: mau" re xo' yang: vin vo' ako".