Read Maru 2THESALONI 1 Bible Online

2THESALONI 1 - Maru bible

2THESALONI 1

¹Polu- Sila we' Timothi bam wa ngonhaung" Pho" Mao"So we' Asang Yesu yang sang: ra" mo, ngad ko" ra" Thesaloni phung: byu qere mugsug' tung" vhin: ke' ra".

²Ngonhaung" pho" Mao"So we' Asang Yesu Khristu wa nhag' myan" ra" jeju we' ngaui pyo: yaug yo: ru naonhaung" re byid: vageshao: wo".

³Ngonhaung" mao:nhaung: qe we" Ngonhaung" wa yo, khyin: khao: ngo" mae naonhaung" qhid' mae" Mao"So re jeju caung:khin" na: bam ca" ra". Airu: jeju caung:khin" byid' ru wa ngonhaung" qhid' mae" ang: ra" mau" ngad: ra". Pe"mung:ga"re naonhaung" lam khug: myid wa je: qi" li" ru we' gaje qere jhid'de; ra" naonhaung" yaug khao: ngo" nho: jhid'de; myid wa je: qi"qhang: li" na: ruyang ngad: ra".

⁴Ce: mathao mae Mao"So: phung: jham mae bo ko" ra" naonhaung" khyo we' sin: yang: ngonhaung" yao: phug: ta" na va". Naonhaung" thaung" qhug' na ko" ra" yhin" ru we' qug: khai: khyo alhab' re xo' yang: naonhaung" khoru: zang: qhao" ko" ru we' lam khug: na: ko" rure ngonhaung" yao: phug: ta" na: bam va".

⁵Cegu: alhab' wa Mao"So: dao: kho' ru wa din: vang" rure qhu" byid: mung: ai: mathao khyo" naonhaung" wa yao" mung"dan: mae man: qi" ra" mo, boe" li" genae". Naonhaung" wa ai: mung"dan: qhid' mae" qug: khai: kham zo" na: ako".

⁶Mao"So wa jo: ra" khyo" kad' li" nae"- yao: wa ngonhaung" re qug: khai: nhao: ra" mo, re qug: khai: kham zo: nhao: li" nae".

⁷Qug: khai: qug: khai: kham zo" na ko" mo, naonhaung" re we' daga" ngonhaung" rere: myaung: ngho" ru byid' li" nae". Asang Yesu wa yao" qam: bo: ra" mug: lagyo: qe we' daga" myishae we' mug:gaung mae" thug' li" ra" au:-

⁸Mao"So wa yao: re ngag: pye' mo, we' ngonhaung" Asang Yesu Khristu nho: khyo Lau Dao: Gai re matae" gyo" ra" mo, re qobo dae byid' li" nae".

⁹Yao: wa yao" byu alhab' mo; yang byid' ra" phug' te' nga: yhe' rure khae: yu nae" ra" ba na mae joe" li" au: yao: bam wa Asang: qhid' kheim: mae" re: yao" qam: so' bo: ra" phungbao mae" re: kao" pye' ru qhug' mung: apyad ato byo; qeim: ra" qobo dae kham zo" li" genae". Naonhaung" wa ngonhaung" ta" ra" dao: re lam" vako" ruyang ai: Asang re phungbao byid' ra" mo; phaung mae naonhaung" re: bobo: li" genae".

¹¹Ai: mathao mae ngonhaung" wa khonhae" re: naonhaung" qhid' mae" akyu" mho' ra". Naonhaung" re yao: khai: yu: to" ra" kao so' daui khyo we' man: qi" ra" mo, boe" nhao nae" qhid' mae" ngonhaung" nho: Mao"So re ngonhaung" akyu" mho' ra". Yao: wa gai shab: rure naonhaung" kao bau: ra" gu: alhab' re we' naonhaung" lam khug mau" zo" re yao" qam: so' khyo" yang jab byang" byid: vashao:.

¹²Airu: ngonhaung" Mao"So we' ngonhaung" Asang Yesu Khristu nho: nhag' myan" ra" jeju khyo" yang ngonhaung" Asang Yesu mang wa naonhaung" mathao mae phungbao bao: li" mung: yao" mathao mae naonhaung" re: phungbao bao: li" genae".