Read Maru 2THESALONI 2 Bible Online

2THESALONI 2 - Maru bible

2THESALONI 2

¹Nga" mao:nhaung: qe we"- ngonhaung" Asang Yesu dam: joe" li" nae" khyo ngonhaung" yao: we' daga" zang" ham: na nae" ra" khyo we' sin: yang: ngo ta" nug: ru wa-

²ai: Asang: ba na bin: joe" va"- ga: ta" ko" ra" dao" yang ngonhaung" nhag' lam: gyai laui laui za: athaui: anhaung" maboe" genae" we' nhag' lam: mamyan: makhyad' maboe" genae" qhid' mae" ngo naonhaung" re mho' ke' ra". Ce: dao: wa ngonhaung" lapa pa: au: ta" ra" dao: ngad:- mangad: lao"- tarha" kho" ra" dao:- mangad: lao" ngonhaung" vhin tung" mae botung" ke' ra" dao: ngad: ga: myid: jho: re myid: jho vako" laug?

³Naonhaung" re pe" khyo" re: khag' yang re: damhug' pyag' nhao ge,- pe"mung:ga"re Mao"So re lo" thao" gye kad' tau: lhan" ru maboe" shire we' myiqid tham: khyo gyo" nae" yaug ngad: ra" ai: Makhyang" Ra" Yaug mathug' li" li" wa ai: ba na joe" li" nae" mangad:.

⁴Yao: wa so ga: mhang" ra" gu: alhab' re mangad: lao"- caung:pa" ra" ja: alhab' re gye kad' mung: aijham: tho' mae yao: yao" gaung re je: qi: yaug ga: kham: yu: li" nae". Yao: wa Mao"So: Caung:pa" Yham khug mae lhao" re: yevao: zaung: jo, mung: Mao"So ngad:- ga: ta" li" nae".

⁵Ngo naonhaung" we' daga" na shi" au: cegu: alhab' re ngo naonhaung" re ta" va" rure naonhaung" mamyid: beim: ge i?

⁶Ana" ceru: boe" nae" ngadqere: maboe" nhao shilo: tam" to" ru daja: ja: jo; ra". Ai: ja: pe" ngad: rure naonhaung" ba: ako". Airumung: ai: Makhyang" Ra" Yaug wa ayo, dau lao" thug' li" li" nae".

⁷Ai: mug: pho: makhyang: mashab: ru wa boe" na: jo, gau ngad: ava". Ngadqere: tam" to" ra" yaug re mayu: pye' pye' wa ai: boe" li" nae" ra" khyo wa boe" li" nae" mangad:.

⁸Ailao" ai: Makhyang: Mashab: Ra" Yaug wa myao: thug' li" li" nae". Ngadqere: Asang Yesu joe" li" lao" yao: wa aiyaug re yao" nhad' mae" so' yang se' pye' mung: yao" bao qhui: ra" bag bao: yang phyo' qheim" pye' li" nae".

⁹Ai: Makhyang: Mashab: Ra" Yaug wa Satan" nho: qam: o: we' joe" li" mung: mug' pho: ve, lho apyag' aja: ja: re kad' qhu" ru we' mug' pho: mau" zo" jham re zaui" qhu" li" nae".

¹⁰Amung: ai: shid: jeim" lo" nae" ra" mo, re makhyang: mashab: ra" mhug' pyag' ru ja: khao: ngo" ci yang: mhug' pyag' li" nae". Yao: bam wa khyad' yu: ru qhug' nae" qhid' mae" ai: dangman" rure jhid'de; kao bau taung" malham: pang" yu ko" ruyang shid: jeim" lo" li" genae".

¹¹Yao: bam ai: mhug' pyag' ra" dao: re lam" geshao: ga:- Mao"So wa yao: bam: khug mae mau" zaui: nae" qhid' mae" shad' nghung" ra" qam: so' re nhao: ke' ra".

¹²Dangman" rure malam" lo:- qobo khug mae na: ngaui: ra" mo, alhab' wa dao: phyid' ru qhug' li" genae".

¹³Mao:nhaung: qe we"- Asang re jhid'de; mo, ngad ko" ra" naonhaung" mathao mae ngonhaung" yo, khyin: khao: ngo" Mao"So re jeju caung:khin" na: bam ca" ra". Pe"mung:ga"re Byo: nho: qam: so' khyo" yang naonhaung" re yao" gyang" lho" ra" byu qe boe" nhao nae" we' dangman" rure naonhaung" lam khug: ra" myid khyo" yang naonhaung" khyad' yu: ru qhug' genae" qhid' mae" Mao"So wa aqhid mae" ngonhaung" re khyin: san: yu: ra".

¹⁴Mao"So wa ngonhaung" kho" kyo" ra" lau dao: gai khyo" yang re: Mao"So wa cekhyo mae naonhaung" re khai: yu: to" ra". Yao: wa ngonhaung" Asang Yesu Khristu nho: phungbao gae bam re naonhaung" qo" sang: yu geshao: ga: naonhaung" re khai: yu: ra".

¹⁵Airumung: mao:nhaung: qe we"- ngonhaung" kho" kyo: yang: re:- ngonhaung" vhin tung" khyo" yang re: naonhaung" re ngonhaung" mho" shid' lo: ra" ai: dangman" ra" khyo jham re jhaug' za: zaui" zag: ci yang: tang za: ye; jo, ge,.

¹⁶Ngonhaung" Asang Yesu Khristu yao: we' ngonhaung" re jhid'de; mung:- yao" nhag' myan" ra" jeju mae magyid mayeim: ra" mazag mavae: myid we' gang" tang: ra" myid: lao" khyo re ngonhaung" re byid' ngonhaung" pho" Mao"So wa-

¹⁷naonhaung" khonhae" re: gai: ra" dao: jhau nae" we' gai: ra" mau" re zaui: so: nae" qhid' mae" naonhaung" re mazag mavae: myid we' qam: so' ke' byid: vageshao: wo".