Read Maru 2THESALONI 3 Bible Online

2THESALONI 3 - Maru bible

2THESALONI 3

¹Ngonhaung" mao:nhaung: qe we"- Asang: mungdao: wa ngonhaung" phaung mae we' dakhyo: xo' yang: phyad phyad byo: lo" mung:- phungbao bao nae" qhid' mae" ngonhaung" re akyu" bao" mho' byid: gela, ein: lo" thao" khyo" pyang: ke' ra".

²Mao"So wa ngonhaung" re magai mashab: ra" mo, we' makhyang" ra" mo; lo, mae" khyad' yu nae" qhid' mae" re: akyu" bao" mho' byid: gela,- pe"mung:ga"re byu yaug khao: ngo" wa ai: mungdao: re malam ko" ngad: ra".

³Ngadqere: Asang wa lam ga"- kyid yaug ngad mung: yao: wa naonhaung" re qam: bo nhao: ru we' ai: Makhyang" Ra" Yaug mae" gug: gam byid' li" nae".

⁴Asang wa ngonhaung" re naonhaung" dao mae myid: lam: to: nhao: ra". Amung ngonhaung" ta" rure zaui: so" na mung: xo' yang: re: zaui: so" li" genae" rure ngonhaung" khyag' za: myid: lam va".

⁵Asang wa Mao"So: jhid'de; myid re je yang: no, sho' ba: gyo" yu nae" we' Khristu byid' to" ra" zang: qhao" myid re qo" yu sho' naonhaung" re khyo qhid' au: she byid: vashao: wo".

⁶Mao:nhaung: qe we"- Anoe" ashoe kao so' daui: na ko" ra" mo, mao:nhaung: qe alhab' mo, we' ngonhaung" mho" shid' ra" dao: re matae" gyo" ra" mo, alhab' we' majho" zam" khug genae" qhid' mae" ngonhaung" wa Asang Yesu Khristu nho: mang mae naonhaung" re amyin" byid' ke' ra".

⁷Ngonhaung" mau" zaui" lo: ru we' dakhyo: naonhaung" re: mau" zaui: ang ko" rure naonhaung" yao: nyang" za: ba: ako". Ngonhaung" wa naonhaung" we' daga" na: au: anoe" ashoe kao so' daui: lo mo, mangad:.

⁸Ngonhaung" wa aphug' mabyid: lo: khag' dayaug: nho: bao" thaug' zai re: makhae: yu: lo- Airu: khae: yu nae" atha" ngonhaung" wa qam: ke' yang: mau" zaui" bam va". Naonhaung" mae" khag' dayaug re: ngonhaung" qhid' mae" qo mala: nae" khyo" ngonhaung" wa myi" re: na" re: qam: ke' yang: mau" zaui" lo: bam va".

⁹Ngonhaung" ceru: kad' lo: ru wa ngonhaung" re bao" thaug' byid: nae" rure mho' yu nae" ngonhaung" mae akho: akhang" maqo" yang: mangad:- ngonhaung" ceru: kad' ru wa naonhaung" cao" nae" qhid' mae" ve, so: doe, shao: ein: airu: kad' lo: ru ngad: ra".

¹⁰Ngonhaung" wa naonhaung" we' daga" na: au: mau" manug: khao" ra" yaug wa vae: mazo: vashao: ein: naonhaung" re lhaung" ta" va".

¹¹Ngonhaung" ceru: ta" ru wa naonhaung" phaung mae anoe" ashoe kao so' daui: ra" mo, we' su gaje: mau" zo" mae za: bocao: be; baung: mung: pe" makad' mo, na ko" rure ngonhaung" the' gyo" ruyang ngad: ra".

¹²Airu" ra" mo, wa sae za: na mung: mau" khao" zo: genae" qhid' mae" Asang Yesu Khristu mang mae ngha yang: ngonhaung" ta" peim: ta" kyang" ke' ra".

¹³Ngadqere: mao:nhaung: qe we"- gai shab: ra" mau" zo" zaui: so" rumae damyaung: dadug ge,-

¹⁴Naonhaung" ce: vhin tung" mae botung" ke' ra" mungdao: re matae" gyo" ra" byu dayaug yaug na: re na nae". Airu: na yang: ngad: re wa yao: qho' ne phyi qhug' vashao:. Yao: re xam" to: mung: dazam" khug ge,-

¹⁵ngadqere: gyevo we' dakhyo: wa yao: re dakad' ge,- Gyevo ru: kad' nae" atha"- mao:nhaung: dayaug re we' dakhyo: yao: re ta" peim: ta" kyang: ge,.

¹⁶Ngonhaung" nho: ngaui pyo: yaug yo: ru ajhaung ngad: ra" Asang yao: yao: yo, khyin: khao: ngo"- khyo khe' khao: ngo" mae ngaui pyo: yaug yo: ru naonhaung" re byid: vashao: wo". Asang wa naonhaung" alhab' mo, we' daga" ngad vashao: wo".

¹⁷Ce: vhin tung" re nga" lo; yang yao: tung" ru ngad:. Tung" yaug Polu. Vhin tung" khao: ngo" mae nga" mang ceru: tung" ra"- ceru: ngo lhaung" tung" va".

¹⁸Ngonhaung" Asang Yesu Khristu nho: nhag' myan" ra" jeju wa naonhaung" alhab' mo; we' daga" ngad: jo, vashao: wo".