Read Maru 1TIMOTHI 1 Bible Online

1TIMOTHI 1 - Maru bible

1TIMOTHI 1

¹Ngonhaung" khyad' yu: Asang Mao"So we' ngonhaung" myid: lao" khyo ngad: ra" Khristu Yesu nho: amyin" khyo" yang Khristu Yesu nho: lagyo: dayaug ngad: ra" ngo Polu wa-

²Lam khug: rumae nga" zo: gyang" ngad: ra" Timothi re mugsug' tung" ke' ra". Pho" Mao"So we' ngonhaung" Asang Khristu Yesu wa nhag' myan" ra" jeju nhag' khyag' shogu: ru we' ngaui pyo: yaug yo: ru nao re byid: vashao: wo".

³Ngo Makedoni mung" khyo ye" lo" au: re nao re ngo ta" co' ru we' dakhyo: nao Ephesu vogaung: mae xo' na: jo, nae" rure ngo o: ra". Ai: vogaung: mae mho" shid' khyo apyag' re mho" shid' na ko" ra" mo, byu damyo" na gemung: nao wa yao: bam re ai: khyo thang: pye' genae" qhid' mae" amyin" byid: ca" ra".

⁴Jho" ta" ngag nae" rure za: boe" thug' li" nhao: ra" mhomyi: saung: seim jham re ta" ru we' dayao: dayang ngad: ra" byuxag' she' ra" khyo jham re to" pye' genae" qhid' mae" yao: bam re ta" wa,. Lalam lakhug khyo" qo" ba: yu: ra" Mao"So myid: yaung: to" ra" khyo re aijham: yang pe" maqo" zaui: so: byid: ngad: ra".

⁵Ceru: amyin" byid' runho: au: qang khyo wa- gyang" lho" ra" aung khug nhag' lam: gyang" san: ra" aung khug nhag' lam: we'- yaung" san: ra" lam khug: myid mae" thug' li" ra" jhid'de; myid re pug: to" ke' nae" qhid' mae" ngad: ra".

⁶Byu damyo" wa cekhyo jham mae" phaug' lo" byaug mung: akyu" mabo: ra" ja: mae jho" ta" ngag yang: khyonghung: nghung" byaug: ako".

⁷Yao: bam wa Mao"So: tarha" mho" pho" qe boe" nug: ako". Ngadqere: yao: bam wa yao: bam yao" dao: thoe jham re maba: gyo:- mangad: lao"- yao: bam gyai lam lam za: ta" na: ra" khyo jham re maba: gyo: ko" ngad: ra".

⁸Ai: kham" to" ra" Tarha" wa jo ang: ra" khyo" ci: ngad: re wa gai: rure ngonhaung" ba: ra".

⁹Tarha" jham wa byu gai qe: qhid' mae" khyo" to" ru mangad:- Tarha" shad' lhoe" ra" mo, we' tarha" re tau: lhan" ra" mo; qhid' mae" Mao"So mabo: ra" mo, we' qobo shad' lhoe" ra" mo; qhid' mae"- lam khug khyo re malam" ra" mo,- mangad: lao" Byo we' sin" ra" khyo macao" ra" mo; qhid' mae"- yao: bam: yao: pho" qe- mangad: lao"- yao: myhi" qere se' ra" mo; qhid' mae"- byu se' mo; qhid' mae"

¹⁰gaung sho: gintho' mau" zo" qho: ra" mo; qhid' mae"- yauggai yao: cao:- myiqe: yao: cao: gaung sho: jho" zam" ra" mo; qhid' mae"- byu khug' ra" mo; qhid' mae"- mhug' ra" mo, we' madang maman" ra" sagse: kham: ra" mo, mangad: lao"- gai: ra" mho" shid' khyo we' tug' shai" ra" mo; qhid' mae" Tarha" khyo" to" ru ngad: rure ngonhaung" ba: yu ca" ra".

¹¹Ai: mho" shid' khyo phungbao we' byang" jo, mung: ta" shid' kyo: nae" ngore lam: to" ra" ngaui lho" ra" Mao"So mae" thug' li" ra" Lau Dao: Gai mae the' myao: ra".

¹²Nga" mau" zo" re qo" zaui: so: nae" qhid' mae" ngore qam: o: byid: yaug ngad: ra" ngonhaung" Asang Yesu Khristu re ngo jeju beim: so: caung:khin" ra". Ngo wa lai: lo" ra" ayo, mae yao: re jung" gaui: lo yaug- yhin" lo yaug- roe" lo yaug ngad sho' ngadqere: yao: wa ngore man: qi" yaug ngad: ra" khyo" sun" yu mung:- yao: re caung da" byid: nae" qhid' mae" san: yu: to" ruyang ngo wa yao: re jeju beim: so: caung:khin" ra". Ngadqere: ngo wa lam khug myid mabo shi" ru we' ngo kad' ra" mau" zo" re ngo maba: ruyang Mao"So wa ngore nhag' khyag' shogu: ru byid' ra".

¹⁴Ngonhaung" Asang wa yao" magan: mago" ra" nhag' myan" ra" jeju ngore vhe' sheim: byid: mung: Khristu Yesu we' dadang: dalam: za: doe; rumae ngonhaung" qo" yu: ra" lam khug myid we' jhid'de; myid ngore byid' ra".

¹⁵Khristu Yesu mug: myid dao khyo joe" li" ru wa qobo jab qere khyad' yu nae" qhid' mae" ngad:- ga" ra" dao: wa dangman" ra" dao: ngad mung: jab byang" sho' khae: yu mung: lam" nae" qhid' mae" ngad: ra". Ngo wa ai bam mae" je: xo: thao" yaug ngad:.

¹⁶Ngadqere: thao phyao: Khristu re lam mung: apyad ato kao so' re qo" khae: yu genae" mo; qhid' mae" ve, so: khyo" Khristu Yesu wa yao" byang" sheim: jo; ra" nhag' lam: qhang qhang zang: kham: rure qobo jab qe alhab' mo, tho' mae je: xo: thao" yaug ngad: ra" ngore qhu" byid: nae" qhid' mae" Mao"So wa ngore nhag' khyag' shogu: ru byid' ra".

¹⁷Apyad ato: kho:kham shid maba: ru we' myo; yang magai: myao: ra" date: za: ngad: ra" Mao"So re apyad ato mae khonhae" re: phug' te' nga: yhe' byid' ru we' phungbao bo: jo, vashao wo"- Amen.

¹⁸Nga" zo: Timothi we"- lai: lo" ra" ayo, mae ni" khyo re lapa pa: to" ra" dao: jham re cao" yang: ngo wa ce: amyin" akhang" nao re byid' to" ra". Nyang" za: khe' zin: nae" qhid' mae" ai: Lapa dao: jham re shae lhae khyo" ci wa,-

¹⁹alao" ni" lam khug: myid re zaui" zag: ci yang: aung khug nhag' lam: gyang: gyang: to: wa,- byu damyo" wa yao: bam: aung khug nhag' lam: ta" ra" khyo re matae" gyo: gemung: yao: bam: lam khug myid re byo; qeim: lo" nhao: ako".

²⁰Ai bam: phaung mae Humenaeu we' Alexanda tao bobo: ako". Ngo wa yao: shid' yaug re Satan" nho: qam: so' lo, khyo ab byid' pye' ra" khyo" qobo dae byid: va". Ceru wa yao: shid' zo: Mao"So re jung" gaui: ra" dao: majhau genae" rure mho" shid' byid' li" nae".