Read Maru 1TIMOTHI 4 Bible Online

1TIMOTHI 4 - Maru bible

1TIMOTHI 4

¹Ai: atha" yao: bam wa je yang: lhao" re: ai bam re caung da" byid' na vageshao:- pe"mung:ga"re yao: bam zaui: so" ra" mau" zo" akyu" re qo" khae: yu: ra" mo, wa yao: bam jhid'de; ra" lam khug: ra" mao:nhaung: qe ngad: ako".

²Airu" ra" mho" shid' khyo jham wa jo, to' laung: yang phad' khyad' pye' re sho: shid: jo; ru we' dakhyo: aung khug nhag' lam: shid: jo; ra" mhug' pyag' ra" mo; yang mho" pyo: ke' ra" mho" shid' khyo ngad: ra".

³Airu" ra" mo, wa ug' khug' dinkhu: de: lo, xo' xo' ra" khyo we' zo:ve daqhae: re zo: shaug' ru wa shad' ra" khyo ngad:- ga: mho" shid' byid' ako". Ngadqere: lam khug: ra" mo, we' dangman" ra" khyo re ba va" mo, wa jeju caung: akyu" mho' yang: zo: shaug' nae" qhid' mae" ai: zo:ve jham re Mao"So phan" to" ra".

⁴Mao"So phan" to" ra" ja: khao: ngo" wa gai: ru ngad mung: pe" ja: rere: ngag: jao" pye' nae" made, ngad: ra". Ngadqere: ja: khao: ngo" re jeju caung: yang: kham: yu qo: ra".

⁵Pe"mung:ga"re Mao"So: mungdao" yang we' akyu" mho' ru wa ai: rure Mao"So: yang khae: yu man" ru boe" nhao: ra".

⁶Nao wa ce: mho" shid' khyo jham re mao:nhaung: qere mho" byid: yang: ngad: re wa nao phug' cao" ra" dangman" ra" mho" shid' khyo we' lam khug: khyo: nho: mungdao: jham nao yao" gaung re byo zo:ve khau: ra" khyo" yang Khristu Yesu nho: gai: ra" daui daui yaug dayaug nao boe" lo: li" nae".

⁷Ngadqere: ta" nae" maman" ra" Mao"So mabo: ra" mhomyi: saung: seim jham re jao" pye' wa,- Mao"So bo: ra" kao so' daui khyo: qhid' mae" naoyao" gaung re zhao: min" yu wa,.

⁸Gaung khyao we' sin: yang: zhao: min" yu: ru wa akyu" dajhid' bo: ra". Ngadqere: Byo we' sin: yang: zhao: min" yu: ru wa khyo khe' khao: ngo" mae akyu" bo nhao: ra". Pe"mung:ga"re airu wa ana" pyad- joe" lo nae" pyad qhid' mae" kao so' re byid: nae" ngad: ra".

⁹Ceru wa dangman" ra" dao: ngad mung: jab byang" sho' khae: yu mung: lam" tho' ra" dao: ngad: ra".

¹⁰Ngonhaung" wa ngonhaung" nho: myid: lao" rure byu alhab' mo; khyad' yu: Asang ngad: ru we' je yang: lam khug: ra" mo; khyad' yu: Asang ngad: ra" kao so' daui: ra" Mao"So: khug mae ngonhaung" to" to: va" ruyang ngonhaung" wa qam: ke' yang: mau" zaui" ra".

¹¹Ce: pyang dao: jham mae" mho" shid' khyo jham yao: bam re mho" byid: wa,

¹²nao wa zolau: ngad: ruyang khag' yang re: nao re daqu" ngai nhao wa,- ni" dao: jhau: rumae- ni" lo, mau" mae- ni" jhid'de; rumae- ni" lam khug: khyo mae- ni" gyang" san: rumae lam khug: ra" mo; qhid' mae" ve, so: gai boe" nhao wa,.

¹³Ngo joe" li" sho' mo, byu qe: qhid' kheim: mae jham: mugsug' nghe' mung: kho" kyo: byid: yang:mho" shid' byid: mung: ni" yo, khyin: we' ni" qam: o: re byid: yang: qam: ke' na wa,-

¹⁴Lapa qeyang ta" thug' mung: phung: lau: de, qe ni" dao mae lo, kai: byid' ra" au:- nao re byid' to: qhug' ra" ni" khug mae bo: ra" Byo we' sin" ra" jeju jhaung qhu" re pe" shui manho lo: dakad' wa,.

¹⁵Byu alhab' mo; yang ni" nho: qi" qhang aung doe; li" ra" khyo re myao genae" qhid' mae" ai: khyo jham re naoyao: kao bau qam: zaug taung" lo, qaung: kad' cao" wa,-

¹⁶naoyao" gaung re lha" yang: na mung: ni" mho" shid' khyo rere: lha" wa,- ai: khyo jham re nao xo' yang: kad' cao" na: ngad: re wa naoyao" gaung re we' ni" mungdao: re gyo" ra" mo, alhab' re khyad' yu: li" nae".