Read Maru 1TIMOTHI 5 Bible Online

1TIMOTHI 5 - Maru bible

1TIMOTHI 5

¹Phug' mao: qere daqeim wa,- ngadqere: yao: bam re ni" pho" re we' dakhyo: ta" peim: ta" kyang: wa,- ni" o mae" zolau: qere ni" nhaung: bam re we' dakhyo:-

²phyid' mao: qere ni" myhi" bam re we' dakhyo: ni" o mae" zomyi: qere ni" nhae: mo" bam re we' dakhyo:- gyang" san: ra" myid we' zam" khug wa,.

³Gaigai: yao:- yao: yao: za: ngad: ra" cug' mo" myhi" qere gun caung wa,.

⁴Ngadqere: ai: cug' mo" myhi" wa yauggai myiqe: zo:- mangad: lao"- yao: myid: qe qo" yang: ngad: re wa yao: bam wa yao: bam yao" ug' khug' dinkhu: we' sin" ra" yao: bam: caung:pa" thung" qo jham re shi" sao qhid' lo, joe" kad' zhao: yu ang: ako". Cekhyo" yang yao: bam: myhi" pho" qe we'phug' phyid' qere jeju dam: tug' byid' ako". Pe"mung:ga"re ai: mau" zo" wa Mao"So o ngaui: ra" mau" zo" ngad: ra".

⁵Yao: dayaug za: ngad mung: yao: re gun caung nae" mana: ra" cug' mo" wa yao" myid: lao" khyo Mao"So mae to: mung: mathang mano: akyu" mho' ru we' Mao"So: yang bao" thaug' byid: nae" rure myi" re: na" re: mho' yao: ra".

⁶Ngadqere: akyang qeim mung: pyo: khyo cao" na: ra" cug' mo" myhi" wa yao: daui: na sho' ngadqere: shid: jo, gau ngad: ava".

⁷Yao: bam re khag' yang re: qobo vhin khyo made, nae" qhid' mae" cekhyo jham re yao: bam re ceim" shid' byid: wa,.

⁸Ngadqere: byu dayaug yaug wa yao: yao" ba nam ug zo: qere we'- je yang: yao: yao" ug khug' dinkhu: byu qere magun caung yaug ngad: re wa yao: wa ai: lam khug: ra" khyo re ha: pye' ra" yaug ngad mung: malam khug yaug tho' je: magai yaug ngad: ra".

⁹Apyad khyaug' xe zin majoe" shi" ra" cug' mo" khag' rere: cug' mo" japhin: mae dake' ge,- yao: wa dalhang za: lo, xo' qu" yaug ngad ca" ra".

¹⁰Amung: gai: ra" lo, mau" qhid' mae" mang qi" ra" yaug ngad ca" ra". Yao" zo: dau qere nyang" za: khau: qhi" lo yaug- bang" da" lo yaug- Khristan mao:nhaung: qere khyid cid' byid' lo yaug- qug: khai: qhug' ra" mo, re bao" thaug' lo: ra" yaug- gai shab: ra" mau" zo" re kao bau taung" zaui: so" lo yaug ngad ca" ra".

¹¹Ngadqere: apyad ngai: ra" cug' mo" myhi" qere cug' mo" myhi" japhin: mae dake' ge,- pe"mung:ga"re yao: bam gaung sho: myid kao bau: ruyang ug' khug' dinkhu: vai" nug gelao"- yao: bam wa Khristu mae" phaug' lo" byaug: ako".

¹²Airumung: Asang re sao qhid' byid' to" ra" yao: bam: dao:so: re phyo' pye' gemung: qobo qo" mo, boe" lo: ako".

¹³Yao: bam wa dayham mae" dayham khyo lae" lhau mung: yao: bam: yo, khyin: re mageim: na: pye' ba: ako". Ai: tho' je: xo: ru wa yao: bam wa gaui mho lau hab' mung: su: khyo re kaung: kag' ru we' yao: bam majhau ang: ra" dao: jhau ba: ako".

¹⁴Airumung: ngonhaung" gyevo qe wa ngonhaung" khyo we' sin: yang: magai makhyang" ra" dao: jhau nae" agu maqo" genae" qhid' mae" apyad ngai: ra" cug' mo" qe wa ug' khug dinkhu: vai"- zo: dau khau mung: yao: bam: yham khug: dinkhu: re gun caung yang: na genae" rure ngo je yang: o ngaui: ra".

¹⁵Pe"mung:ga"re cug' mo" qe damyo" wa khyonghung: nghung" byaug mung: Satan" nho: thao cao" byaug: avako".

¹⁶Ngadqere: Khristan myiqe: dayaug yaug yao" yham byu qe mae" cug' mo" qe bo yang: ngad: re wa yao: wa ai bam re gun caung byid: qo: ra". Phung: re qo magai: la: nhao ngad: ra". Ailao" yao: yao: za: ngad: ra" cug' mo" qere phung" yang qo" gun caung byid: nae" ngad: ra".

¹⁷Au: jhaung qekhyo" mau" nyang" vin vo; ko" ra" phung: lau: de, qe wa aphug' shid' zhao" kham: yu man" ra" mo, ngad: ako" ein: myid: yu qo: ra". Je yang: mungdao: kho" kyo" ra" mau" zo" we' mho" shid' byid' ra" mau" zo" re qam: ke' yang: zaui: so" ra" mo, wa airu" ra" aphug' re kham: yu man" ako".

¹⁸Pe"mung:ga"re jham: mugsug' mae nao gaug nao" ra" au: re ci: ra" nung: jaung lo" nhad' re gyan dazhaung: byid:- amung: mau" zaui: yaug wa yao" mau" zaui: phug' re khae: yu man" ra" ga: ta" ra".

¹⁹Sagse: shid' yaug- mangad: lao"- ai tho' je: ra" sagse: qeyang mata" re wa- phung: lau: de, pho" re qobo zhaug' ta" ra" dao: re dabotae" gyo: wa,.

²⁰Gaje dang: ra" mo, gyaug geshao:- qobo shad' ra" yaug re mo, byu qe: qhid' kheim: mae qeim: mho" wa,.

²¹Cekhyo jham re nao wa khag' rere: myo, nho nga: lao: makhyin- khag' bo: made, lo: nao zaui so: phug' cao" na vashao: Mao"So: qhid' kheim:- Khristu Yesu qhid' kheim:- gyang" lho" ra" mug: lagyo: jham: qhid' kheim: mae ngo wa nao re no: mae lao: yang: ta" ra".

²²Khag' rere: lo, dahin: kai: byid: wa,- Su gaje qe qobo kad' rumae dacao: bo wa,- naoyao" gaung gyang: gyang: za: na wa,.

²³Nao wa dazab makyo vae: dug: no no mung: ruyang qid za: dashaug' wa,- zo:ve pyag' rumae bao" byid: nae" sabyi qang: rere: dajhid' jhid' boshaug' wa,.

²⁴Byu damyo" nho: qobo jham wa de: de: za: the' myao mung: yao: bam: qobo jham wa- dao: kho' nae" yao: bam: gau: qhid' mae de" thug' jo; ra". Ngadqere: gatau damyo" nho: qobo jham wa thao re za: myao: thug' li" ba: ra".

²⁵Ai we' dakhyo: gai: ra" lo, mau" jham re wa de: de: za: the' myao mung:- airu: de: de: za: mamyao: ra" ja: rere: maqo" gai: nyham" to: ngad: ra".