Read Maru 2TIMOTHI 1 Bible Online

2TIMOTHI 1 - Maru bible

2TIMOTHI 1

¹Mao"So myid o: ra" khyo" yang Yesu Khristu nho: lagyo: dayaug ngad mung:- Khristu Yesu we' dadang: dalam: za: doe; ra" khyo" ngonhaung" qo" yu: ra" dao:so: byid' to" ra" kao so' khyo re ta" hau" kyo: nae" qhid' mae" nhao: ke' qhug' yaug ngo Polu wa-

²Ngo jhid'de; ra" nga" zo: re mugsug' tung" ke' ra". Pho" Mao"So we' ngonhaung" Asang Khristu Yesu wa nhag' myan" ra" jeju- nhag' khyag' shogu: ru we' ngaui pyo: yaug yo: ru nao re byid: vageshao: wo".

³Ngo wa nga" phug' pho" qe caung da" byid' lo vako" ru we' dakhyo: nhag' lam: gyang: gyang: za: ngo caung: da" byid' na: ra" Mao"So re jeju caung:khin" byid' ra". Myi" re: na" re: nga" akyu" mho' thoe mae ngo nao re khonhae" re: bomyid: beim: zo" re"- yao: re jeju caung" ra".

⁴Ngo wa ni" ngug byid jham re myid: beim: byid' ra"- amung: ngo gyai ngaui bau" ru qhug' nae" qhid' mae" ngo wa nao re gyai qhug' nug: ra".

⁵Ni" phyid' Lui we' ni" myhi" Uni shid' ma: mae re: bo: ra" ni" nho: din:man" ra" lam khug: myid re ngo myid: beim" na:. Airu" ra" lam khug: myid ni" khug mae re: bo: ein: ngo myid: lam: ra".

⁶Ce:mathao mae ni" dao mae ngo lo, kai: byid' au:- nao re Mao"So byid' ra" jeju jhaung qhu" re xo' yang: de; jo, nhao nae" qhid' mae" nao re ngo ta" peim" ke' ra".

⁷Pe"mung:ga"re Mao"So ngonhaung" re byid' to" ra" Byo wa ngonhaung" re magyaug: xu: jo, nhao ngad: ra". Ai: atha" yao" Byo wa ngonhaung" re qam: so' we'- jhid'de; myid we'- yao: yao" gaung re qo" khang" ru ngonhaung" re ke' byid' ra".

⁸Airu: mung: ngonhaung" wa Asang: khyo re sagse: kham: rumae daqho' wa,- Khristu nho: mathao mae kyam: byu ngad: ra" nga" mathao mae re: daqho' wa,- ai: atha" Mao"So: qam: so' re kham: yu mung: Lau Dao: Gai qhid' mae" dayin dayo: kham zo" rumae bobo wa,-

⁹Yao: ngonhaung" re khyad' yu mung: yao" byu qe boe" nae" qhid' mae" khai: yu: ru wa ngonhaung" qo" zaui: so" ra" mau" zo" mathao khyo" yang mangad:- yao" myid: yaung: to" ru we' nhag' myan" ra" jeju mathao khyo" yang ngad: ra". Yao: wa mug: thug' sao mapeim: shimae" Khristu Yesu khyo" yang ce: nhag' myan" ra" jeju ngonhaung" re byid' ra".

¹⁰Ngadqere: ai: rure ngonhaung" khyad' yu: Asang Khristu Yesu joe" li" ra" khyo" yang ana" ngonhaung" re qhu" byid' ava". Yao: wa shid: ru nho: qam so' re pin" pye' mung: Lau Dao: Gai khyo" yang shid maba: ra" kao so' re qhu" byid' ava".

¹¹Mao"So wa Lau Dao: Gai re byid: nae" qhid' mae" lagyo: we' mho" pho" khyo" ngore aya: tang" to: byid' ra".

¹²Ce: mathao mae ngo wa aijham re dayin dayo: kham zo" na: ru ngad: ra". Ngadqere: ngo wa myid: lam: ru byang" sho' bo: jo, shi"- pe"mung:ga"re ngo wa khag' re myid: lam khug ngha: na: rure ngo ba mung: yao: ngore lam: to" ra" khyo re lo" thao" ra" ba na joe" sho' yao: qo" zam" to: byid' rure ngo nyang" za: ba: ra".

¹³Ngo nao re mho" byid' ra" ai: dangman" ra" mungdao: jham re phug' cao" nae" qhid' mae" ve, so: khyo" tang za: zaui" zag: ci mung: Khristu Yesu we' ngonhaung" dadang: dalam: za: doe, yang: qo" yu: ra" ngonhaung" nho: lam khug: myid we' jhid'de; myid mae tang za: zaui" ci wa,.

¹⁴Nao re lam: to" ra" ai: gai: ra" ja: jham re ngonhaung" khug mae na: jo; ra" Gyang" lho" Byo: qam: so' khyo" yang zam" ci wa,-

¹⁵Phugelu we' Heramoge bobo yang: Asia mung" mae" mo, yaug khao: ngo" ngore shapye' to: co' ko" rure nao ba: ra".

¹⁶Asang wa Onesiphuru nho: yham byu qere nhag' khyag' shogu: ru qhu" byid: vashao:- pe"mung:ga"re yao: wa ngore myo: sho' lhang myid pyo: nhao: ra". Yao: wa ngo thaung: laung" rure maqho' ngad: ra".

¹⁷Yao: wa Roma vogaung: khyo joe" li" we' ngore maqhug' re qhug' sho' qho: ra".

¹⁸Asang wa lo" thao" ra" ba na mae yao" nhag' khyag' shogu: ru yao: re qhu" byid: vashao:- Ephesu vogaung: mae yao: khoqhi" sho' ngore caung da" byid: va" rure nao nyang" za: ba: ra".