Read Maru 2TIMOTHI 2 Bible Online

2TIMOTHI 2 - Maru bible

2TIMOTHI 2

¹Nao kam" wa nga" zo: we"- Khristu we' ngonhaung" dadang: dalam: za: doe, yang: qo" yu: ra" nhag' myan" ra" jeju khyo" yang qam: bo: jo, wa,-

²sagse: myo: sho' mo; qhid' kheim: mae ngo kho" kyo: mung: nao wa ngo mae" the' gyo" yu: ra" ai: mho" shid' dao: re su gaje qere qo" mho" shid' nae" ra" lam ga" ra" mo, rere: kai" ab byid: wa,.

³Nao wa Khristu Yesu nho: jhaug' zaug: ra" gyezo: dayaug khyo" ai: qug: khai: dayin dayo: kham zo" rumae bokham zo: wa,-

⁴gye mau" zo" vin vo; na: ra" gyezo: pho" wa yao" gyezug: pho" re ngaui nhao nae" qhid' mae" o mung: gye we' masin" ra" mau" zo" jham mae macao: lhag' zaui: ngad: ra".

⁵Jho" tao: poe mae bobo: ra" tao: sab' ra" byu dayaug wa ai: tarha" re maphug' cao" lo: bin: kheim" jhaung qhu" re maqo" ve; yu ngad: ra".

⁶Qam: ke' yang: mau" zaui" lo: ra" yo kad' yaug wa gaug zo maui: lam: ameim" re qo" zo: ang: ra".

⁷Ngo ta" ra" dao: re myid: qu" wa,- pe"mung:ga"re Asang wa ai: gu: alhab' nao re ba: gyo: nhao: li" nae".

⁸Ngo kho" kyo" ra" ai: Lau Dao: Gai mae mho" shid' ru we' dakhyo: shid: rumae" daui: to" li" nhao: ru qhug' ru we' Davi myid:zo: ngad: ra" Khristu Yesu re myid: beim: wa,-

⁹ngo wa ai: Lau Dao: Gai re kho" kyo: yang: qug: khai: dayin dayo: kham zo: mung: tarha" shad' lhoe" ra" yaug re we' dakhyo: jao co" yang taui" to: qhug' ra". Ngadqere: Mao"So: mungdao: re wa maqo" taui" to: ngad: ra".

¹⁰Airumung: khyin: yu qhug' ra" mo, wa- Khristu Yesu khyo" yang khyad' yu: rure qo" kham: yu mung: apyad ato: phungbao re qo" kham: yu genae" qhid' mae" ngo wa Mao"So: yang khyin: san: yu qhug' ra" mo; mathao mae ja: khao: ngo" mae zang: kham: ra".

¹¹Ngonhaung" wa yao: we' daga" shid va" ngad: re wa yao: we' daga" re: ngonhaung" kao so' daui: li" nae".

¹²Ngonhaung" wa yao: we' daga" zang: kham: ngad: re wa- yao: we' daga" re: eib: li" nae". Ngonhaung" wa yao: re ha: pye' ngad: re wa- yao: re: ngonhaung" re ha: pye' li" nae".

¹³Ngonhaung" jhaug' mazaug ngad yang: re: yao: wa jhaug' zaug yaug ngad: ra". Pe"mung:ga"re yao: wa yao: yao" gaung re maqo" mhug' ngad: ra" ga" ra" ce: dao: wa dangman" ra" dao: ngad: ra".

¹⁴Cekhyo re ni" byu qere ta" peim: byid: wa,- amung: dao: thoe jham we' sin: yang: majho" ta" ngag genae" qhid' mae" Mao"So: qhid' kheim: mae jhaug' za: yao: bam re ta" peim: byid: wa,- Airu" ra" jho" ta" ngag: ra" khyo wa agai maboe" nhao lo:- aire tae" gyo" ra" mo, re byo; qeim: lo" nhao: ra".

¹⁵Yao" mau" zo" mae qho' nae" mabo: ra" mau" vin yaug khyo" re:- Mao"So: dangman" ra" mungdao: re jo jo za: mho" shid' byid: yaug khyo" re:- Mao"So: qhid' kheim: mae nga: ye, sho' naoyao" qam: bo: thao" mae" phin: yang: zaui: so: wa,.

¹⁶Byu re Mao"So we' je: va: sho' za: khe' ke' ra" khyo ngad: ra" Mao"So mabo: ru we' adu: adae: jho" jhau: ra" dao: jham re jao" pye' wa,-

¹⁷airu" ra" mho" shid' khyo wa gaung sho: re zo" pye' ra" ye, bab no we' dau: ra". Airu" khyo re Humenaeu we' Philetu shid' zo: mho" shid' byid' ako".

¹⁸Yao: shid' zo: wa shid: rumae" dam: daui: to" li" ru wa ana" boe" va" ga: ta" ra" khyo" yang dangman" ra" khyo mae" nghung" lo" byaug gemung: lam khug: ra" mo, damyo" nho: lam khug: ra" myid re byo, nhao: ako".

¹⁹Ngadqere: Mao"So zhaug' to" ra" gang" tang: ra" apan aqao: wa maqo" gai: laui: ngad: ra". Ai: apan aqao: dao mae Asang wa yao: sang: ra" gu: re ba mung: Asang: bo: de, yaug ngad: ga: ta" ra" yaug khag' ngadqere: yao: wa magai makhyang" ra" lo, mau" re jao" pye' ra" ga: tung" to" ra".

²⁰Yham mo" dayham mae keim kang: myo: sho' ja: jo; ra". Daqhae: re wa ngaui we' qhang: yang kad' to: mung:- gatau daqhae: re wa sag' we' zhogam" yang kad' to" ra". Amung: daqhae: re wa mang a- qhid' mae" ci nae" qhid' mae" ngad mung: damyo" re wa ne, qug ci nae" qhid' mae" ngad: ra".

²¹Dayaug yaug yao: yao" gaung re ai: makhyang" ra" ja: jham jhad' za: jao" pye' ra" yaug ngad: re wa yao: wa yao" Asang qhid' mae" akyu" bo mung: gai: ra" mau" ja: khao: ngo" qhid' mae" ci nae" qhid' mae" jin" jin" ngad yaug ngad: ruyang yao: wa gakai: lai je: akhyag: ra" myid: yaung: to" rumae ci yhung" ru qhug' li" nae".

²²Amung: ve, qae" myid shab' kao bau: rure jao" pye' wa,- gyang" san: ra" nhag' lam: we' bao" thaug' byid: nae" qhid' mae" Asang re mho' yao: ra" mo, we' daga" din:man" ru- lam khug: ru- jhid'de; ru we' ngaui pyo: yaug yo: rure qam: ke' yang: qho wa,-

²³ngadqere: adu: adae" ru we' nhag' cad' noyaug mung: ra" jho" ta" ngag: ra" khyo jham re jao" pye' wa,- ai: jham wa myan" myo: jho" byo, yang: thang ja: ngad: rure nao ba gau ngad: ra".

²⁴Asang: nho: daui daui yaug wa myan" myo: jho" byo, magai: ngad ngad: ra". Yao: wa byu alhab' mo, re nhag' khyag' mung: gai: ru we' nhag' lam: qhang: ra" mho" pho" ngad qo: ra".

²⁵Yao" gyevo qere mho" shid' ra" au: nau" nhae" yaug re: ngad qo: ra". Pe"mung:ga"re Mao"So wa yao: bam re myid tha" lo mung: dangman" rure ba: lo genae" qhid' mae" akho: akhang" agu gai: byid' re byid' li" maba.

²⁶Airumung: yao: bam beim: so" li" mung: yao: bam re taung" to: yang: yao" myid o: ra" khyo re phug' cao" nhao: ra" Satan yui: nho: lha" mae" loe; beim: lo: li" genae".