Read Maru 2TIMOTHI 3 Bible Online

2TIMOTHI 3 - Maru bible

2TIMOTHI 3

¹Lo" thao" ba na jham mae qug' ra" ayo, ngad nae" rure myid: beim: wa,-

²byu qe wa yao: yao" qhid' mae" za: myid mo,- so' kho' mo,- phug: ru we' ngad beim: mo,- ngad: li" genae"- yao: bam wa maphug' makhyad' roe" mo,- yao: bam: myhi" pho" qe: mho dao: magyo: mo,- jeju maba: beim: mo,- Mao"So malam mo,- ngad: li" genae".

³Yao: bam wa nhag' khyag' myid mabo mo,- nhag' mashid qad mo,- gaui mho lau mho mo,- se' da: be, khyad' kad' mo,- byuqan qe ngad: li" genae".

⁴Yao: bam wa gai: rure nghang" ra" mo, ngad: li" genae". Yao: bam wa lam maga" aphaug' alhag' kad mo,- mamyid: qu" lo: kad' mo,- ngad beim: myid qi" ra" mo, ngad: li" genae". Yao: bam wa Mao"So re tho' mug: myid pyo: khyo re je: jhid'de; mo, ngad: li" genae".

⁵Yao: bam wa adao shad' mae ngonhaung" nho: caung:pa" thung" mang vin mo, ngad: li" genae". Ngadqere: ai: caung:pa" thung" nho: qam: so' aman" re yao: bam ha: pye' li" genae"- Airu" ra" mo, re jao" pye' wa,-

⁶yao: bam mae" damyo" wa su: yham jham khyo vao ye: mung: yao: bam: qobo qo: yang nhai" to: qhug' ru we' myid o kao bau: ru ja: khao: ngo" re cao" kad' na ko" ra"-

⁷ai: qam: nang" ra" myiqe: qere eib: yu: pye' ako". Ai: myiqe: qe wa khonhae" re: mho" zhao: yu nae" qam: ke' na gengadqere: dangman" ra" khyo re khonhae" re: maqo" gai: ba: yu ko" ra" mo, ngad: ako".

⁸Yanne we' Yambre shid' zo: wa Moshe re gye kad' ko" ru we' dakhyo:- ai: byu qere: dangman" rure gye kad' ako". Yao: bam myid: sun" qu" ga" ru mabo mung: lam khug: ra" myid byo; qeim: lo" ra" mo, ngad: ako".

⁹Ngadqere: yao: bam wa gyai qi: sho' mau" maqo" kad' genae"- pe"mung:ga"re yao: bam khoru: go: joe; rure yaug khao: ngo" the' myao: li" genae". Airu wa Yanne we' Yambre shid' zo: mae boe" ru we' dakhyo: yao: ngad: ra".

¹⁰Ngadqere: nao wa nga" mho" shid' khyo nga" ave, lo, mau"- nga" kao so' daui: ra" au: qang khyo jham re phug' cao" ava". Nao wa nga" lam khug: ra" khyo nga" nhag' lam: qhang: ru- nga" jhid'de; myid- nga" zang: kham: ra" khyo- ngo yhin" ru qhug' ru jham-

¹¹ngo kham zo" ra" qug: khai: jham re myao: ava". Antioki- Ikoni- Lustra vogaung: jham mae qu" gyaug qu" lhaung: ra" yhin" ru jham re ngo zang: kham: lo: ra" khyo alhab' re nao ba: ra". Ngadqere: Asang wa aijham alhab' mae" ngore khyad' yu: ra".

¹²Khristu Yesu we' dadang: dalam: za: doe, mung: Mao"So: khyo re phug' cao" ra" yaug khao: ngo" wa yhin" ru qhug' li" genae".

¹³Makhyang" ra" mo,- geim kad' pyag' ra" mo, wa magai: ru je: xo sho' kad' li" mung: su gaje qere mhug' pyag' mung: yao: bam yao: mhug' pyag' li" genae".

¹⁴Ngadqere: nao kam" wa- nao zhao: yu mung: jhaug' za: lam" ra" dangman" khyo re xo' yang: tang za: zaui" zag: ci wa,- ni" mho" pho" qe khag' ngad ko" rure nao ba: ra".

¹⁵Khristu re lam khug: ra" khyo" yang khyad' yu: ru qhug' sho' nao re pha,jhi" qo" byid' ra" gyang" lho" ra" jham: mugsug' jham re zoshao: mae" nao ba va" rure myid: beim: wa,-

¹⁶Mao"So: mau" vin yaug wa- jab byang" sho' qo" zaui: yaug ngad: li" mung: gai shab: ra" mau" ja: khao: ngo" re qo" zaui: so: nhao nae" qhid' mae"-

¹⁷Mao"So: yang jaung" yang: tung" to" ra" Jham: mugsug' alhab' wa dangman" rure mho" shid' ru- qeim: mho" ru- shad' rure mho" kyang" ru- jo: ra" kao so' daui khyo qhid' mae" mho" shid' byid' ru qhid' mae" akyu" bo: ra".