Read Maru 2TIMOTHI 4 Bible Online

2TIMOTHI 4 - Maru bible

2TIMOTHI 4

¹Shid: ra" mo, re we' daui: na: ra" mo, re dao: kho' nae" ra" Khristu Yesu we' Mao"So: qhid' kheim: mae yao: wa Kho:kham khyo" eib nae" joe" li" na: ruyang-

²yo, khyin: dau ngadqere: madau ngadqere: ai: mungdao: re qam: ke' yang: kho" kyo: nae" qhid' mae" ngo nao re qam: ke' yang: jhan" ke' ra". Kho" kyo" ra" au:- qobo ceim" shid' yang: qeim: mho" wa,- qam: byid: wa,. Nhag' lam: qhang qhang za: mho" shid' byid: wa,

³byu qe wa jo yang: gai: ra" mho" shid' khyo re manug: tae" gyo: lo:- yao: bam yao" myid o kao bau: rure cao" yang: yao bam: no: mae phan: sho' tae" gyo: nug: ra" dao: jham re mho" shid' byid' ra" mho" pho" myo: sho' qho genae" ayo, joe" lo: li" nae".

⁴Yao: bam wa dangman" ra" dao: re tae" gyo: nae" qhid' mae" ngag: pye' mung:- mhomyi: saung: seim jham re tae" gyo" li" genae".

⁵Ngadqere: nao wa ve, yaug: aja: ja: mae naoyao" gaung re qang: za: khang" wa,- qug: khai: re zang: kham wa,- Lau Dao: Gai kho" kyo" ra" mau" zo" re zaui: so: wa,- Mao"So: daui daui yaug khyo" nao yao" qo alhab' re zaui: so" na wa,.

⁶Ngo kam" wa xeim: re we' dakhyo: ngaui" byid: qhug' nae" ayo, joe" ava"- ce: mug: myid mae" thug'lo" nae" yo, khyin: joe" li" na: ava".

⁷Ngo wa jho" tao: poe mae ngoyao" qam: bo: ra" qhi" tao: va". Ngo wa khyo thao" sho' tao: va". Lam khug: ru we' dakhyo: ngo kao so' daui va".

⁸Ana" wa din:man" ra" khyo" kao so' daui: ra" mo, re byid' ra" aung doe; jhaung qhu" wa ngore lao" na: ra". Din:man" ra" tarha" zug: ngad: ra" Asang wa dao: kho' ra" ba na re ai: jhaung qhu" ngore byid' li" nae". Ngo re za: mangad: Asang joe" li" re jhid'de; kao bau myid we' lao" na ko" ra" mo, alhab' rere: byid' li" nae".

⁹Ngo jhao" phyad qo" joe" li" nae" gai: boe" ra" qhi" qam: ke' wa,-

¹⁰Dema wa ana" ce: mug: myid qae: re jhid'de; yang: ngore shapye' co' mung: Thesaloni vogaung: khyo ye" lo" byaug: ra". Kreken wa Galati khyo ye" lo" byaug mung: Titu wa Dalmati khyo ye" lo" byaug: ra".

¹¹Luka dayaug za: ngo we' daga" na: ra". Marku re qho: yu mung: nao we' daga" jhui" li" byid: la,- pe"mung:ga"re yao: wa nga" mau" zo" re qo" bao" thaug' byid: yaug ngad: ra".

¹²Tukhiku re ngo Ephesu vogaung: khyo ye: nhao: ke' va".

¹³Nao li" lao" Troa vogaung: mae Karpu nho: lo, mae ngo to: co' ra" nga" bau: qhang we' mugsug' paug' jham je yang: shoqid mugsug' paug' jham rere: boyu: vin: li" byid: la,.

¹⁴To' be, zo: yaug ngad: ra" Alexanda wa ngore qug: khai: gyai byid: va"- yao: kad' lo: rure cao" yang: Asang wa lage, phaug' byid: shao:-

¹⁵nao yao: aiyaug rere: lha" na wa,- pe"mung:ga"re yao: wa ngonhaung" nho: mungdao: re gyai aqan alan gye kad' yaug ngad: ra".

¹⁶Sao qhid' lhang ngo myid' ca: qu" qhug' ra" au: nga" shad' mae ye, mung: khag' re: mabao" ta" byid: ko" ngad: ra". Alhab' mo, ngore phao: cug' to: co' ako". Mao"So wa yao: bam re qobo dae mabyid: vashao: wo".

¹⁷Ngadqere: ngo wa Taung bug byu qe alhab' mo; the' gyo: gesho' jab byang" ra" mungdao: re qo" kho" kyo: nae" qhid' mae" Asang wa ngo we' daga" na mung: ngore qam: o: byid: ra". Amung: ngo wa shid nae" dao: phyid' rumae" khyad' yu: ru qhug' va".

¹⁸Asang wa makhyang" ra" ja: alhab' mae" ngore khyad' yu mung: yao" mug: khaung: mung"dan: mae gug: gug: za: jhui" vao lo" li" nae". Asang wa apyad ato khonhae" re: phungbao bao: jo, vashao: wo"- Amen.

¹⁹Priskila we' Akula shid' tao we' Onesiphuru nho: yham byu qere ngo au" ke' ra".

²⁰Erastu wa Korinthu vogaung: mae thang: na: ra". Trophimu wa no yang: Miletu vogaung: mae ngo nha co' va".

²¹Gyo, yo, majoe" shimae" nao qo" joe" li" sho' qam: ke' wa,- Eubulu- Puden- Linu- Klaudia bam we' gatau Khristan mao:nhaung: qe wa naonhaung" re au" ke' ako".

²²Asang wa ni" byo we' daga" ngad vashao: wo"- Mao"So: nhag' myan" ra" jeju wa naonhaung" alhab' we' daga" ngad: jo, vashao: wo".