Read Maru TITU 1 Bible Online

TITU 1 - Maru bible

TITU 1

¹Mao"So: daui daui yaug we' Yesu Khristu nho: lagyo: ngo Polu wa mugsug' tung" ke' ra". Mao"So: yang khyin: san: yu: ra" mo; nho: lam khug: myid qi" qhang: li" sho' bao" thaug' byid: nae" qhid' mae" we' ngonhaung" nho: caung:pa" thung" yang mho" byid' ra" dangman" ra" khyo re ba: li" gesho' yao: bam re khyoqhid' au: she nae" qhid' mae" Mao"So wa ngore khyin: san: to" ra".

²Ai: caung:pa" thung" wa apyad ato kao so' re myid: lao" rure apan aqao: to" ru ngad: ra". Maba: mhug' pyag' ra" Mao"So wa mug: thug' sao mapeim shimae" ngonhaung" re kao so' byid: nae" dao:so: byid' to" ra".

³Yao: wa ayo, joe" lao"- ai: kao so' re yao" mungdao: khyo" yang qhu" byid' ra". Mao"So wa ce: mungdao: ngore ab byid' to: mung: ngonhaung" khyad' yu: Asang pho" Mao"So: amyin" khyo" yang ngo wa ai: mungdao: re kho" kyo" ru ngad: ra".

⁴Ngonhaung" daga" ceim" lam khug: na: ra" lam khug: rumae nga" zo: gyang" Titu re ngo mugsug' tung" ke' ra". Ngonhaung" Pho" Mao"So we' ngonhaung" khyad' yu: Asang Yesu Khristu wa nhag' myan" ra" jeju we' ngaui pyo: yaug yo: ru nao re byid: vageshao: wo".

⁵Nao zaui: so: vin vo; ca" na shi" ra" mau" zo" jham re adai: ato' jo jo za: qo" zaui: so: nae" qhid' mae" we' vo khao: ngo" mae phung: lau: de- qere cao" khyin: san: to: byid: nae" qhid' mae" ngo wa nao re Krete gagyo: kao" mae nha: to: co' ru ngad: ra". Nga" pin dao: jham re myid: beim: wa,-

⁶Phung: lau:de, kad' yaug wa qobo vhin nae" made, yaug- yham sang myhi" dayaug za: qo" yaug ngad qo: ra". Yao" zo: dau qe alhab' re: Yesu re lam khug: ra" mo, ngad ca" ru we' akyaung athin- ave, kyao- mho dao: magyo" rumae mang qi" ra" yaug magai: ngad ngad: ra".

⁷Pe"mung:ga"re phung: au: jhaung kad' yaug wa Mao"So: mau" zo" re jhui" pyo yaug ngad mung:- yao: wa qobo vhin nae" made, yaug ngad ca" ra". Yao: wa ngad beim: yaug- nhag' lam: lang" yaug- yhid ya: boe" yaug- se' da: be, khyad' kad' yaug- ngaui qhang so' kho' yaug magai: ngad ngad: ra".

⁸Yao: wa bang" da" kao bau yaug- gai shab: ra" ja: re jhid'de; kao bau yaug- ngad qo: ra". Yao: wa yao: yao" gaung re qo" khang" yaug- din:man: yaug- gyang" lho" yaug- cao" khyo: tarha" re cao" ra" yaug ngad ca" ra".

⁹Yao: wa mho" shid' khyo we' jho" zhaung: mung:- lam ga" ra" mungdao: re tang za: zaui" zag: ci yaug ngad qo: ra". Ce: khyo" yang su gaje rere: dangman" ra" mho" shid' khyo ci yang: qam: byid: mung: ai: dangman" ra" mho" shid' khyo re gye kad' ra" mo, shad' ra" khyo rere:- qo" ceim" shid' byid' li" nae".

¹⁰Pe"mung:ga"re tau: lhan: mung: yao: bam: pe" akyu" mabo: ra" dao: keim jham: yang su gaje qere mhug' pyag' na: ra" mo, myo: sho' na: bam: ako". Je yang: Yuda caung:pa" thung" mae" Khristan caung:pa" thung" shad' khyo phaug' lo: ra" mo, myo" ako".

¹¹Yao: bam: mho" shid' khyo re tam" pye' ca" ra". Pe"mung:ga"re yao: bam wa aqho' axag' ngad: ra" ngaui qhang re so' kho' ra" khyo re mho" shid' geyang: ug' khug' dinkhu: jham re abyi asin: kad' pye' ako".

¹²Krete gagyo: kao" byu yao: bam: lapa qemae" dayaug yao: ta" ru wa- Krete gagyo: kao" mae" mo, wa khonhae" re:- mhug' hab' qe makhyang" ra" gug'nyhug' lhe: jham- byunoe" byushoe zo: so' kho' mo, ngad:- ga: ta" ra". Yao: ta" ru we' dakhyo: dang: ako".

¹⁴Ce: mathao mae yao: bam wa dangman" ra" lam khug: myid bo: li" mung: Yuda qe: mhomyi: saung: seim jham re we' dang: ra" khyo re ngag: ha: pye' ko" ra" mo, mae" thug' li" ra" xao su byu qe: amyin" dao: jham re to" pye' genae" qhid' mae" nao wa yao: bam re thin thin za: qeim wa,.

¹⁵Yao: bam yao" gaung yao: san sin" ra" mo; qhid' mae" ja: khao: ngo" wa san sin" ra". Ngadqere: masan masin" ra" mo, we' malam khug: ra" mo; qhid' mae" wa pe" ja: re: masan masin" boe" ra". Pe"mung:ga"re yao: bam: myid we' aung khug nhag' lam: wa masan masin" boe" jo; ako".

¹⁶Yao: bam wa Mao"So re ba: ga: ta" gengad yang: re:- yao: bam: ave, wa aire ha: pye' ako". Yao: bam wa byunghang: qe mho dao: magyo: mo,- gai: ra" mau" zo" daja: re kad' nae" re: madau mo, ngad: ako".