Read Maru TITU 2 Bible Online

TITU 2 - Maru bible

TITU 2

¹Ngadqere: nao wa jo: ra" khyo we' dau ang: ra" khyo jham re mho" shid' byid: ca" ra".

²Apyad qi" ra" phug' mao: qere gyang: co: yo na genae"- ave, de, genae"- yao: yao" gaung re qo" khang" genae" qhid' mae" mho" byid: wa,- amung: yao: bam: lam khug: myid jo, genae" we' jhid'de; myid bo genae" qhid' mae" re: mho" byid: wa,.

³Ai we' dakhyo: apyad qi" ra" phyid' mao: qere Khristan phyid' mao: qe: ave, de, genae" qhid' mae" mho" byid: wa,- yao: bam wa gaui mho hab' qe- yhid kha: qe- magai: ngad ngad: ra" khyo re mho" byid: wa,- yao: bam wa gai shab: ra" khyo re ba: mho" byid: mo, ngad ca" ra".

⁴Yao: bam wa yao: bam tho' apyad ngai: ra" myiqe: qere yao: bam: yham sang pho" qere we' zo: dau qere ba: jhid'de; mo,-

⁵yao: yao" gaung re qo" khang" mo,- san sin" mo,- yao: bam: yham sang pho" qe eib: ra" qao: mae ba: na: ra" myi" zang gai qe boe" geshao: gai shab: ra" ja: re mho" byid: ca" ako". Alao" Mao"So: mungdao: re khag' re: gaui mho ta" phoe genae" mangad:.

⁶Ai we' dakhyo: zolau: qere: yao: bam yao" gaung re qo" khang" genae" qhid' mae" jhan: byid: wa,-

⁷ja: khao: ngo" mae naoyao" gaung yao: gai shab: ra" lo, mau" nho: lag boe" ca" ra". Ni" mho" shid' khyo re nhag' lam: din: man" ru we' akhyag qi: to: yang: mho" shid' byid: wa,-

⁸ni" gyevo qe wa ngonhaung" khyo re magai: ru ta" nae" daja: re: maqo" yang: qho' phau: genae" qhid' mae" gai magai ga: maqo" ta" ra" jo: ra" dao: jham re ci yang:- mho" shid' byid: wa,.

⁹Jeim qe wa yao: bam: asang qe: mho dao: re tae" gyo: mung: ja: khao: ngo" mae yao: bam: asang qere ngaui nhao qo: ra". Yao: bam wa jeim asang qere dao: tau: magai: tau: ngad: ako".

¹⁰Mangad: lao" asang qe: zai magai: khug' yu ngad: ra". Airu: kad' nae" atha" yao: bam zaui: so" ra" mau" zo" ja: khao: ngo" mae ngonhaung" khyad' yu: Asang pho" Mao"So: mho" shid' khyo mungdao: re nga: ye; li" nhao nae" qhid' mae" yao: bam khonhae" re: gai shab: ru we' kyid mo, ngad: ra" khyo re qhu" byid' na ca" ako".

¹¹Pe"mung:ga"re Mao"So wa byu alhab' mo, khyad' yu: ru qhug' ra" khyo yao" nhag' myan" ra" jeju re qhu" byid' ava".

¹²Ngonhaung" nho: qi" qhang: ra" Mao"So we' ngonhaung" nho: khyad' yu: ra" Asang Yesu Khristu nho: phungbao bao: thug' li" nae" ra" ngonhaung" myid: lao" na: ra" ai: ngaui lho" Ba Na re ngonhaung" lao" na: au:- Mao"So re malam: ra" kao so' daui khyo re we' mug: myid dao we' sin" ra" kao bau myid o: ra" khyo jham re shapye' pye' mung:- yao: yao" gaung re qo" khang" yang: din: man" ru we' Mao"So: khyo re kao bau taung" ce: mug: myid: dao mae kao so' daui: na nae" qhid' mae" ai: nhag" myan" ra" jeju wa ngonhaung" re mho" shid' byid' na: ra".

¹⁴Yao: wa makhyang" ra" lo, mau" alhab' mae" ngonhaung" re khyad' yu nae" we' ngonhaung" re yao: za: sang: ra" gyang" san: ra" byu jham toe' yu mung:- ai: shab: ra" mau" zo" zaui: so: nae" kao bau: ra" mo, boe" genae" qhid' mae" yao: yao" gaung re ngonhaung" qhid' mae" byid' pye' ra".

¹⁵Ce: khyo jham re mho" byid: wa,- nao qam: byid' ru we' qeim: mho" au:- ni" kheim: so' alhab' re ci wa,- yao: bam mae" khag' dayaug: yang re: nao re daqu" ngai nhao wa,.