Read Maru PHILEMON 1 Bible Online

PHILEMON 1 - Maru bible

PHILEMON 1

¹Yesu Khristu mathao mae kyam: byu ngad: ra" ngo Polu we' naonhaung" mao:nhaung: pho" Thimoti wa- ngonhaung" mau" zaui: cao: ba nam pho" Philemon rere:-

²Philemon: yham mae ham phaung: ra" phung: rere:- ngonhaung" nhae: mo" Aphia rere:- ngonhaung" gyezo: byin cao: Arkhipu rere:- mugsug' tung" vhin: ke' ra".

³Ngonhaung" Pho" Mao"So we' Asang Yesu Khristu wa nhag' myan" ra" jeju we' ngaui pyo: yaug yo: ru naonhaung" re byid: vageshao: wo".

⁴Nga" nhaung: Philemon we"- ngo akyu" mho' khao: ngo" ni" qhid' mae" ngo akyu" bomho' byid: mung: nga" Mao"So re jeju caung:khin" byid' ra".

⁵Pe"mung:ga"re Mao"So: byu alhab' mo, re nao jhid'de; ra" khyo we' Asang Yesu re nao lam khug: ra" khyo re ngo the' gyo" ra".

⁶Lam khug mo, ngad: ra" khyo" nao we' ngonhaung" jho" zam" khug: ru wa Khristu we' dadang: dalam: za: doe, yang: qo" yu: ra" shaman" jeju khao: ngo" re je: no, sho' ba: gyo" li" nhao nae" qhid' mae" ngo akyu" mho' ra".

⁷Jhid'de; ra" nga"nhaung: we"- ni" jhid'de; myid wa ngore gyai qi: sho' ngaui bau: nhao: ru we' qam: qo" nhao: ava". Nao wa Mao"So: byu qe alhab' mo; nhag' lam: rere: bau: nhao: ava".

⁸Ce: khyo mathao mae ngo wa Khristu mae ni" mao:nhaung: dayaug khyo" nao zaui: so: ang: ra" mau" zo" re zaui: so: nae" qhid' mae" mazag mavae nao re amyin" byid: nae" akhang" qo" yaug ngad: ra".

⁹Ngadqere: ana"- Yesu Khristu nho: mathao mae thaung: laung" jo, yaug ngad mung: Khristu Yesu nho: lagyo: dayaug ngad sho' ngadqere: nao re ngo jhid'de; ruyang goe; mho' ke' ru ngad:.

¹⁰Airumung: Khristu khug mae nga" zo: yao: ngad: ra" Onesimu nho: gaung tha" ngo nao re goe; mho' ke' ra". Thaung: laung" na: ra" gyo: mae ngo wa yao" byo we' sin" ra" yao: pho" boe" lo va".

¹¹Yao: wa qhid' phyao: ni" qhid' mae" akyu" mabo yaug boe" lo ngadqere: ana" yao: wa nao we' nga" shid' zo" qhid' mae" akyu" bo: ra" yaug ngad: ava".

¹²Ana" ngo wa yao: re nao jhao" dam: tug' nhao: ke' ra". Yao: we' daga" nga" nhag' lam: re: bocao: bo: lo" ra".

¹³Ngaui Bau" Lau Dao: Gai: mathao mae ngo thaung: laung" na: ra" gyo: mae ni" gaung tha" ngore bao" thaug' byid: nae" qhid' mae" yao: re ngo we' daga" cemae jhui" na nug: ra".

¹⁴Ngadqere: ngo wa nao re deim" zag yang: ngore bao" thaug' byid: nhao nug: ra" myid mabo ngad: ra". Naoyao: myid o: ra" khyo" kad' nae" rure je yang: ngo o: ra". Airumung: ngo wa nao myid mavang" lo:- pe" daja: re: makad' nae".

¹⁵Onesimu wa nao we' khonhae" re: abang mabyid qo" na nae" qhid' mae" nao we' dazab daso' gao" na: ru angad maba.

¹⁶Amung: yao: wa ana" jeim dayaug khyo" za: mangad: lo:ngad: ra". Jeim tho' mae gyai je: ra" yaug ngad: ava". Yao: wa Khristu mae jhid'de; ra" mao:nhaung: pho" ngad: ava". Yao: wa nga" qhid' mae" gyai yao: phug' de; ra" yaug ngad: ra". Yao: wa ni" qhid' mae" jeim dayaug khyo" re:- Asang: khug mae mao:nhaung: dayaug khyo" re:- je yang: phug' de; ra" yaug ngad: li" nae".

¹⁷Airumung: nao wa ngore ni" mau" zaui: cao: dayaug ngad: ra" khyo" myid: jho: ngad: re wa nao ngore tug: yu: ru we' dakhyo:- yao: re dam: lham: tug: yu wa,.

¹⁸Yao: wa nao re daja: ja: shad' yang:- mangad: lao" daja: ja: jhin de, yang: ngad: re wa ai:gu: alhab' ngore vhin la,-

¹⁹ngo Polu yao: ai: jhin re dam: xe' byid: nae" ein: cemae ngoyao" lo; yang yao: tung" ke' ra". (Nao yao: re: jhin de; rure ngo nao re ta" peim: maqo nae".)

²⁰Airumung: nga"nhaung: we"- Asang: nho: myo, nho re tau yang: jeju khyo" airu: kad' byid: la,- Khristu khug mae mao:nhaung: ngad: ra" khyo" ngore bau: nhao la,.

²¹Ngo mho' ru we' dakhyo: nao kad' li" nae" rure myid lam zo" re" ce: mugsug' re tung" ke' ru ngad: ra". Ai: tho' lhao" je yang: nao kad' nae" rure ngo gaigai: yao: ba: ra".

²²Aitho' mago" ngo li" bang" na nae" qhid' mae" qe, daqe, nyhang" jaung: to: byid: la,- pe"mung:ga"re Mao"So wa naonhaung" alhab' mo; akyu" mho' thoe re tae" gyo: byid: mung:- ngore naonhaung" jhao" dam: jhui" tug' lo byid' li" nae" ein: ngo myid: lao" ra".

²³Yesu Khristu mathao mae ngo we' daga" thaung: laung" jo; ra" Epaphra wa nao re au" ke' ra".

²⁴Aimung: nga" mau" vin cao: qe ngad ko" ra" Marku- Aristaku- Dema- Luka bam re: nao re au" ke' ako".

²⁵Asang Yesu Khristu nho: nhag' myan" ra" jeju wa naonhaung" alhab' mo, we' daga" ngad: jo, vashao: wo".