Read Maru HEBRE 1 Bible Online

HEBRE 1 - Maru bible

HEBRE 1

¹Daba: pyad mae Mao"So wa ngonhaung" phug' pho" qere myo: sho' lhang we' khyo aja: ja: mae lapa qe: nhad' dao: thoe khyo" yang dao: jhau: lo: ra".

²Ngadqere: ce: lo" thao" ra" ba na gu: mae wa Mao"So wa yao: zo: khyo" yang ngonhaung" re dao: jhau: ava". Mao"So wa ai: yao: Zo: khyo" yang mug: kin myid kin alhab' re phan" phaug' mung: lo" thao" mae ja: khao: ngo" alhab' re sang: yu nhao nae" qhid' mae" yao: re khyin: san: to" ava".

³Yao: wa Mao"So: phungbao bao: qhui: na: ru we' Mao"So: gaung khyao ave, vin mung: yao" qam: so' bo: ra" dao: thoe: yang mug: kin re zaui" ci: ra". Amung: xao su byu qe: qobo jham re khyad' pye' byid' ra" mau" zo" bin: zaui: thao re yao: wa mug:gaung dao mae qam: bo: thao" ra" Mao"So: lo, yo shad' mae zaung: jo; ra".

⁴Mao"So: yang yao: re byid' to" ra" mang wa- mug: lagyo: qe: mang tho' je: qi" ra" khyo" byid' to" ru we' dakhyo:- yao: Zo: wa mug: lagyo: qe tho' je: qi" ra".

⁵Pe"mung:ga"re Mao"So wa yao" mug: lagyo: qemae" khoyaug rere:- Nao wa nga" Zo: ngad: ra"- ana" ba ngo wa ni" Pho" boe" lo va" ga: re:- ailao" Mao"So wa mug: lagyo: khoyaug rere: Ngo wa yao" yao: pho" boe" nae"- amung: yao: wa nga" Zo: boe" lo: li" nae" ga: re: khonhae" re: mata" qu" ngad: ra".

⁶Ngadqere: Mao"So wa yao" zoqhid' yauggai Zo: re mug:myid dao khyo nhao: ke' nae" au: re- Mao"So: mug: lagyo: qe alhab' yao: re caung:pa" ca"- ga: ta" ra".

⁷Ngadqere: Mug:lagyo: qe: khyo we' sin: yang:- Mao"So wa yao" mug: lagyo: qere la boe" nhao mung: yao" daui daui mo, re myishae boe" nhao: ra" ga: Mao"So ta" ra".

⁸Ngadqere: Yao: Zo" khyo we' sin: yang: Mao"So we"- Ni" mung"dan: wa apyad ato jo; jo; li" nae" wo"- Nao wa nao yao" byu qe: dao mae din: nyang: ra" khyo" eib: ra". Nao wa jo: rure jhid'de; mung: shad' rure nghang" ra".

⁹Airu: mung: Mao"So- ni" Mao"So wa nao re khyin: yu mung: ni" byin cao: qe tho' nao re je: phug' te' mung: ngaui bau" ru nao re byid' ava" ga: Mao"So ta" ra".

¹⁰Amung: Mao"So wa Asang we"- nao wa sao qhid' maqhid mae mug:myid re phan" to: mung: nao yao" lo; yang mug:gaung re phan" to" ra".

¹¹Ai: gu: wa byo; qeim: lo" li" genae"- ngadqere: nao wa dang: jo; li" nae". Ai: gu: alhab' wa mai bau: jham we' dakhyo: qeim" lo" byaug: li" genae".

¹²Nao wa adao: bau: qhang re dang" lham" ru we' dakhyo: aijham re dang" lham" pye' li" nae"- Aijham wa mai bau: re tha" pye' ru we' dakhyo: tha" pye' ru qhug' li" genae". Ngadqere: nao wa khonhae" re: dakhyo: za: ngad: jo, mung: ni" kao so' wa apyad ato khonhae" re: mathao" ngad: ra"- ga: re: ta" ra".

¹³Mao"So wa yao" mug: lagyo: qemae" khoyaug rere: Ni" gyevo qere ni" khyid zab tao" we' dakhyo: ni" khyid qao: mae ngo mato: byid: byid: wa ce: nga" lo, yo shad' mae zaung: jo, wa,- ga: khonhae" re: mata" qu" ngad: ra".

¹⁴Airulao"- mug: lagyo: qe wa pe" ru" mo, ngad: ako" i? Yao: bam wa khyad' yu: ru qhug' yu nae" ra" mo, re bao" thaug' byid: nae" qhid' mae" Mao"So: yang nhao: to" ra" Mao"So re caung da" byid' ra" byo jham ngad: ako".