Read Maru HEBRE 10 Bible Online

HEBRE 10 - Maru bible

HEBRE 10

¹Yuda qe: kham" to" ra" Tarha" wa ai: zai: agyang" jham: nho: azung akhyao we' shab za: jho" dau: ra" khyao dau mangad: ngad: ra"- ai wa joe" lo nae" ra" gai shab: ra" ja: jham: nho: thab thab mung: ra" bao qab za: ngad: ra". Ai: xeim: re yao: za: dazin we' dazin khonhae" re: ngaui" byid: qo: ra". Airumung: kham" to" ra" tarha" wa Mao"So jhao" te' lo: ra" mo, re ai: xeim: jham re ngaui" byid' ra" khyo" yang khoru: qo" jab byang" nhao nae" i?

²Mao"So re caung:pa" ko" ra" mo, wa yao: bam: qobo mae" dang za: kyang" san: pye' byid' ru qhug' vako" ngad: re wa yao: bam wa qobo qo" ga: mamyid: jho lomung: xeim: jham ngaui" byid' ru alhab' rere: thang: pye' gezai ngad: ra".

³Ngadqere: ana"- ai: xeim: jham re ngaui" byid' ru wa dazin we' dazin yao: bam: qobo jham re myid: beim: nhao: ra".

⁴Pe"mung:ga"re nung:jaung lo: jham: sa: we' cad' be, jham: sa: wa qobo jham re maqo" khyad' pye' byid: ngad: ra".

⁵Ce: mathao mae Khristu wa ce: mug:myid dao khyo gyo" li" nae" au:- Yao: wa Mao"So re Nao wa xeim: we' xeim: ngaui" byid' rure ma o ngad: ra" Ngadqere: nao wa nga" qhid' mae" gaung khyao re nyhang" jaung byid' to" ava"-

⁶Gug'nyhug' jham re phan dao mae gaung geim" phad' ngaui" byid' rure re:- qobo khyad' byid' ra" xeim: rere: nao ma o ngad: ra".

⁷Alao" kham" to" ra" Tarha" mugsug' mae nga" khyo re tung" to" ru we' dakhyo: Mao"So we"- Ni" myid o: ra" khyo re zaui: so: nae" ngo cetau mae na: ein: ngo tau: va"- ga: ta" ra".

⁸Sao qhid' mae yao: wa xeim: jham- ngaui" xeim: jham- gug'nyhug' jham re gaung geim" phan dao mae phad' ngaui" ru- qobo khyad' ra" xeim: jham re nao ma o ngad: ra". Cejham re kham" to" ra" Tarha" we' dakhyo:- ngaui" byid: ngad sho' ngadqere: aigu: re nao ma o mangaui ngad: ra"- ga: ta" ra".

⁹Ai: thao re yao: wa Mao"So we"- ni" myid o: ra" khyo re zaui: so: nae" ngo cetau mae na:- ga: ta" ra". Airumung: Mao"So wa daba: mae" xeim: ngaui" byid' ra" khyo axug' alhab' re to" pye' mung: ai: khu mae Khristu nho: xeim: ngaui" byid' ra" khyo re tha" ke' byid' ra".

¹⁰Pe"mung:ga"re Yesu Khristu wa Mao"So yao: re zaui: so: nhao nug: ra" khyo re cao" yang:- yao: yao" gaung re dalhang mae za: bin: kyab' bin sho' xeim: ngaui" byid' ra" khyo" yang ngonhaung" alhab' mo, wa qobo mae" kyang" san: pye' byid' ru qhug' bam va".

¹¹Yuda khinjaung yaug khao: ngo" wa yao:yao" mau" zo" re ba khao: ba ngo" zaui: so: mung: ai: xeim: re yao: za: myo: sho' lhang ngaui" byid' ako". Ngadqere: ai: xeim: jham wa qobo jham re khonhae" re: maqo" khyad' pye' byid: ngad: ako".

¹²Ngadqere: Khristu wa qobo khyad' ra" xeim: re apyad ato gang" tang: jo; ra" xeim: dalam: ngaui" byid' ra". Ai: thao re yao: wa Mao"So: lo, yo shad' mae zaung: jo; ra".

¹³Yao: wa yao" gyevo qere khyid zab tao" khyo" yao" khyid qao: mae Mao"So: yang to: byid' ra" ayo, joe" sho' lao" na: ra".

¹⁴Airumung: yao: wa xeim: dalhang ngaui" byid' ru we' qobo mae" kyang" san: pye' byid: qhug' ra" mo, re apyad ato jab byang" ra" mo, boe" nhao: ra".

¹⁵Alao" Gyang" Lho" Byo re: ngonhaung" re sagse: kham byid' ra".

¹⁶Sao qhid' mae yao: ta" ru wa- Ceru wa joe" lo nae" ra" ayo, mae yao: bam we' ngo to: nae" dao: thang" ngad: ga: Asang ta" ra". Ngo wa yao: bam: nhag' lam: khug mae nga" tarha" ke' byid: mung: ai: tarha" jham re yao: bam: aung khug mae tung" to: byid: nae"- ga: ta" ra".

¹⁷Ai: thao re yao: wa ngo wa yao: bam: qobo jham re we' makhyang" ra" mau" zo" jham re myid: beim: byid: lo nae" mangad:- ga: dam: ta" ra".

¹⁸Airu: qobo khyad' pye' byid' ra" khyo jo, lao" wa- qobo khyad' ra" xeim: re: ngaui" byid: maqo lo:ngad: ra".

¹⁹Airumung: nga" mao:nhaung: qe we"- Yesu shid kham: byid' ra" khyo" yang ngonhaung" wa ai: Gyang" Lho" thao" ra" jo, qo khyo vao ye: nae" galin: gago: loe; beim: ru qo" yu: bam va".

²⁰Yesu wa yao: yao" gaung ngad: ra" qe,kyo pin:lung" yang kao so' daui: ra" khyo asag' ngonhaung" qhid' mae" phung" byid' ava".

²¹Mao"So: yham mae eib: ra" qi" qhang: ra" khinjaung pho" ngonhaung" qo" bam va".

²²Airumung: ngonhaung" wa yao: yao" aung khug mae qobo qo" jho: ra" aung khug nhag' lam: re kyang" san: pye' mung: ngonhaung" gaung khyao re qid gyang" yang cid' san: pye' yang: gyang" phyu: ra" nhag' lam:- gang" tang: ra" lam khug: myid we' Mao"So: qhid' kheim: khyo qui" vao ye: gelang:-

²³Mao"So wa yao" dao:so: re boe" sho' kad' yaug ngad: rure ngonhaung" qo" lam khug yang: ngonhaung" lhang: yu: ra" myid: lao" rure tang za: zaui" zag: ci gelang:-

²⁴Ngonhaung" wa dayaug we' dayaug sho: jho" no mung: yao: cao: jho" bao" thaug' byid' ru we' jhid'de; myid jho" qhu" byid: mung: gai: ra" lo, mau" re zaui: so" na gelang:-

²⁵Yao: cao: daga" lhaung" jho" ham: phaung: ra" khyo re su damyo" to" pye' ko" ru we' dakhyo: ngonhaung" wa mato" pye' lo:- Asang: nho: ba na jhao" li" na va" rure naonhaung" ba vako" ruyang ngonhaung" wa yao: cao: je yang: qam: jho" byid' na gelang:.

²⁶Pe"mung:ga"re ngonhaung" wa ai: dangman" ra" khyo re bin: ba thao thaug qobo shad' lhoe" na: ngad: re wa- ngonhaung" qobo re khyad' pye' byid' ra" xeim: gatau jo, lo nae" mangad:-

²⁷Ngonhaung" wa ai: joe" lo nae" ra" dao: kho' rure we' Mao"So re gye kad' ra" mo, re ngha" jheim" pye' nae" ra" laung: thao" ra" myi: re gyaug: nin" ru we' lao" na nae" za: angad lo" ra".

²⁸Moshe kham" to" ra" Tarha" re maphug' cao" ra" yaug khag' re ngadqere:- sagse: shid' yaug- mangad: lao"- ai: tho' je: ra" sagse: qe ta" thug' mung: qobo qo" rure myao lao" nhag' makhyag' lo: se' pye' ru qhug' ra".

²⁹Airumung: Mao"So: yao: Zo: re pe" xan: masun" ra" yaug- yao: yao" qobo re kyang" san: pye' byid' ra" Mao"So: dao: thang" sa: re phug' mate' ra" yaug- Gyang" Lho" Byo: nho: nhag' myan" ra" jeju re maphug' makhyad' kad' ra" yaug wa khoqhi" la" ra" qobo dae kham zo: man" ra" yaug ngad nae" rure myid: qu" ge,-

³⁰Pe"mung:ga"re ngo wa lage, phaug' byid: nae"- qobo phug' dam: tug' byid: nae" ga: re:- Asang wa yao" byumyu" re dao: kho' li" nae" ga: ta" ra" yaug khag' ngad: rure ngonhaung" ba:.

³¹Kao so' daui: na: ra" Mao"So: lo, khug khyo gyo" vao lo" ru wa gyai gyaug ca" ru ngad: ra".

³²Qhid' phyao: mae" ba na jham mae naonhaung" khoru: boe" lo ko" rure myid: beim: ge,- Lai: lo: ra" ayo, mae naonhaung" wa Mao"So: mug: bo" re bin: qo" kham: yu gemung: ai: thao re qug: khai: dayin dayo: myo: sho' ja: kham zo" lo gengadqere: aseim" mabyid: tang za: ye; lo: ako".

³³Naonhaung" wa su myo: sho' mo; qhid' kheim: mae maphug' makhyad' roe" ru we' gaui: ru qhug' mung: airu: maphug' makhyad' roe" ru we' jung" gaui: ru qhug' lo ko" ra" mo; bo: bode; lo: ra" mo, re: ngad: ako".

³⁴Naonhaung" wa thaung: laung" ra" mo; qhid' mae" sho: bono mung: naonhaung" jo,nho" jham re lhad' yu: ru qhug' ra" au: re ngaui bau: taung" za: zang: kham: pye' ako". Pe"mung:ga"re naonhaung" wa aijham tho' je: gai mung: khonhae" mabaui mabyo; ra" jo,nho" jham re qo" sang: jo, shiko" rure naonhaung" ba geyang: ngad: ra".

³⁵Airumung: naonhaung" qam: dashan ge,- pe"mung:ga"re airu wa naonhaung" re aphug' jhaung qhu" qi: qo" yu nhao: li" nae".

³⁶Mao"So myid o: ra" khyo re zaui: so: nae" we' yao" dao:so: re qo" kham: yu nae" qhid' mae" naonhaung" wa zang: qhao" ra" myid qo: ako".

³⁷Pe"mung:ga"re Jham: Mugsug' mae Dazab zo: lao" joe" li" nae" ra" yaug wa li" nae" ngad: ra". Yao: wa yam" na nae" mangad:-

³⁸Nga" nho: din:man" ra" byu qe kam" wa lam khug mung: daui: na: li" genae". Ngadqere: yao: bam mae" dayaug yaug naung zad: zad' lo" re wa ngo yao: re ngaui nae" mangad:- ga: ta" ra".

³⁹Ngonhaung" wa naung zad: zad' lo" mung: jeim" lo" byaug: ra" mo, mangad:- Lam khug: myid bo mung: khyad' yu: ru qhug' mo, kam" wa ngad: ra".