Read Maru HEBRE 11 Bible Online

HEBRE 11 - Maru bible

HEBRE 11

¹Lam khug: myid bo: ga" ru wa ngonhaung" myid: lao" ra" ja: jham re gaigai: yao: nhag' dag: ru we' maqo" myao: ra" ja: jham re gaigai: yao: ba: to" rure ta" ru ngad: ra".

²Ganhae" mae" byu qe wa yao: bam: lam khug: myid mathao mae Mao"So: yang o ngaui myid vang" byid' rure qo" kham: yu: ako".

³Mamyao: rumae" qo" myao: ra" ja: boe" thug' li" nae" qhid' mae" Mao"So: mungdao" yang mug:kin re phan" to" ru ngad: rure lam khug: ra" khyo" yang ngonhaung" ba: yu: ra".

⁴Lam khug: ruyang Abela wa Ka-in ngaui" byid' ra" xeim: tho' je: gai: ra" xeim: Mao"So re ngaui" byid' ra"- Abela wa yao" lam khug: ru khyo" yang din:man" ra" byu dayaug khyo" Mao"So: yang o ngaui myid vang" byid' rure qo" kham: yu: ra". Pe"mung:ga"re yao" jhaung qhu" re Mao"So: yang khae: yu byid: yang: ngad: ra". Abela wa shid: byaug ngadqere yao" lam khug: ru khyo" yang dao: jhau: na: ashi".

⁵Lam khug: ru khyo" yang Enog wa shid: ru maqhug' lo: adaui phe, Mao"So jhao" to' yu: ru qhug' ra". Mao"So: yang yao: re to' yu: ru ngad yang:- yao: re khag' re: maqo" myao ngad: ako". Mao"So: yang yao: re mato' yu shi" ra" au: re- yao: wa Mao"So ngaui: ra" yaug ngad: ra" ga: Jham: Mugsug' mae ta" to" ra".

⁶Lam khug: myid mabo: ra" yaug khag' ngadqere: Mao"So re maqo" o ngaui nhao ngad: ra". Pe"mung:ga"re Mao"So jhao" qui" lo: ra" yaug khag' ngadqere: Mao"So na: jo; rure we' yao: re qho: na: ra" mo, re jhaung qhu" byid: yaug ngad: rure lam khug ca" ra".

⁷Lam khug: ruyang Noa wa joe" lo nae" ayo, mae" yao: maqo" myao: ra" khyo we' sin: yang: Mao"So: yang ta" peim: byid' ra" dao: re the' gyo" ra". Yao: wa Mao"So: mho dao: re tae" gyo: mung: qid sang pho dalam: zhaug' yang: ai: khug mae yao: we' yao" yham byu qe khyad' yu: ru qhug' ako". Aimung: mug:myid re dao: phyid' ra" au: re yao: wa lam khug: myid khyo" yang din:man" ra" ga: Mao"So: yang sun" yu byid' rure qo" khae: yu: ra".

⁸Abraham wa lam khug: ruyang Mao"So khai: ra" au: mho dao: gyo: mung: Mao"So: yang byid: nae" ga: dao:so: byid' to" ra" mung"dan: khyo thug' ye" lo" ra". Abraham wa yao: khai: ye" lo" nae" rure maba lo: yao: yao" mung"dan: mae" thug' lo" ra".

⁹Lam khug: ru khyo" yang Abraham wa Mao"So: yang yao: re dao:so: byid' to" ra" mung"dan: mae bang" vo dayaug khyo" yena: ra". Yao: wa Mao"So: dao:so: re dakhyo: za: qo" khae: yu: ra". Isag- Yaku we' dakhyo: za: zaung jham: khug mae na: jo; ra".

¹⁰Pe"mung:ga"re Abraham wa Mao"So: yang nyhang" jaung yang: zao: to" ra" gang" tang: ra" apan we' te" to" ra" vogaung: mo" re myid: lao" na: ra".

¹¹Abraham wa gyai mao" byaug: ru we' Sarah re: zo:dau maqo" khau lo: ngadqere:- yao: wa lam khug: ruyang zoshao: yao: pho" boe" lo: ra". Mao"So wa yao" dao:so: re dao:so: zaung yaug ngad: rure yao: lam khug: ra".

¹²Abraham wa sa: sho: khyo" yang yauggai ashid ru: ngadqere: yao: dayaug mae" za: mug:gaung mae" kyi jham we' panglai: qid yae ma dam: mae" matho' nghe' ra" ma coe jham nho" na: je" ra" myid:zo: qe myo" laug: li" ko" ra".

¹³Byu ai: gu: alhab' wa Mao"So re lam khug yang: shid: lo" vako" ra". Yao: bam wa Mao"So: dao:so: byid' to" ra" ja: re maqo" khae: yu ko" ngad: ra". Ngadqere: va: mae" the' myao mung: tug: yu: ako". Yao: bam wa myid gaung dao mae taung bug qe we' phao: khug: na mo, za: ngad: rure de: de: za: lhang: yu: ako".

¹⁴Airu: lhang: yu: ra" mo, wa yao: bam yao: sang: ra" mung"dan: re qho: na mo, ngad: ko" rure de: de: za: myao: ra".

¹⁵Yao: bam to: co' ra" mung"dan: re yao: bam mamyid: beim" na loko" ngad: ra". Yao: bam airu: myid: beim" na yang: ngad: re wa- ai: khyo dam: tug' phao: lo" nae" akho: akhang" yao: bam qo" ako".

¹⁶Ai: atha" yao: bam wa je: gai: ra" mung"dan: ngad: ra" mug:khaung: mung"dan: re nhag' nghae" na: ako". Airumung: Mao"So wa Yao: bam: Mao"So ngad:- ga: mhang" rure maqho' ngad: ako". Pe"mung:ga"re Mao"So wa yao: bam: qhid' mae" vogaung: mo" dalam: nyhang" te" to: byid' ra".

¹⁷Lam khug: ruyang Abraham wa Mao"So yao: re jham" qu" ra" au: yao: zo: Isag re xeim: khyo" Mao"So re ngaui" byid' ra". Abraham wa Mao"So: yang dao:so: byid' to" ra" yaug ngadqere: yao: wa yao" zote: zo: re xeim: khyo" ngaui" byid: nae" jin" jin" ngad: ra".

¹⁸Mao"So wa Abraham re Nao wa Isag khyo" yang myid:zo: qo" li" nae" ga: ta" to" ra".

¹⁹Mao"So wa Isag re shid: rumae" dam: qo" daui: li" nhao yaug ngad: ga: Abraham myid: yu: ra". Airumung: Abraham wa Isag re shid: rumae" dam: qo" khae: yu: ru ngad: ra"- ein: gai: ta" ra".

²⁰Lam khug: ruyang Isag wa joe" lo nae" ayo, qhid' mae" Yaku we' Eso tao re shaman" byid' ra".

²¹Lam khug: ruyang Yaku wa yao: shid qid re Yoseb yao: zo: tao re shaman" byid' ra". Yao: wa yao" zaung: bao" nyaug re nga yang: Mao"So re goe; pa" ra".

²²Lam khug: ruyang Yoseb wa yao: shid: lo" na lao" Israel byu qe Egutu mung" mae" phao: thug' lo" nae" khyo re ta" mung:- yao" mao gaung we' sin: yang: khoru: kad' nae" rure dao: pyang: to: co' ra".

²³Lam khug: ruyang Moshe nho: yao: myhi" yao: pho" tao wa yao: khau thao re lho" mo" sam khye' lam: lam: nyham" to" ako". Moshe wa gyai yaung" ra" zonau" ngad: rure yao: shid' tao myao mung: yao: shid' tao wa kho:kham amyin" dao: re ngag: pye' nae" magyaug ko" ngad: ra".

²⁴Lam khug: ruyang Moshe wa yao: qi" li" lao"- kho:kham myiqe: zo" nho: yauggai zo: ga: mhang" nae" rure ha: pye' ra".

²⁵Yao: wa dazab daso' qobo mae pyo" na nae" tho' Mao"So: byumyu" we' qug: khai: dayin dayo: kham zo: nae" rure je: nug ngaui: ra".

²⁶Meshia qhid' mae" maphug' makhyad' jung" pye' ru qhug' ru wa Egutu mung" mae" jo,nho" alhab' tho' mae je: phug' de; ru ngad: ga: yao: myid: yu: ra". Pe"mung:ga"re yao: wa joe" lo nae" ayo, mae qo" khae: yu nae" ra" jhaung qhu" re nhag' nghae" na yang: ngad: ra".

²⁷Lam khug: ruyang Moshe wa kho: kham pho" nhag' yo" rure magyaug lo: Egutu mung" mae" thug' lo" ra". Yao: wa myo; yang maqo" gai: myao: ra" Mao"So re the' myao: ruru:- dam: tug' lo" nae" khyo re ha: pye' ra".

²⁸Lam khug: ruyang Moshe wa Israel byumyu" qe: zoqhid' yauggai zo: qere Se' ra" Mug: Lagyo" yang mase' pye' nae" qhid' mae" Lai co' Poe re kad' qhid: to: mung: kham: zang jham mae sa: pyi" sheim" te' to: genae" qhid' mae" amyin" byid' ra".

²⁹Lam khug: ruyang Israel byumyu" qe wa ai: Tham: Ne mae taung gaung we' dakhyo: qo" su" lai: lo" ko" ra". Egutu byu qe airu: su" lai: lo" ko" au: yao: bam alhab' re ai: qid: yang myug: pye' ra".

³⁰Lam khug: ruyang Israel byumyu" qe wa Yerikho vogaung: re nhad' ba lam: lam: bin su" gam: gethao re Yerikho vogaung: vang byo; gyang: lo" nhao: ako".

³¹Lam khug: ruyang shava myhi" Rahab wa Israel jin" byu tao re nyang" za: lham: tug: yu: ruyang Mao"So: mho dao: matae" gyo" ra" mo, we' daga" se' pye' ru maqhug' ngad: ra".

³²Ngo xo' ta" qo shinae" i? Gidon- Barag- Samson- Yebtha- Davi- Samuela we' lapa qe: khyo re ta" kyo: nae" qhid' mae" nga" ayo, matho' laug ngad: ra".

³³Lam khug: ru khyo" yang yao: bam wa mung"dan: jham re gyekhe' aung: pye' ako". Din:man" ra" mau" zo" re yao: bam zaui: so: mung: Mao"So byid' to" ra" dao:so: re qo" kham: yu: ako". Yao: bam wa khang khyi nhad' re pyid' pye' ako".

³⁴Laung: thao" ra" myi: re se' pye' ako". Shae: yang se' pye' nae" rumae" loe; beim: ako". Yao: bam wa qam: nang: gengadqere: qam: bo: li" ako". Yao: bam wa gyekhe' rumae gai lo: boe" mung: taung bug mung"dan: gyetab re aung: pye' ako".

³⁵Lam khug: ra" khyo" yang myiqe: qere: shid: byaug vako" ra" yao: bam: ba nam qe kao so' dam: daui: li" rure qo" kham: yu: ako". Gatau damyo" wa loe; beim nae" khyo re makhae: yu lo: ha: pye' gemung: je: gai: ra" kao so' daui khyo re qo" khae: yu nae" qhid' mae" yhin" rure kham zo: mung: shid: lo" ko" ra".

³⁶Damyo" wa jung" gaui: pye' ru we' be; ru qhug' ako". Amung: damyo" wa jao co" yang taui" ru qhug' mung: thaung: khug mae lhaung" to" ru qhug' ako".

³⁷Yao: bam wa laug baui: yang pye' se' ru- sag'qhag' yang shid' dau qhag' phyid' ru- shae: yang se' pye' ru qhug' ako". Yao: bam wa sho: jhin: ru qhug' ru we' yhin" ru- maphug' makhyad' kad' ru qhug' mung: yao qid- cad' be, qid ve, yang: na: qin" ako".

³⁸Mug:myid wa yao: bam we' maman: qi" ngad: ra". Yao: bam wa laug aug' jham mae we' myid khung: jham mae na mung: din"pyad' yo mae we' bug gaung khaung: mae phao: khug: na: qin" mo, we' dakhyo: na: lae" qin" ako".

³⁹Cebam alhab' mo, wa yao: bam: lam khug: ru khyo" Mao"So: yang o ngaui myid vang" byid' rure qo" kham: yu: ako". Ngadqere: yao: bam wa Mao"So byid' to" ra" dao:so: re maqo" khae: yu ko" ngad: ra".

⁴⁰Pe"mung:ga"re Mao"So wa ngonhaung" qhid' mae" je: lhao" re: gai: ru myid: yaung: to" ra" khyo re myid: phyid' to: byid' ava". Yao: myid: yaung: to" ra" khyo wa ngonhaung" we' daga" ngad lao" za: yao: bam wa jab byang" ru qo" yu: li" genae"- ga" ru ngad: ra".