Read Maru HEBRE 12 Bible Online

HEBRE 12 - Maru bible

HEBRE 12

¹Ceru: myo" laug: ra" lam khug: ra" mo; sagse: jham wa ngonhaung" re lhang" kham" to" ra". Airumung: ngonhaung" wa akaung: akag' ru ja: khao: ngo" re we' ngonhaung" mae tang za: kyin" de; jo; ra" qobo re qhid' pye' mung: ngonhaung" qhid' au: mae" bin: zang khyo joe" sho' myid: phyid' pye' yang: tao" ye: gelang:-

²Ngonhaung" lam khug: ru apan aqao: we' athao" ngad: ra" Yesu re ngonhaung" zhaug' qu" to: gelang:- yao: wa pyao: zang: mathao mae qam: mashan ngad: ra". Ai: atha" yao: re lao" na: ra" ngaui bau: ngaui yao: ru: mathao mae- pyao: zang dao mae shid kham: rure aqho' aqhid ngad: ra" khyo" yao: majho lo: shid: kham: mung: ana" yao: wa Mao"So: zaung tao" lo, yo shad' mae zaung: jo; ra".

³Qobo qo" ra" mo; yang gyai nghang" pye' rure yao: khoqhi" dayin dayo: kham zo" lo: rure myid: qu" mung:- naonhaung" qam: dashan- nhag' lam: dathao" ge,-

⁴Pe"mung:ga"re naonhaung" wa qobo we' gye jho" khe' rumae se' pye' ru joe" sho' mathaung" qhug' shiko" ngad: ra".

⁵Ai: tho' mago" Nga" zo: we"- Asang nao re mho" ra" dao: re nyang" za: tae" gyo: wa,- Yao: nao re qeim: ra" au: nhag' lam: dathao" wa,-

⁶Pe"mung:ga"re Asang wa yao: jhid'de; ra" yaug re mho" mung: yao: zo: khyo" khae: yu: ra" yaug re qobo dae byid' ra" ga:- Mao"So wa naonhaung" re yao: zo: qere we' dakhyo: qam: byid: dao: ta" to" rure naonhaung" to" myhid' pye' ko" i?

⁷Naonhaung" qug: khai: kham zo" ru wa yao: pho" qobo dae byid' ru ngad: ra" khyo" zang: kham ge,- naonhaung" qug: khai: kham zo" ru wa Mao"So wa naonhaung" re yao" yao: zo: qere khyo" kad' na: rure ceim" shid' byid' ra". Yao: pho" yang qobo dae mabyid' ra" yauggai zo: khag' na: ra" i?

⁸Yao: zo: qere we' dakhyo: qobo dae byid' ru naonhaung" maqhug' ko" re wa naonhaung" wa yao: zo: agyang" qe mangad:- nin gyid qe ngad: ako".

⁹Ngonhaung" xao su byu: yao: pho" qe wa ngonhaung" re qobo dae byid: mung: ngonhaung" wa yao: bam re phug' myao" ra". Airumung: ngonhaung" wa je yang: byo we' sin" ra" ngonhaung" Pho" qao: mae na mung: kao so' daui: na nae" ang: ra" mangad: i?

¹⁰Ngonhaung" nho: xao su byu: yao: pho" qe wa- dayo, daban: za: yao: bam gai ang: ru we' dakhyo:- ngonhaung" re qobo dae byid' ako". Ngadqere: Mao"So wa yao" Gyang" Lho" rure ngonhaung" qobo khae: yu geshao:- ga: ngonhaung" akyu" qhid' mae" ai: rure kad' ra".

¹¹Ngonhaung" wa qobo dae byid: qhug' ra" au: re mangaui bau:- ai: au: re kaug' ja: khyo" myid: jho: yu ngadqere: airu: qobo dae byid: yang: mho" ru qhug' va" mo, wa- thao re din:man" ra" kao so' ga" ra" ngaui pyo: yaug yo: ra" jhaung qhu" re qo" jham" yu: li" genae".

¹²Myaung: dug: ra" naonhaung" lo, jham re tau: ke' mung: qam: nang" ra" pad' laug jham re qam: bo nhao ge,-

¹³Qeim: ra" khyid wa mapyan" jo, lo: gai: li" nae" qhid' mae" din" ra" khyodang mae xo' yang: su" ye" lo" ge,-

¹⁴Yaug khao: ngo" we' yaug yo za: qo" na nae" qhid' mae" qam: ke' ge,- Gyang" lho" ra" khyo" kao so' qo" daui nae" qhid' mae" qam: ke' ge,- pe"mung:ga"re airu: kao so' madaui lo: khag' re: Asang re maqhug' myao genae"-

¹⁵Mao"So: nhag' myan" ra" jeju mae" maphaug' lo" nae" qhid' mae" lha" ge,- Kho" ra" agae wa yaug: qi" li" mung: yao" daug: yang qug: khai: myo: sho' re boe" nhao: ru we' dakhyo: khag' re: airu: maboe" nae" qhid' mae" lha" ge,-

¹⁶Zoqhid' aya: re zo damyo: we' za: tha" aung: zo" pye' ra" Eso we' dakhyo: shad' nghung" ru we' Mao"So re magyaug maphug' ra" yaug khag' re: maboe" nae" qhid' mae" lha" ge,-

¹⁷Ai: thao Eso wa yao: pho" yang shaman" byid' rure khae: yu nug: rure naonhaung" ba: ako". Ngadqere: maqo" khae: yu ngad: ra". Pe"mung:ga"re yao: kad' lai: lo: ra" lo, mau" re lhai" pye' nae" khyo re ngug byid ngug nhe' we' khyo qho ngadqere: maqhug' loyang: ngad: ra".

¹⁸Naonhaung" wa Israel byumyu" qe we' dakhyo: lo; yang qo" the' tin" ra" myi: nga" na: ru we' no, sang: kyid mug: cad' cad' jo, mung: la qam" we' labo" mad thoe myang mung:-

¹⁹Thoe hug' na: ra" Sina bam khyo joe" qu" mo, mangad: ko" ngad; ra". Mo, byu qe wa ai: thoe re the' gyo: gelao" ai: thoe re madam: the' gyo: nae" qhid' mae" Moshe re mho' yao: ako".

²⁰Pe"mung:ga"re yao: bam wa gug'nyhug' re lhao" re:- ai: bam re the' tin: lao" wa laug baui: yang pye' se' ca"- ga" ra" amyin" dao: re maqo" kham geyang: ngad: ako".

²¹Ai: myao jao: wa gyai qu" gyaug sho' ru ngad mung: Moshe lhao" re: Ngo wa gyaug: nin" pye' va"- ga: ta" ra".

²²Ai: atha" naonhaung" wa Ziun bam we' kao so' daui: na: ra" Mao"So: vogaung: mo" ngad: ra" mug: lagyo: qe tug tig ajham ataung na: ra" mug:gaung mae" Yerusalem khyo joe" na: ako".

²³Naonhaung" wa mug:gaung dao mae" japhin: mae bo: ra" Mao"So: zoqhid' qe ngaui bau: ngaui yao ham: phaung: na ko" ra" jo, qo mae joe" na: ako". Naonhaung" wa byu alhab' mo; nho: dao: kho' zug: ngad: ra" Mao"So jhao" re: qo mabo jab byang" vako" ra" byugai qenho: byo jham jhao" re: joe" na: ako".

²⁴Amung: naonhaung" wa dao: thang" asag' re nyhang" jaung: to: byid' ra" Yesu jhao" re:- Abela nho: sa" yang byid' ra" tho' je: gai: ra" ja: jham re pakham: kham: byid' ra" pyi" sheim" ra" sa: khyo re: joe" na: ako".

²⁵Airumung: naonhaung" wa ai: mungdao: ta" ra" yaug re tae" gyo: nae" ha: pye' ra" mo, maboe" genae" qhid' mae" lha" ge,- Myidgaung dao mae Mao"So: mungdao: re ta" ra" yaug: dao: re tae" gyo: nae" ha: pye' ko" ra" mo, wa maloe, ko" ngad: ra". Airumung: ngonhaung" wa mug:gaung mae" ta" ra" yaug re nhaung thao" phaug' pye' ngad: re wa je yang: maqo" loe, nae" mangad: i?

²⁶Ai: ayo, re Mao"So: thoe wa myidgaung re laui" nin" nhao: ra". Ngadqere: ana" Mao"So wa Ngo wa ana" dalhang myidgaung reza: mangad:- mug:gaung rere: laui" nin" li" nhao shinae"- ga: dao:so: to" ra".

²⁷Amung: dalhang dam:- ga" ra" dao: kheim: wa maqo" laui" nin" ra" ja: jham wa dang: jo, nae" qhid' mae" ai: phan" to" ra" ja: jham wa laui" nin" ru qhug' mung:- yu: pye' ru qhug' li" nae"- ga" ru ngad: ra".

²⁸Airumung: maqo" laui" nin" ra" mung"dan: re ngonhaung" qo" kham: yu: bam va" ruyang Mao"So: jeju re caung:khin" gelang:- ngonhaung" wa jeju beim: so: mung: gyaug phug' ru we' Mao"So re o ngaui nhao: ra" lo, mau" khyo" caung:pa" byid: gelang:-

²⁹Pe"mung:ga"re ngonhaung" nho: Mao"So wa nga" jeim" lo" nhao: ra" myi: yao: ngad: ra".