Read Maru HEBRE 13 Bible Online

HEBRE 13 - Maru bible

HEBRE 13

¹Khristan mao:nhaung: qe ngad: ru we' dakhyo: khonhae" re: naonhaung" yao: cao: jho" jhid'de; na ge,-

²Naonhaung" yham mae bang" vo qere bang" da" byid: nae" dato" myhid' ge,- Airu: bang" da" byid' ra" mo, damyo" wa mabeim: maso: lo: mug: lagyo: qere bang" qhug' da" byid' ako".

³Naonhaung" wa thaung: laung" jo; ra" mo, we' daga" thaung: bolaung" jo; ra" khyo" myid: yu mung: thaung: khug mae laung" jo; ra" mo, re myid: beim: ge,- naonhaung" yao: re: bokham zo" ra" khyo" myid: yu mung: qug: khai: kham zo" na: ra" mo, re myid: beim: ge,-

⁴Byu yaug khao: ngo" lo, xo' rure phug' te' qo: ra". Yham sang pho" we' yham sang myhi" wa dayaug we' dayaug yao: cao: dao:so: dang ca" ra". Mao"So wa shad' nghung" ra" mo, we' myi: lao shad' ra" mo, re dao: kho' li" nae".

⁵Ngaui qhang re dajhid'de, ge,- naonhaung" qo" ra" gu: re nhag' dag: na ge,- pe"mung:ga"re Mao"So wa Ngo wa naonhaung" re khonhae" re: mato: co' nae"- ngo wa naonhaung" re khonhae" re: mashapye' nae" ga: ta" to" ra".

⁶Aimung: Asang wa ngore bao" thaug' yaug ngad: ra". Ngo wa gyaug nae" mangad:- Ngo re khag' pe" qo" kad' nae" i? ein: ngonhaung" wa mazag mavae ta" gelang:-

⁷Naonhaung" re Mao"So: mungdao: ta" kyo" lo ko" ra" qhid' phyao: mae" naonhaung" au: jhaung qere myid: beim: ge,- yao: bam khoru: kao so' daui: lo ko" rure we' khoru: shid: lo" byaug ko" ra" khyo re dam: tug' myid: qu" mung:- yao: bam: lam khug: ra" khyo re lag qu" yu ge,-

⁸Yesu Khristu wa ayenhe' ana" ba apyad ato dakhyo: za: ngad: jo; ra".

⁹Mho" shid' ra" khyo abang" aja: ja" yang ai: jo: ra" khyo mae" naonhaung" re dajhui" nghung" lo" nhao ge,- Zo: ve jham we' sin" ra" kham" to" ra" Tarha" jham re phug' cao" ra" khyo" yang mangad: lo: Mao"So: nhag' myan" ra" jeju mae" aung khug nhag' lam: qam: o: qo" kham: yu nae" ru wa gai: ra". Ai: kham" to" ra" Tarha" re phug' cao" ra" mo, wa akyu" maqo" kham: yu ko" ngad: ra".

¹⁰Yuda qe: caung:pa" ra" jo, qo mae caung da" byid: ko" ra" khinjaung qe wa ngonhaung" nho: phan dao mae" pe" xeim: rere: zo: nae" akhang" maqo" ngad: ra".

¹¹Yuda khinjaung yin" wa gug'nyhug' jham: sa: re qobo khyad' ra" xeim: khyo" Gyang" Lho" thao" ra" jo, qo khyo civao ye" ra". Ngadqere: ai: xeim: mao gaung jham re wa jamu taung gaung shad' mae ngha" pye' ako".

¹²Ce: khyo mathao mae Yesu re: yao: yao" sa" yang xao su byu qe: qobo kyang" san: pye' byid: nae" qhid' mae" vogaung: taung gaung shad' mae shid kham: ra".

¹³Airumung: jamu taung gaung shad' yao: jhao" thug' ye: mung: yao: kham zo" ra" qho' phyo' rure yebokham zo: gelang:-

¹⁴Pe"mung:ga"re ce: myidgaung dao mae ngonhaung" qhid' mae" mabaui mabyo; ra" vogaung: majo, ngad: ra". Ngonhaung" wa ai: joe" lo nae" ra" vogaung: re qho: na: bam:-

¹⁵Airumung: naonhaung" wa Yesu re ngonhaung" nho: Asang khyo" lhang: yu: ra" nhad' yang jeju caung:khin" ra" xeim: re Yesu khyo" yang Mao"So re khonhae" re: xeim: ngaui" byid' na gelang:-

¹⁶Gai: ra" mau" zo" zaui: so: nae" we' naonhaung" yao: cao: jho" bao" thaug' byid' ra" khyo re dato" myhid' ge,- pe"mung:ga"re ai: ngaui" xeim: jham wa Mao"So o ngaui: ra" ngaui" xeim: jham ngad: ra".

¹⁷Naonhaung" nho: au: jhaung qe: dao: re tae" gyo: mung: yao: bam ta" ru we' dakhyo: kad' cao" ge,- yao: bam wa yao: bam yao: zaui: so" ra" mau" zo" qhid' mae" japhin: qhu" byid: nae" mo, ngad ko" ruyang naonhaung" yaug nhag' lam: re abang mabyid mathang qu" gun caung: na: ako". Yao: bam: mho dao: re naonhaung" tae" gyo: ko" ngad: re wa yao: bam wa mau" zo" re ngaui bau: za: zaui: so" li" genae". Airu: mangad: re wa yao: bam wa mau" zo" re kaug' ru we' zaui" li" genae"- ailao"wa naonhaung" qhid' mae" pe" akyu" bo nae" mangad: ngad: ra".

¹⁸Ngonhaung" qhid' mae" khonhae" re: akyu" bao" mho' byid' na gela,- ngonhaung" nho: aung khug nhag' lam: wa gyang: gyang: za: ngad: rure ngonhaung" ba: ra". Pe"mung:ga"re yo, khyin: khao: ngo" ngonhaung" wa jo: ra" khyo" kad' nae" o nug yang: ngad: ra".

¹⁹Mataung" myao" re Mao"So wa ngore naonhaung" jhao" dam: tug' nhao: ke' nae" qhid' mae" akyu" bao" mho' byid: gela,- ein: ngo wa naonhaung" re qam: ke' yang: mho' ke' ra".

²⁰Ngaui" xeim: khyo" yao: shid kham yang: apyad ato: nho: dao: thang" re dazid thaung" te' ra" khyo" yang yao kyaung" jham: nho: Yao Zam: Aqi: ngad: ra" ngonhaung" Asang Yesu re Mao"So wa shid: rumae" dam: daui: to" li" nhao: ava".

²¹Ngaui pyo: yaug yo: ra" Mao"So wa yao" myid o: ra" khyo re qo" zaui: so: nae" qhid' mae" ngonhaung" qo ca" ra" gai shab: ra" ja: alhab' naonhaung" re byid: vashao:- amung: Yesu Khristu khyo" yang yao" myid o ngaui: ra" khyo" ngonhaung" mae zaui: so: vashao:- Khristu wa apyad ato phungbao qab qi" qhang: jo, vashao: wo"- Amen.

²²Nga" mao:nhaung: qe we"- ce: qam: byid: mungdao: re zang: kham yang: tae" gyo" yu genae" qhid' mae" naonhaung" re ngo mho' ra". Pe"mung:ga"re ngo naonhaung" re tung" ke' ra" ce: vhin tung" wa gyai maqhang ngad: ra".

²³Ngonhaung" mao:nhaung: pho" Timothi wa thaung: mae" loe; thug' lo" byaug va" rure naonhaung" re ngo ba nhao nug: ra". Yao: phyad za: ngojhao" joe" lo:ngad: re wa ngo naonhaung" re li" qhug' ra" au: re ngo we' daga" yao: re jhui" li" nae".

²⁴Naonhaung" au: jhaung alhab' mo, re we' Mao"So: byu qe alhab' re ngonhaung" au" ke' ra" khyo ta" kyo: byid: gela,- Itali mung" mae" mao:nhaung: qere: naonhaung" re au" ke' ako".

²⁵Mao"So: nhag' myan" ra" jeju wa naonhaung" alhab' mo, we' daga" ngad: jo, vashao: wo".