Read Maru HEBRE 4 Bible Online

HEBRE 4 - Maru bible

HEBRE 4

¹Ana" ai: dugno: re naonhaung" qo" kham: yu nae" qhid' mae" Mao"So wa naonhaung" re dao:so: byid' to" ava". Airumung: naonhaung" dayaug re: dao:so: byid' to" ra" ai: dugno: re qo" kham: yu nae" rure mazai" lhag' ke' nae" qhid' mae" ngonhaung" lha" gelang:-

²Pe"mung:ga"re ngonhaung" wa yao: bam we' dakhyo: ai: Lau Dao: Gai re the' gyo" yu: bam va". Yao: bam wa ai: mungdao: re the' gyo" yu gengadqere: ai: mungdao: re lam khug: ra" myid we' malham: khae: yu gemung: ai: mungdao: wa yao: bam: qhid' mae" pe" akyu" mabo ngad: ra".

³Aire lam" ra" mo, ngonhaung" wa Mao"So: dao:so: byid' to" ra" ai: dugno: re qo" kham: yu: bam va". Airu wa Ngo wa nhag' yo: mung: yao: bam wa dug no" yu genae" qhid' mae" ngo byid: nae" ein: dao:so: byid' to" ra" mung" khyo khonhae" re: qo" vao ye: genae" mangad: ein: ta" ru we' dakhyo: ngad: ra". Yao: wa mug:myid re phan" ra" au: re yao" mau" zo" re bin: zaui: ngadqere: Mao"So wa cedao: re ta" ra".

⁴Pe"mung:ga"re Jham: Mugsug' datau mae ai: nhad' ba ein: ba we' sin: yang: Mao"So wa nhad' ba ein: ba re yao" mau" zo" alhab' re to" pye' yang: no" na: ra"- ga: ta" to" ra"-

⁵Yao: bam dug no" na genae" qhid' mae" ngo byid' ra" mung"dan: khyo khonhae" re: qo" vao ye: genae" mangad:- ga: ce: khyo re yao: dam: ta" na: ra".

⁶Lau Dao: Gai re sao qhid' the' gyo" yu: ra" mo, wa aire malam" ko" ruyang ai: dugno: re maqo" kham: yu ko" ngad: ra". Airumung: ai: dugno: re qo" kham: yu nae" Mao"So: yang akhang" byid' ra" mo, gaje qe qo" kham: yu: ako".

⁷Ceru wa ana" ba ga: mhang" ra" gatau daba na re Mao"So jaung: to: byid' ra" khyo" yang qhu" byid' ra". Jham: Mugsug' mae ngha yang: ta" va" ru we' dakhyo:- Mao"So wa zin na myo: sho' kyo thao re Davi nhad' dao: thoe khyo" ai: ba na re ceim: yang- Naonhaung" ana" ba Mao"So: dao: thoe re the' gyo: ko" ngad: re wa nhag' lam: daqao ge, ga: ta" ra".

⁸Mao"So dao:so: byid' to" ra" dug no" ra" khyo re Yoshu yang byu qere byid' to: va" ngad: re Mao"So wa thao re gatau ba na daba na: nho: khyo re ta" nae" mangad:-

⁹Ngadqere: nhad' ba ein: ba mae Mao"So wa dugno: thang: na: ru we' dakhyo: Mao"So: byu qe: qhid' mae" Dugno: Ba na daba jo; ashi".

¹⁰Pe"mung:ga"re Mao"So: yang dao:so: byid' to" ra" ai: dugno: re qo" kham: yu: ra" yaug khag' ngadqere: Mao"So wa yao" mau" zo" mae" dugno: thang: na: ru we' dakhyo: yao" mau" zo" mae" dugno: thang: na: li" nae".

¹¹Airumung: yao: bam lam khug: myid mabo: ruyang shid: dam" lo" ko" ru we' dakhyo: ngonhaung" mae" dayaug re: maboe" vashao:- ngonhaung" wa ai: dugno: re qo" kham: yu nae" qhid' mae" qam: bo: thao" qhi" qhao: gelang:-

¹²Mao"So: dao: thoe wa daui: na: ru we' kad' boe" ra" qam: so' bo mung:- shae su: shid' shad' geim" tho' ra" pe" ja" shae tho' re: je: tho' ra". Amung: alo zo: we' byo jho" qham: ra" mae joe" sho' re:- shoqug: shoqae we' qug:khyao jho" qham: rumae joe" sho' re:-alhab' re qo" thug' kyao" lai: lo" ra". Byu: aung khug nhag' lam: mae myid: ru we' o kao bau: rure kin byid' ra".

¹³Mao"So: qhid' kheim: mae mamyao losho' pe" ja: rere: maqo" nyham" to: ngad: ra". Phan" to" ra" gu: ja: khao: ngo" wa yao" myo, kheim: mae de: de: za: ngad: jo; ra". Ngonhaung" alhab' wa yao: yao" khyo we' sin: yang: Mao"So re japhin: qhaug' byid: ca" nae" ngad: ra".

¹⁴Airumung: ngonhaung" wa ngonhaung" yao: lhang: yu: ra" ai: lam khug: ra" khyo re tang tang zaui" zag: ci gelang:- pe"mung:ga"re ngonhaung" wa Mao"So: qhid' kheim: khyo joe" vao lo" ra" Mao"So: yao: zo: Yesu ga" ra" qi" qhang: ra" Khinjaung Yin" dayaug qo" bam va".

¹⁵Ngonhaung" nho: Khinjaung Yin" wa ngonhaung" qam: nang" rure nhag' maba: khyag' yaug mangad:- Ja: khao: ngo" mae ngonhaung" re" ru: ju" phyo' ru qhug' qu" yaug ngadqere: qobo maqo" ra" Khinjaung Yin" ngonhaung" qo" bam va".

¹⁶Airumung: ngonhaung" vae" vae" za: Mao"So: nhag' myan" ra" tao" khau" khyo qui" vao ye: gelang:- ailao" ngonhaung" qo ca" ra" au: ngonhaung" re bao" thaug' byid: nae" nhag' khyag' shogu: ru we' nhag' myan" ra" jeju re ngonhaung" qo" khae: yu: li" nae" ngad: ra".