Read Maru HEBRE 5 Bible Online

HEBRE 5 - Maru bible

HEBRE 5

¹Byu mae" khyin: yu: ra" Khinjaung Yin" yaug khao: ngo wa yao" byin cao: qemae" khyin: yu: ru ngad: ra". Ngaui" xeim: jham we' qobo khyad' xeim: re ngaui" byid: nae" qhid' mae" xao su byu qe: gaung tha" Mao"So re caung da" byid: nae" khyin: san: to" ra" yaug ngad: ra".

²Yao: yao: re: myo: sho' ja: mae qam: nang: yaug ngad: ruyang yao: wa nhag' cad' noyaug mung mo, we' shad' nghung" ra" mo; qhid' mae" ba: bomyid byid' ra".

³Yao: yao: re: qam: nang: yaug ngad: ruyang qobo khyad' xeim: re mo, byu qe: qobo qhid' mae" za: mangad:- yao" qobo: qhid' mae" re: qobo khyad' xeim: ngaui" byid: qo: ra".

⁴Khag' re: yao: yao" gaung re Khinjaung Yin" aya: maqo" san: yu ngad: ra". Mao"So wa Arun re Mao"So: khinjaung yin" aya: mae khyin: san: yu: ru we' dakhyo:- Mao"So: yang khyin: yu: ra" yaug za: Khinjaung Yin" gai: boe" ra".

⁵Ai we' dakhyo: Khristu wa Khinjaung Yin" aya: mang re yao: yao: za: kai" yu: ru mangad: ngad: ra". Ai: atha" Mao"So wa yao: re- Nao wa nga" Zo: ngad: ra"- Ana" ba ngo wa ni" Pho" boe" lo va"- ga: re:-

⁶Yao: wa gatau jham: dau dalam: mae re:- Nao wa Melkhizedeg nho: khu mae xo' zaui: nae" ra" apyad ato: khinjaung yin" ngad: li" nae"- ga: re: ta" to" ra".

⁷Yesu wa mug:myid dao mae kao so' daui: na shi" ra" au:- yao: re shid: rumae" qo" khyad' yu: ra" Mao"So re mho' yao mung: ngug byid ngug nhe' we' akyu" gyi: hug' mho' ra". Mao"So wa yao" akyu" mho' thoe re tae" gyo: byid' ra". Pe"mung:ga"re yao: wa nhag' lam: nyham: khyo" ru we' Mao"So re gyaug phug' ruyang tae" gyo: byid' ra".

⁸Yao: wa Mao"So: yao: Zo: lhao" re ngad sho' ngadqere: qug: khai: dayin dayo: re kham zo" ra" khyo" yang Mao"So: mho dao: re ba: tae" gyo: nae" zhao: yu: ra".

⁹Amung: yao: wa jab byang" yaug boe" lo lao"- yao" mho dao: re tae" gyo" ra" byu alhab' mo; qhid' mae" apyad ato: khyad' yu: ra" Asang boe" lo: ra".

¹⁰Ailao" Mao"So wa yao: re Melkhizedeg khu mae xo' zaui: nae" Khinjaung Yin" ga: mang mhang" ta" hau: byid' ra".

¹¹Melkhizedeg khyo we' sin: yang: ngonhaung" ta" nae" khyo myo: sho' jo; ra". Ngadqere: naonhaung" wa phyad za: ba: gyo: mo, mangad: ko" ruyang naonhaung" re ta" sho' kyo: nae" qhid' mae" qug' ra".

¹²Ayo, khyo" tau" ke' re naonhaung" wa mho" pho" qe boe" gai yo, ngad: avako". Ngadqere: naonhaung" wa Mao"So: mungdao: mae" sao qhid' zhao: yu ca" ra" khyo re lhao" re: dayaug yaug: yang naonhaung" re mho" byid: qo: ashiko". Qao: ra" zo:ve zo: nae" atha" naonhaung" wa nug' shaug' ca" shi" mo, za: boe" na: ako".

¹³Nug' shaug' shi" ra" yaug wa zonau" ngad: ashi"- jo: ru we' shad' rure ba: kho' kin nae" qhid' mae" thaung" qhug' qu" ru maqo" shi" ra" yaug ngad: ra".

¹⁴Ngadqere: qao: ra" zo:ve wa zoqao" qe: qhid' mae" ngad: ra". Yao: bam wa myid: qu" ra" khyo mae min: mo, ngad geyang: gai: ru we' magai: rure qo" ba: kho' yu mo, ngad: ako".