Read Maru HEBRE 7 Bible Online

HEBRE 7 - Maru bible

HEBRE 7

¹Ce: Melkhizedeg wa Salem kho: kham ngad mung: Myhao: Thao" Ra" Mao"So: Khinjaung pho" ngad: ra". Abraham wa kho:kham byid yaug re gyekhe' aung: pye' yang: dam: tug' phao: lo: ra" au: re Melkhizedeg wa yao: re tug: yu mung: shaman" byid' ra".

²Alao" Abraham wa yao: sham" lo: ra" lanyab alhab' mae" daxe bam mae" dabam re yao: re qhaug' byid' ra". (Melkhizedeg nho: sao qhid' mae" mang lajheim: wa din:man" ra" kho:kham ga" ru ngad: ra". Amung: Salem: vogaung: mae" kho:kham re: ngad: ruyang yao" mang wa yaug yo: ra" kho:kham ga" rure: ngad: ra".)

³Melkhizedeg nho: yao: myhi" yao: pho"- yao" phug' pho" qe: byuxag' tung" xam: re:- yao: khau: li" ru we' yao: shid: ra" khyo tung" xam: re: pe" majo, ngad: ra". Yao: wa Mao"So: yao: Zo: re"ru:- apyad ato: Khinjaung boe" jo; ra".

⁴Airumung: yao: wa khoqhi" qi" qhang yaug ngad: rure naonhaung" qu" ge,- Lahau: qi" ra" ngonhaung" phug' pho" Abraham wa gyekhe' jao: mae" yao: qo" sham" yu: ra" lanyab alhab' mae" daxe bam mae" dabam yao: re qhaug' byid' ra".

⁵Israel amyu" wa Abraham mae" myhung: li" mo, ngad mung: khinjaung Levi amyu" nho: mao:nhaung: amyu" qeza: ngad gesho' ngadqere: khinjaung aya: qo" yu ko" ra" Levi kaung mae" myid:zo: qe wa daxe bam mae" dabam alu: re yao: bam mae" gaug zo: nae" qhid' mae" Tarha" khyo" yang amyin" byid' to" ra".

⁶Melkhizedeg' wa Levi kaung mae" gyo" li" yaug mangad: ngadqere: Abraham mae" daxe bam mae" dabam alu: re kham: yu mung: Mao"So: dao:so: re qo" kham: yu: ra" yaug ngad: ra" Abraham re shaman" byid' ra".

⁷Airumung: shaman" byid' ra" yaug wa shaman" byid' ru kham: yu: ra" yaug tho' je: qi: yaug ngad: rure pe" aug' o: nae" khyo majo, ngad: ra".

⁸Khinjaung qe: mau" mae daxe bam mae" dabam re shid ba: ra" xao su byu qekhyo" gaug: yu: ru ngad: ra". Ngadqere: Jham: Mugsug' mae tung" to" ru we' dakhyo:- Melkhizedeg nho: khyo mae daxe bam mae" dabam re kao so' daui: na yaug khyo" gaug: yu: ra".

⁹Ceru: re: gai: ta" ra". Daxe bam mae" dabam re gaug yu: ra" Levi yao: yao: re: Abraham khyo" yang daxe bam mae" dabam re byid' ru ngad: ra".

¹⁰Pe"mung:ga"re Abraham we' Melkhizedeg jho" qhug' ko" ra" au: re Levi wa makhau: li" shi: ngadqere: yao" phug' pho" Abraham nho: gaung khyao khug mae bo: jo; ein: gai: ta" ra".

¹¹Israel byumyu" qere tarha" byid' ru wa Levi khinjaung qere aqao: to: yang: byid' ru ngad: ra". Levi khinjaung re wa yao: bam: mau" zo" re mashad' lo: kyab' sho' zaui: vako" ru ngad: re wa Arun nho: khinjaung aya: agu khyo" mangad: lo: Melkhizedeg nho: khu mae xo' zaui" ra" khinjaung gatau dayaug po" thug' li" maca" lo:ngad: ra".

¹²Pe"mung:ga"re khinjaung amyu" kaung re tha" pye' lao" wa ai: tarha" rere: tha" pye' ca" ra".

¹³Ceru: ta" to: qhug' ra" yaug ngonhaung" Asang wa gatau: amyu" kaung mae bobo yaug ngad mung: yao" amyu" kaung mae" khag' re: khinjaung mau" mazaui" qu" ngad: ako".

¹⁴Yao: wa Yuda amyu" kaung mae" khau: li" yaug ngad: ru wa de: de: za: ngad: ra". Moshe wa khinjaung aya: we' sin: yang: ta" ra" au: ce: amyu" kaung re pe" re: mata" ngad: ra".

¹⁵Melkhizedeg we' dau: ra" khinjaung gatau dayaug po" thug' li" va" rumung: khinjaung amyu" kaung tha" va" ra" khyo wa je: lhao" re: de: de: za: ngad: ra".

¹⁶Yao: wa ai: khinjaung aya: re xao su byu qe: thung" tarha" khyo" yang kham: yu: ru mangad:- Mathao" magan: ra" kao so' qam: o: khyo" yang kham: yu: to" ru ngad: ra".

¹⁷Pe"mung:ga"re Jham: Mugsug' mae nao wa Melkhizedeg khu mae xo' zaui" ra" apyad ato: khinjaung ngad: li" nae"- ga: ta" to" ra".

¹⁸Airumung: kham" to" ra" tarha" xug' wa qam: nang" ru we' akyu" mabo: ruyang to" pye' ru qhug' ra".

¹⁹Pe"mung:ga"re Moshe Tarha" wa pe" rere: bin sho' maqo" jab byang" nhao ngad: ra". Amung: ngonhaung" wa ana"- je: gai: ra" myid: lao" khyo re the' yu va" rumung: ai: myid: lao" ru khyo" yang Mao"So jhao" qui" te' ye" bam va".

²⁰Aitho' mago" Mao"So: dao: thang" jham tang" ra" dao: re: jo; ra". Gaje qere khinjaung aya: jaung byid' ra" au:- airu" dao: thang" jham tang" ru majo, ngad: ra".

²¹Ngadqere: Yesu re khinjaung khyo" san: to" ra" au: re- Mao"So wa yao: re- Nao wa apyad ato: khinjaung ngad: li" nae"- ga: Asang wa jham tang" to" ava". Asang wa yao" myid re lhai" pye' nae" mangad:- ga: ta" ra".

²²Ceru: jho" shai" ruyang Yesu wa je: gai: ra" dao: thang" re pakham: kham: byid: yaug ngad: ra".

²³Alao" gatau jho" shai" ru daja: jo; ashi"- ai wa khinjaung qe wa shid: rure maqo" lai geyang: yao: bam: khinjaung mau" zo" re maqo" xo' zaui: ko" ngad: ra". Amung: khinjaung gatau myo: sho' na qo: ra".

²⁴Ngadqere: Yesu wa apyad ato kao so' daui: na yaug ngad: ruyang yao" khinjaung aya: wa gatau dayaug: lo, khyo malai: lo" lo:ngad: ra".

²⁵Airumung: yao: wa yao: khyo" yang Mao"So jhao" vao lo ko" ra" mo, re ayo, maqho lo: qo" khyad' yu byid' ra". Pe"mung:ga"re yao: wa ai bam: qhid' mae" Mao"So re mho' yao byid: nae" apyad ato kao so' daui: na yaug ngad: ra".

²⁶Airumung: Yesu wa ngonhaung" nho: qo ca" ra" khyo re qo" bao" thaug' byid' ra" Khinjaung Yin" ngad: ra". Yao: wa gyang" lho" ru we' qobo mho qo mabo: ra" yaug ngad: ra". Yao: wa qobo qo" ra" mo, mae" gatau san san kho' to: qhug' mung: mug:gaung mae khin" to' to: qhug' yaug ngad: ra".

²⁷Yesu wa khinjaung qi: qe gatau we' dakhyo:- ba khao: ngo" yao: yao" qobo qhid' mae" shi" sao qhid' xeim: ngaui" byid: maqo yaug ngad: ra". Yao: wa yao: yao" gaung re qhaug' byid' pye' ra" au: re dalhang: dae mae za: bin sho' qhid' mae" xeim: ngaui" byid' ava".

²⁸Moshe tarha" wa majab byang" ra" byu qere khinjaung agyi qekhyo" san: to" ra". Ngadqere: ai: kham" to" ra" tarha" thao mae Mao"So jham tang" to" ra" dao:so: wa apyad ato jab byang" jo; ra" yao: Zo: re khinjaung qi: khyo" san: to" ra".