Read Maru HEBRE 8 Bible Online

HEBRE 8 - Maru bible

HEBRE 8

¹Ngonhaung" ta" lo: ra" dao: alhab' gu: mae" je: akhyag: ra" ajhaung wa- ngonhaung" wa airu" Khinjaung Yin" re qo" ra" mo, ngad: ra". Yao: wa mug:gaung dao mae phung qab bao qi" qhang: ra" Mao"So: zaung tao" lo, yo shad' mae zaung: jo, yaug ngad: ra".

²Yao: wa byu: yang mangad:- Mao"So: yang kad' to" ra" ai: zaung agyang" khug mae" gyang" lho" thao" ra" jo, qo mae Khinjaung Yin" dayaug khyo" caung da" byid' na: ra".

³Khinjaung Yin" yaug khao: ngo" wa Mao"So re xeim: jham we' gug'nyhug' xeim: jham re phad' ngaui" byid: nae" qhid' mae" san: to: qhug' yaug ngad: ra". Airumung: ngonhaung" nho: khinjaung yin" yaug mae re: ngaui" byid: nae" xeim: ngaui" daja: ja: qo" ca" ra".

⁴Yao: myidgaung dao mae qe na: jo; ngad: re wa yao: wa khinjaung yin" dayaug dajhid' re: gai: boe" nae" mangad:- pe"mung:ga"re Yuda Tarha" khyo" yang jhaung qhu" xeim: jham re ngaui" byid: nae" qhid' mae" khinjaung qe na: bam geyang: ngad: ra".

⁵Khinjaung qe zaui: so" ra" lo, mau" jham wa mug:gaung dao mae boe" na: ra" khyo: nho: lho dau we' bao qab za: ngad: ra". Airu wa Moshe kad' lo: ru we' dakhyo: za: ngad: ra". Moshe wa ai: dao: thang" Zaung re kad' nae" seim" ra" au:- Mao"So wa- bam dao mae Nao re ngo qhu" byid' ra" akhyao we' dakhyo:- ja: khao: ngo" re kad' nae" qhid' mae" lha" yang: kad' wa,- ga: yao: re ta" ra".

⁶Ngadqere: ana" wa- je: gai: ra" Mao"So: dao:so: jham: dao: mae aqao: kad' yang: Mao"So we' xao su byu qe: agyo: mae Yesu nyhang" jaung byid' ra" dao: thang" wa je: gai: ru ngad: ru we' dakhyo:- khinjaung khyo" Yesu caung da" ra" mau" zo" wa ai: khinjaung qe caung da" byid' ra" mau" zo" tho' je: gai: ra".

⁷Sao qhid' mae" dao: thang" mae pe" qo mabo ngad: re wa dao: thang" shid' lam: ein: lam: to: nae" khyo majo, ngad: ra".

⁸Ngadqere: Mao"So wa yao" byu qere qobo vhin yang: ta" ru wa- Israel amyu"- Yuda amyu" qe we'- ngo dao: thang" asag' to: nae" ba na joe" lo: li" nae".

⁹Ai: dao: thang" wa yao: bam: phug' pho" qere lo; yang she mung: Egutu mung" mae" ngo jhui" thug' lo: ra" au: re yao: bam we' ngo to" ra" dao: thang" we' dau nae" mangad:- Yao: bam wa ngo we' yao: bam: agyo: mae to" ra" ai: dao: thang" re jhaug' mazaug geyang: ngo wa yao: bam re to" pye' va"- ga: ta" ra".

¹⁰Mao"So wa joe" lo nae" ba na mae Israel amyu" qe we' ngo to: nae" ra" dao: thang" wa nga" tarha" re yao: bam: aung khug nhag' lam: mae ngo ke' byid: nae". Yao: bam: nhag' lam: mae tung" te' to: byid: nae". Ngo wa yao: bam: Mao"So boe" lo: li" nae". Amung: yao: bam wa nga" byumyu" qe boe" lo: li" genae".

¹¹Yao: bam mae" dayaug re: yao: yao" byumyu" yao: cao: re ngad ngad- yao: yao" kaung mae" mao:nhaung: qere ngad ngad Asang re ba wa,- ga: mho" byid: qo nae" mangad:- Pe"mung:ga"re yao: bam wa ngai: thao" yaug mae" qi" thao" yaug joe" sho' ngore ba: li" genae".

¹²Ngo wa yao: bam: qobo jham re khyad' pye' byid: mung: yao: bam: shad' nghung" rure xam" to: byid: lo nae" mangad:- ga: ta" ra".

¹³Mao"So wa ai: dao: thang" asag' khyo re ta" ra" khyo" yang sao qhid' mae" dao: thang" lam: re axug' boe" lo" nhao: ra". Xug' lo" byaug: ra" ja: pe" ngadqere: dazab re baui" lo" byaug: li" nae".