Read Maru HEBRE 9 Bible Online

HEBRE 9 - Maru bible

HEBRE 9

¹Sao qhid' mae" dao: thang" re phug' cao" nae" qhid' mae" caung:pa" thung" li we' byu: yang kad' to" ra" caung:pa" nae" jo, qo re: jo; ra".

²Gyang" Lho" ra" jo, qo ga: mang: ra" zaung sao qhid' mae" qe, kad' ca" ra". Ai: qe, mae myikaug' tao" we' Mao"So re qhaug' byid' to" ra" mug jaung: re to" ako".

³Ai: shid' lam: ein: ra" qe,kyo pin:lung: nhaung thao" mae" qe, re wa Gyang" Lho" Thao" Ra" Qe, ga: mhang" ako".

⁴Ai: qe, mae wa sheim nae pyo" ra" xau ngha" ra" qhang phan we' alhab' qhang: yang thab' to" ra" dao: thang" ban" jo; ra". Ai: ban" khug mae Manna mug ke' to" ra" qhang yae:- anyaug tad' ra" Arun nho: zaung: bao" we' kham" to" ra" amyin" dao: jham tung" to" ra" laug pye: shid' pye: bo: ra".

⁵Ai: ban" dao mae kherubin alho shid' lam: de; ra". Ai: kherubin wa Mao"So na: jo; ga" ra" lajheim: ngad: ra". Kherubin daung jham wa qobo khyad' pye' ra" jo, qo dao mae mug' nghoe' jo; ako". Ngadqere: ana" ce wa cejham: lajheim: re adai: ato' sho' kyo: nae" ayo, mangad: ngad: ra".

⁶Ai: gu: re bin: nyhang" jaung: to: lao"- khinjaung qe wa yao: bam: caung da" byid' ra" mau" zo" re zaui: so: nae" qhid' mae" ba khao: ngo" ai: zaung sao qhid' mae" qe, khyo vao ye" ako".

⁷Ngadqere: zaung shid' qe, ein: qe, akhug qe, khyo wa khinjaung yin" yao: dayaug za: yao: yao" qobo qhid' mae" we' mo,byu qe maba mabeim: lo: shad' lhoe" ko" ra" qobo qhid' mae" ngaui" byid: nae" sa: ci yang: dazin re dalhang za: qo" vao ye" ra".

⁸Zaung sao qhid' mae" qe, ajo, jo, wa ai: gyang" lho" thao" ra" zaung akhug qe, khyo vao ye: nae" qhid' mae" khyo pyid' jo; rure ai: Gyang" Lho" Byo wa de: de: za: mho" shid' byid' ra".

⁹Ceru wa ana" pyad re ceim" shid' na: ra" alho dalam: ngad: ra". Mao"So re xeim: ngaui" we' gug'nyhug' ngaui" xeim: re ngaui" byid' ru wa caung:pa" ra" mo; nhag' lam: re jab byang" sho' maqo" kad' byid: ngad: ra".

¹⁰Pe"mung:ga"re aijham wa zo: shaug' yang cid' san: pye' ra" thung" tarha" agin akhyao aja: aja: we' sin" ru ngad: ra". Ai: gu: alhab' wa adao shad' we' sin" ra" thung" li jham ngad mung: Mao"So wa ja: khao: ngo" re asag' kad' pye' nae" ra" ayo, joe" sho' gai: ci: ra" thung" tarha" ngad: ra".

¹¹Ngadqere: Yesu wa cemae jo, gau ngad: ra" gai lho" ra" ja: jham: nho: Khinjaung Yin" khyo" joe" li" ava". Yao: caung da" mau" zo" zaui: so" na: ra" zaung wa je: qi" qhang mung: jab byang" ru ngad: ra". Ai: zaung wa byu: lo; yang kad' ra" zaung mangad:- ce: phan" to" ra" mug:myid we' masin: ngad: ra".

¹²Yesu wa Gyang" Lho" Thao" Ra" Jo, Qo khyo dalhang mae za: alhab' bin: kyab' sho' vao ye" ra" au: re xeim: ngaui" byid: nae" yao: wa cad' be, sa:- nung: jaung sa: re ci yang: mavao ye: ngad: ra". Yao: wa yao" sa: re ci yang: vao ye: mung: ngonhaung" qhid' mae" apyad ato khyad' yu: ru qo" byid' ra".

¹³Cad' be, sa:- nung: jaung lo: sa: we' nung: jaung bae: myimhab re caung:pa" thung" khyo" masan: ra" mo; dao mae pyi" sheim: byid: lao" caung:pa" thung" masan: rure ceyang gyang" san: lo" nhao: ra".

¹⁴Ceru dang: ngad: re wa Yesu sa" yang wa khoqhi" je yang: kyang" san: pye' nhao nae" i? Yao: wa apyad ato: Byo khyo" yang yao: yao" gaung re qo mabo jab byang" ra" xeim: khyo" Mao"So re xeim: ngaui" byid' ava". Kao so' daui: na: ra" Mao"So re ngonhaung" qo" caung da" byid: nae" qhid' mae" yao" sa: wa akyu" mabo: ra" caung:pa" thung" yang moe: jo; ra" ngonhaung" aung khug nhag' lam: re kyang" san: pye' nhao: li" nae".

¹⁵Airumung: Mao"So: yang khai: yu qhug' vako" ra" mo, wa Mao"So dao:so: byid' to" ra" apyad ato: shaman" jeju re qo" kham: yu genae" qhid' mae" Khristu wa ai: dao: thang" asag' re nyhang" jaung byid: yaug ngad: ra". Ceru: qo" kad' ru wa sao qhid' mae" dao: thang" jo; jo, shi" au: yao: bam shad' lhoe" ra" qobo jham mae" lhoe' ke' byid: nae" qhid' mae" byu dayaug shid va" ruyang ngad: ra".

¹⁶Ma qhaug' mugsug' jao dang boe" nae" qhid' mae" ma qhaug' mugsug' tung" ra" yaug wa gaigai: shid va" ga" rure sagse: qhu" byid: qo: ra".

¹⁷Pe"mung:ga"re ma qhaug' mugsug' tung" ra" yaug kao so' daui: na shi" au: re- ai: ma qhaug' mugsug' wa jao dang magai: yu ngad: ra". Airu wa yao: shid thao re za: jao dang gai: yu: ra".

¹⁸Airumung: ai: sao qhid' mae" dao: thang" lhao" re: sa: ci: ra" khyo" yang za: jao dang boe" ra".

¹⁹Sao qhid' Moshe wa ai: kham" to" ra" tarha" mae bo: ru we' dakhyo: amyin" dao: jham alhab' re mo, byu qere ta" kyo" ra". Ai: thao re Moshe wa yao mug' ane te' ra" Husub kyao re ci yang: nung: jaung lo: sa:- cad' be, sa: re qid we' lhag' yu mung: ai: tarha" mugsug' paug' dao mae re:- mo, byu qe alhab' mo; dao mae re: pyi" sin: byid' ra".

²⁰Alao" Moshe wa ceru wa Mao"So: yang naonhaung" re phug' cao" genae" qhid' mae" amyin" byid' to" ra" dao: thang" re dazid thaung" te' to" ra" sa: ngad: ra"- ga: ta" ra".

²¹Ai we' dakhyo: Moshe wa ai: caung:pa" Zaung rere: caung:pa" rumae ci: ra" zai ja: cao jab alhab' dao mae re:- ai: sa: re pyi" sin" ra".

²²Kham" to" ra" Tarha" we' dakhyo: alaug ja: khao: ngo" ein nae" gu: wa sa" yang kyang" san: pye' ru qhug' ako"- Sa: sheim: gyo" lao" za: qobo khyad' byid' ru gai: qhug' ra".

²³Cekhyo" yang mug:khaung dao mae jo; ra" ja: jham: nho: lho dau jham re qo" kyang" san: pye' ra". Ngadqere: mug:khaung dao mae" zai jham re kyang" san: pye' nae" ru je: gai: ra" xeim: re ngaui" byid: qo: ra".

²⁴Pe"mung:ga"re Khristu wa ai: gyang" lho" ra" jo, qo agyang" nho: lho dau ngad: ra" byu: lo; yang kad' to" ra" Gyang" Lho" ra" jo, qo khyo mavao ye: ngad: ra". Yao: wa mug:gaung dao khyo khyao- vao ye: mung: ngonhaung" gaung tha" ana" Mao"So: qhid' kheim: mae yena: qhu" ra".

²⁵Yuda khinjaung yin" wa gug'nyhug' sa: re ci yang: Gyang" Lho" Thao" ra" jo, qo khyo zin khao: zin ngo" vao ye: qo: ra". Ngadqere: Khristu wa yao" gaung re airu: xeim: ngaui" byid: nae" qhid' mae" myo: sho' lhang mavao ye: ngad: ra".

²⁶Yao: airu: vao ye" ngad: re wa mug:myid re Mao"So phan" to" ra" au: mae" ga" re yao: wa myo: sho' lhang qug: khai: dayin dayo: kham zo: qo nae" ngad: ra". Ai: atha" ana" wa pyad ban: thao" lo" nae" jhao" li" na lao" yao: yao" gaung re xeim: ngaui" ngaui" byid' ra" khyo" yang qobo re yu: pye' nae" qhid' mae" yao: wa dalhang za: po" thug' li" ava".

²⁷Byu yaug khao: ngo" wa dalhang za: shid ca" mung: ai: thao re Mao"So: yang dao: kho' ru qhug' ra".

²⁸Ai we' dakhyo:- Khristu re: byu myo: sho' mo; nho: qobo khyad' pye' byid: nae" qhid' mae" yao: yao" gaung re dalhang za: xeim: ngaui" ngaui" byid' ra". Amung: yao: wa qobo re yu: pye' nae" qhid' mae" mangad: lo:- yao: re lao" na ko" ra" mo, re khyad' yu nae" qhid' mae" shid' lhang ein: lhang de" thug' li" nae" ngad: ra".