Read Maru YAKU 2 Bible Online

YAKU 2 - Maru bible

YAKU 2

¹Nga" mao:nhaung: qe we"- Phungbao: Asang ngad: ra" ngonhaung" Asang Yesu Khristu re lam khug: ra" mo, ngad: ru we' dakhyo: naonhaung" wa yao: bam: adao: pyae myo, nho re qu" yang: byu qere magai: zam" khug ngad: ra".

²Jo,nho" qo" ra" yaug wa naonhaung" ham phaung khyo qhang lo, pin: pin" ci- mai gai bau: gai ve, yang: li" mung: myaung sho" ra" yaug re: mai jad: bau: jad: ve, yang: joe" li" ein gelang:-

³Naonhaung" wa ai: mai gai bau: gai ve, yaug re phug' myao: taung" lham: tug: yu yang:- ce: gai: thao" ra" zaung tao" mae zaung wa,- ga: yao: re ta" mung:- myaung sho" ra" yaug re wa- thoe: tau mae ye; jo, wa,- mangad: lao"- ce: ngonhaung" khyid thao mae zaung wa,-- ein: ta" ngad: re wa-

⁴naonhaung" wa- naonhaung" yao" phaung gaung: mae jho" kho' ra" qobo qo" mung: makhyang" ra" myid ave, mae aqao: apan to: yang: dao: phyid' ru ngad: ako".

⁵Nga" jhid'de; ra" mao:nhaung: qe we"- tae" gyo: ge,- lam khug: rumae qo" mo, boe" nhao nae" qhid' mae" we' yao: re jhid'de; ra" mo, re byid: nae" dao:so: byid' to" ra" ai: mung"dan: re qo" sang: yu genae" qhid' mae" Mao"So wa ce: mug: myid dao mae" myaung sho" ra" mo, re khyin: yu: ra".

⁶Ngadqere: naonhaung" wa myaung sho" ra" mo, re maphug' makhyad' kad' genhaung i? Naonhaung" re deim" zag zo" ra" yaug we' tarha" zug: qe: qhid' kheim: khyo naonhaung" re she: khyad' ye: yaug wa khag' ngad: ra" i? Aiwa jo,nho" qo" yaug ngad: ra".

⁷Yao: bam wa naonhaung" re mhang" byid' to" ra" ai: mang yaung" mang gai re jung" gaui dao: ta" mo, ngad: ako".

⁸Nao yao" gaung re jhid'de; ru we' dakhyo:- ni" yham kyo: cao: re jhid'de; wa- ga: jham: mugsug' mae bo: ra". Ai: mung"dan: ra" tarha" re naonhaung" phug' cao" ko" ru ngad: re wa naonhaung" wa jo ang: ra" khyo" kad' mo, ngad: li" genae".

⁹Ngadqere: naonhaung" wa byu qere yao: bam: adao: pyae myo,nho re qu" yang: zam" khug ko" re wa naonhaung" wa qobo shad' lhoe" ra" mo, ngad mung: ai: kham" to" ra" Tarha" wa Tarha" shad' lhoe" mo, ngad: ra" khyo" naonhaung" re dao: phyid' li" nae".

¹⁰Kham" to" ra" amyin" dao: daja: re shad' lhoe" ra" yaug khag' ngadqere: alhab' re shad' lhoe" ra" qobo qo" ra" yaug ngad: ra".

¹¹Pe"mung:ga"re su: myi: lao dashad'- ga: ta" ra" yaug yao: byu dase'- ga: re: ta" to" ra". Nao wa su: myi: lao re mashad' sho' ngadqere: byu se' ra" qobo shad' lhoe" yang: ngad: re wa nao wa ai: kham" to" ra" Tarha" re shad' lhoe" ra" yaug ngad: ra".

¹²Ngonhaung" re lhoe' ke' byid' ra" ai: Tarha" yang dao: kho' nae" mo, ngad: ru we' dakhyo: dao: jhau mung: lo, mau" kad' ge,-

¹³pe"mung:ga" re Mao"So wa nhag' khyag' shogu: myid mabo: ra" yaug re yao: dao: kho' ra" au:- nhag' khyag' shogu: myid qhu" byid' nae" mangad: ngad; ra". Ngadqere: nhag' khyag' shogu: ru wa dao: kho' rure aung: pye' ra".

¹⁴Nga" mao:nhaung: qe we"- byu dayaug yaug yao: wa lam khug: myid bo:- ga: ta" ngadqere: aire yao" lo, mau" khyo" sagse: maqhu" byid: ngad: re wa pe" akyu" bo nae" i? Ai: lam khug: myid wa yao: re qo" khyad' yu nae" i?

¹⁵Ve,mai ve,bau: we' zo:ve moe; kyo" na: ra" mao:nhaung: mangad: lao"- nhae: mo" jham na: ein gelang:-

¹⁶Naonhaung" wa yao: bam re Mao"So naonhaung" re shaman" byid: vashao:- lam lam za: na ge,- gyi: gyi: zo: ge, ga: ta" mung: kao so' daui: rumae qo ca" ra" ja: yao: bam re mabyid: ko" ngad: re wa pe" akyu" bo nae" i?

¹⁷Lam khug: rumae re: airu: ngad: ra". Lo, mau" mabo: ra" lam khug: myid wa ashid ngad: ra".

¹⁸Ngadqere: dayaug yaug wa- byu dayaug mae wa lam khug: myid bo mung gatau dayaug wa lo, mau" bo: ra" ga: ta" li" genae". Alao" ngo wa- lo, mau" mabo lo: lam khug: myid gai: qo" bo: rure ngore qhu" byid: la,- ngo wa nga" lo, mau" khyo" nga" lam khug: myid nao re qhu" byid: nae" ein: phaug' tau: nae".

¹⁹Mao"So date: za: ngad: rure nao lam" i? Gai va"- Min: yui jham re: airu: lam" mung: gyaug: nin" na: ako".

²⁰Byugo we"- Lo, mau" mabo: ra" lam khug: myid wa akeim ngad: rure nao ba nug: i?

²¹Ngonhaung" phug' pho" Abraham wa Mao"So: yang din:man" ra" ga: khoru: sun" yu byid: qhug' ra" i? Yao" yauggai zo: Isag re phan dao mae xeim: qhaug' byid: lao"- yao" lo, mau" khyo" yang airu: sun" yu byid: qhug' ru ngad: ra".

²²Yao" lam khug: myid we' yao" lo,mau" wa daga" za: mau" kad' ra". Yao" lam khug: myid wa yao" lo,mau" khyo" yang jab byang" lo: rure nao mamyao i?

²³Amung: Abraham wa Mao"So re lam khug: ra". Yao" lam khug: myid mathao: yang Mao"So wa yao: re din:man" ra" yaug khyo" khae: yu byid' ra" ga: ta" to" ra" Jham: Dao: wa jab byang" lo: ra". Airumung: Abraham wa Mao"So: ba nam pho"- ga: mhang" byid' ru qhug' ra".

²⁴Airu: ngad mung: byu re Mao"So: qhid' kheim: mae din:man: nhao: ru wa yao" lam khug: myid khyo" yang za: mangad:- yao" lo, mau" khyo" yang ngad: rure naonhaung" ba: ako".

²⁵Shava myhi" Rahab khyo re: ai we' dakhyo: ngad: ra". Israel byumyu" jin" byu qere lham: tug: yu mung: khyo gakhe' khyo" phao: loe; lo" genae" qhid' mae" yao: bam re bao" thaug' byid: mung: yao" lo,mau" khyo" yang Mao"So: yang din:man" ra" ga: sun" yu byid' ru qhug' ra".

²⁶Airumung: gaung khyao mae byo mabo re wa ashid ngad: ru we' dakhyo:- lam khug: myid mae re: lo,mau" mabo: ra" lam khug myid wa ashid ngad: ra".