Read Maru YAKU 3 Bible Online

YAKU 3 - Maru bible

YAKU 3

¹Nga" mao:nhaung: qe we"- naonhaung" mae" myo: sho' mo, mho" pho" daboe" ge,- naonhaung" ba: ru we' dakhyo: ngonhaung" mho" pho" qe wa su gaje qe tho' je: thin: ra" khyo" dao: kho' ru qhug' nae" ngad: ra".

²Ngonhaung" alhab' mo, wa dazab: makyo shad' ba: ra" mo, ngad: ra". Ngadqere: dao: jhau: rumae khonhae" re: mashad' ra" yaug wa jab byang" ra" yaug ngad mung: yao" gaung geim" re qo" khang" ra" yaug ngad: ra".

³Ngonhaung" mho dao: re gyo: nhao nae" qhid' mae" ngonhaung" wa myao: nhad' mae nhad' kho' ke' byid: mung: ngonhaung" ye: nhao nug: ra" jo, qo khyo qo" ye: nhao: ra".

⁴Mangad: lao" qid sang pho re myid: qu" ge,- ai qhi" qi" ra" qid sang pho wa qam: thin: ra" la qam" yang hug' tao" lhau: au: gyai ngai: ra" lha gau: je, khao" yang qo" khang" mung: lha khang" yaug myid o: ra" shad' khyo qo" gau" lo" ra".

⁵Sho re: airu: ngad: ra"- ai wa ngai ngadqere: qi" qhang: ra" khyo jham re qo" ta" phug: ra". Danyhan: za" ra" myi: daje; yang khoqhi" mo" ra" sag mo" yo re khoru: qo" nga" pye' rure myid: beim: ge,-

⁶amung: sho wa myi: we' dau: ra". Ai: sho wa shad' nghung" ra" mug:myid ngad mung: airu wa ngonhaung" nho: gaung dau dalam: khyo" de; jo, yang: ngonhaung" gaung geim" khyo" yang makhyang" ru byo: sin" lo" nhao: ra". Myi qid tham: mae" te' yu: ra" myi" yang ai: sho wa ngonhaung" nho: pyad geim" re ngha" pye' byid' ra".

⁷Byu wa gatau: gug'nyhug' ngad ko" ra" gug'nyhug' kyao jham- ngo: jham- yoe" lhau: ra" ja: jham we' ngho' jham alhab' re qo" mhai" yu mung: alhab' re mhai" to" avako".

⁸Ngadqere: sho re wa khag' re: maqo" mhai" yu ngad: ako". Ai: sho wa makhyang" ru we' matho' qo" khang" mung: shid nhao: ra" daug byang" sho' bo: jo; ra".

⁹Ngonhaung" wa ai: sho: yang ngonhaung" Asang Pho" Mao"So re jeju caung:khin" mung: Mao"So: khyao we' dakhyo: za: phan" to" ra" ngonhaung" byu yao: cao: rere: ai: sho: yang yao: nhang" ra".

¹⁰Nhad' danhad' mae" za: jeju caung:khin" dao: jham we' nhang: dao: jham thug' li" ra". Nga" mao:nhaung: qe we" Ceru: magai: boe" nhao ngad: ra".

¹¹Qid thug' dadung: mae" za: qid cug we' qid kho: mayug: thug' li" ngad: ra".

¹²Nga" mao:nhaung: qe we" pho' ham" gae wa zhanlun shi: magai: zaui: ngad: ra". sabyi bye, re: pho' ham" shi: magai: zaui: ngad: ra". Ai we' dakhyo: xongae qid wa qid cug magai: boe" ngad: ra".

¹³Naonhaung" phaung gaung: mae pha,jhi" we' laba lajhao ba yaug khag' na ko" i? Yao: wa yao" pha,jhi" ba: ra" khyo re gai: ra" kao so' daui khyo khyo" yang re:- nhag' lam: nyham: khyo" ru we' nyan: pha,jhi" ba: ra" ave, lo, mau" khyo" yang kad' thug' ke' ra" yao" gai: ra" mau" yang re: sagse: qhu" byid: vashao:-

¹⁴Ngadqere: naonhaung" aung khug mae myid nug' ru- nhag' lam: no: jo; ru- yao: yao" qhid' mae" za: myid: ru bo: jo, yang: ngad: re wa pha,jhi" ba phug: ra" khyo" yang dangman" rure qobo dashad' ge,.

¹⁵Airu" ra" pha,jhi" wa mug:gaung mae" gyo" li" ru mangad:- Mug:myid dao: pha,jhi"- Byo we' sin" ra" pha,jhi" mangad: lo:- Satan" nho: pha,jhi" ngad: ra".

¹⁶Myid nug' ra" myid we' yao" qhid' mae" za: myid: ra" jo, qo mae mavang" manyang: ru we' makhyang" ru ja: khao: ngo" re: bo: jo; ra".

¹⁷Ngadqere: mug: tho' mae" pha,jhi" wa azhao sao qhid' mae wa gyang" san: ru ngad: ra". Aiwa ngaui pyo: yaug yo: ru- nau" nhae" ru we' jho" vang" jho" nge; ru jham rere: boe" nhao: ra". Airu wa jhid'de; nhag' khyag' myid byang" jo, mung: gai: ra" lo, mau" ga" ra" ashi: jham re zaui" thug' li" nhao: ra". Ai: pha,jhi" wa myo,nho khyin: ru we' geim kad' rure yu: pye' byid' ra".

¹⁸Mang: dae tae" ra" mo, ngaui pyo: yaug yo za: qho" ke' ra" ashi: jham mae" zaui" li" nhao: ra" ashi: jham wa gai: shab: ra" lo, mau" jham ngad: ra".