Read Maru YAKU 4 Bible Online

YAKU 4 - Maru bible

YAKU 4

¹Naonhaung" phaung mae myan" myo: jho" byo; ru we' jho" khe' jho" zin" ru khai: mae" boe" thug' li" ra" i? Aijham wa naonhaung" khug mae" abang mabyid lhau: na: ra" naonhaung" gaung sho: pyo: khyo qhid' mae" kao bau myid o: ra" myid mae" boe" thug' li" ru ngad: ra".

²Naonhaung" wa zai jham o gengadqere: ai: zai jham re maqo" yu ko" ngad: ra". Amung: byu se' nae" jin" jin" ngad: ako"- naonhaung" wa zai jham re gyai myid: o kao bau gengadqere: aijham re naonhaung" maqo" yu ko" ngad: ra". Airu: mung: naonhaung" myan" myo: jho" byo; ako". Naonhaung" o: ra" ja: re naonhaung" maqo" yu ko" ru wa ai: qhid' mae" Mao"So re naonhaung" mamho' geyang: ngad: ako".

³Naonhaung" mho' yao gengadqere: naonhaung" aire maqo" khae: yu ko" ngad: ra". Pe"mung:ga"re naonhaung" myid: yaung: ra" khyo magai yang: ngad: ra". Naonhaung" wa naonhaung" yao" gaung sho: pyo: khyo mae ci nae" qhid' mae" ai: zai jham re mho' ako".

⁴Nhag' lam: mazaung" ra" mo, we"- Mug:myid we' ba nam kad' ra" yaug wa Mao"So: gyevo ngad rure naonhaung" maba ko" i? Mug:myid we' ba nam kad' nug: ra" yaug khag' ngadqere: yao: yao" gaung re Mao"So: gyevo boe" nhao: ra".

⁵Ngonhaung" khug mae Mao"So ke' to: byid' ra" Byo wa gyai xo sho' kao bau myid o: ru we' byang" jo; ra" ga" ra" jham: dao: wa akeim ngad: ein: dajho ge,.

⁶Ngadqere: Mao"So byid' ra" nhag' myan" ra" jeju wa je yang: qam: bo: ra". Jham: mugsug' mae- Mao"So wa ngad beim: mo, re ngag: tam" pye' mung: nyham: khyo" ra" mo, re kam" wa nhag' myan" ra" jeju byid' ra"- ga: ta" ru we' dakhyo: ngad: ra".

⁷Airumung: Mao"So eib: ra" qao: mae na: ge,- aimung: Satan re thaug' ngho' ge,- yao: wa naonhaung" mae" phao: lo" li" nae".

⁸Mao"So jhao" te' ye: ge,- ailao" Mao"So wa naonhaung" jhao" te' lo: li" nae". Qobo kad' ra" mo, we"- naonhaung" lo, re cid' pye' ge,- geim kad' mo, we"- naonhaung" aung khug nhag' lam re san sin" nhao: ge,-

⁹nhag' kaug' nhag' yao mung ge,- gyi: ngug ge,- naonhaung" qi thoe re ngug thoe- naonhaung" bau" rure nhag' kaug' nhag' ngai: ru shad' khyo phaug' pye' ge,-

¹⁰Asang: qhid' kheim: mae naonhaung" yao" gaung re nyham: khyo" pye' ge,- ailao" yao: wa naonhaung" re tau: to' ke' li" nae".

¹¹Nga" mao:nhaung: qe we"- naonhaung" yao: cao: gaui dajho" mho ge, Khristan mao:nhaung: pho" re gaui mho: ra" yaug- mangad: lao" dao: kho' ra" yaug- khag' ngadqere: ai: kham" to" ra" Tarha" re gaui mho mung: dao: kho' yaug ngad: ra". Ai: kham" to" Tarha" re nao dao: kho' yang: ngad: re wa- nao wa ai: kham" to" ra" Tarha" re phug' cao" yaug mangad: lo:- aire dao: kho' yaug ngad: ra".

¹²Mao"So dayaug za: Tarha" byid: yaug ngad mung: dao: kho' yaug ngad: ra". Yao: dayaug za: qo" khyad' yu yaug we' qo" se' tam" pye' yaug ngad: ra". Ni" mao:nhaung: pho" re dao: kho' yaug nao wa khag' ngad: ein: myid: i?

¹³Ana" ba- mangad: lao" ne, mo" ba vogaung: dalam: lam: khyo ye: mung: ai: mae dazin yena mung: phaga: yekad' yang: ngaui qhang myo: sho' yeqho gelang: ga: ta" ra" mo, we"- ngo ta" rure tae" gyo: ge,-

¹⁴Naonhaung" wa ne, mo" ba naonhaung" kao so' pe" boe" nae" ru lhao" re: maba ko" ngad: ra". Naonhaung" wa dazab za: thug' li" mung: dam: byaug: lo" ra" ngaui" we' dau: ako".

¹⁵Asang myid o: ngad: re ngonhaung" wa kao so' daui: na mung: ceru: mangad: lao" thoeru: kad' nae" ngad: ra" ga: kam" wa naonhaung" ta" ang: ako".

¹⁶Ngadqere: ana" naonhaung" wa ngad beim: gemung: phug: ako". Airu" ra" phug: ta" ru alhab' wa shad' ru ngad: ra".

¹⁷Airumung: gai: ra" mau" zo" kad' ang: rure yao: yao: ba gau makad' ra" yaug wa qobo qo" ra".