Read Maru YAKU 5 Bible Online

YAKU 5 - Maru bible

YAKU 5

¹Ana" jo,nho" qo" mo, we"- ngo ta" ra" dao: re tae" gyo" yu ge,- naonhaung" dao mae joe" li" na: ra" khyag' qhui qug: khai: ru qhid' mae" ngug byid ngug nhe' we' kaug' ngug: na ge,-

²Naonhaung" jo,nho" jham wa baui" lo" byaug: li" nae". Naonhaung" nho: mai bau: jham wa nhug: yang zo" pye' li" nae".

³Naonhaung" nho: ngaui qhang jham mae zu zo" li" nae"- ai: zu wa naonhaung" shad' mae sagse: doe, yang: myi: we' dakhyo: naonhaung" gaung sho: re nga" jeim" lo" nhao: li" nae". Ce: lo" thao" ra" ba na mae naonhaung" wa jo,nho" jham qaung" to" avako".

⁴Naonhaung" wa naonhaung" yo mae mau" zaui: byid' ra" okaung qere okaung phug' mabyid: ko" ngad: ra". Yao: bam: nyhung thoe re tae" gyo: ge,- naonhaung" gaug zo maui: lam: jham re jham: byid: ko" ra" mo; gyi: ngug: ra" thoe wa qam: bo: thao" ra" Asang Pho" Mao"So: no:khye' mae joe" vao lo" ava".

⁵Naonhaung" wa ce: myidgaung mae langa: khyo" pyo: pyo: na: lo: ako". Naonhaung" se' pye'ru qhug' genae" ra" ba na qhid' mae yao: yao" gaung re zo" xau: ci: avako".

⁶Naonhaung" wa pe" qobo maqo" ra" mo, re dao: phyid' mung: se' pye' ako". Yao: bam wa naonhaung" re madam: tug' lhe: ko" ngad: ra".

⁷Airumung: nga" mao:nhaung: qe we"- Asang joe" li" yo, joe" sho' zang: qhao" na ge,- yo kad' yaug wa yao: yao" yo mae" phug' de; ra" gaug zo maui: lam: ashi: zaui" thug' li" nae" rure yao: khoqhi" zang: qhao" yang: lao" na: rure qu" ge,- yao: wa zin mug: we' xaung: mug: re zang: qhao" yang: lao" ra".

⁸Naonhaung" re: zang: qhao" ca" ra". Asang joe" li" nae" ra" ba na jhao" li" va" ruyang naonhaung" yao" myid: lao" ra" khyo re zaui" zag: ci ge,.

⁹Nga" mao:nhaung: qe we"- naonhaung" yao: cao: dajho" nyhung ge,- ailao" za: Mao"So wa naonhaung" re dao: makho' nae"- dao: kho' yaug jhao" li" na mung:- na: qhu"- de" thug' li" nae" jin" jin" ngad: ava".

¹⁰Nga" mao:nhaung: qe we" Asang: mang we' kho" kyo" lo ko" ra" lapa qere myid: beim: ge,- Qug:khai: qug: khai: qhug' au: nhag' lam: qhang qhang za: zang: qhao" lai: lo ko" rure ve, so: khyo" qu" yu ge,-

¹¹yao: bam zang" kham: lo ko" ruyang ngonhaung" wa yao: bam re ngaui lho" ra" mo, ein: mhang" byid' ra". Yoba nho: zang: qhao" myid re naonhaung" gyo" qu" vako" ra". Lo" thao" mae Asang wa yao: re khoru: bao" thaug' byid' ra" khyo rere: naonhaung" ba: ako". Pe"mung:ga"re Asang wa nhag' khyag' shogu: myid byang" sho' bo: ra" Asang ngad: ra".

¹²Nga" mao:nhaung: qe we"- je yang: naonhaung" dao:so: to" ra" au: jham datang: ge,- Mug:gaung re lao: yang: re: mangad: lao" myidgaung re- mang lao: yang: re: jham datang: ge,- pe" ja: rere: mang lao: yang: jham datang: ge,- naonhaung" dao: wa ngad lao" wa ngad va"- ein: mangad: lao" wa mangad: ein: za: ta" ge,- ai lao" naonhaung" wa Mao"So: yang dao: kho' ru maqhug' genae".

¹³Naonhaung" phaung mae qug: khai: qhug' ra" byu dayaug yaug na: i? Yao: wa akyu" mho' ang: ra". Ngaui bau: yaug dayaug yaug na: i? Yao: wa jeju caung: nghaui" ang: ra".

¹⁴No phyo: qhug' ra" byu dayaug yaug bo: i? Yao: wa phung: lau: de, qere yekhai: yu nhao ang: ra". Yao: bam wa Asang: mang re lao: yang: yao: re zhanlun xau gyad byid: mung: yao" qhid' mae" akyu" mho' byid' li" genae".

¹⁵Ce: lam khug: myid we' akyu" mho' ru wa no yaug re gai: shao: lo" nhao: li" nae". Asang wa yao: re dam: qao" zin" li" nhao mung: yao: shad' nghung" lai: lo: ra" qobo jham rere: khyad' pye' byid' li" nae".

¹⁶Airumung: naonhaung" qobo jham re naonhaung" yao: cao: jho" lhang: yu mung: yao: cao: akyu" jho" mho' byid: ge,- airu: lao"- naonhaung" gai: shao: lo" li" genae". Din:man" ra" yaug: akyu" mho' thoe wa qo" boe" nhao: ra" qam: so' gyai bo: ra".

¹⁷Elia wa ngonhaung" we' dakhyo: xao su byu dayaug za: ngad: ra". Yao: wa mug: maqu nae" qhid' mae" kyid kyid za: akyu" mho' re myid gaung dao mae sam zin: lho" khyaug' khye' mug: maqu ngad: ra".

¹⁸Akyu" dam: mho' lao" mug:gaung wa mug: qu: khyo" ke' byid' mung: myidgaung wa gaug zo: maui: lam: qo" li" nhao: ra".

¹⁹Nga" mao:nhaung: qe we"- naonhaung" mae" dayaug yaug wa dangman" ra" khyo mae" nghung" lo" byaug mung: gatau dayaug: yang dam: jhui" tug' lo: re-

²⁰Qobo qo" yaug re yao: shad' nghung" rumae" dam: jhui" tug' lo yaug wa qobo qo" yaug: nho: alo zo: re shid: rumae" khyad' yu mung: qobo myo: sho' re khyad' pye' byid: qhug' nhao yaug ngad nae" rure beim: ge,.