Read Maru 1PETRU 4 Bible Online

1PETRU 4 - Maru bible

1PETRU 4

¹Khristu wa gaung khyao qug: khai: dayin dayo: kham zo" lo: ruyang- naonhaung" re: yao: myid: ru we' dakhyo: kham: yu mung: naonhaung" yao" gaung re qam: bo nhao qo: ako". Pe"mung:ga"re gaung khyao qug: khai: dayin dayo: kham zo" ra" yaug khag' ngadqere: qobo khug mae mabo: cao: bo loyang: ngad: ra".

²Airumung: ana" mae" thoegu:- myidgaung dao mae kao so' daui nae" dang shi" ra" ayo, mae xao su byu qe: kao bau myid: o: ra" ja" yang khang" ra" khyo re macao" lo:- Mao"So: yang khang" ra" khyo mae naonhaung" kao so' daui qo: ako".

³Naonhaung" wa lai: lo" ra" ayo, gu: mae malam khug: ra" tarha" Taung bug byu qe we' dakhyo: kad' yang: myao" sho' na: lo: avako". Naonhaung" kao so' daui khyo mae ave, made, kad' ru- shab' ru- yhid shaug' yid: ru- pyo: poe kad' ru- yhid shaug' poe kad' ru we' qu" ca' taung" ra" so alho jham re goe; pa" ra" khyo jham re kad' lo: ako".

⁴Ana" naonhaung" wa yao: bam we' daga" kyao: ru we' nug: khyo: kao so' daui: rumae mabo: bo gelao"- malam makhug: ra" Taung bug byu qe wa mug' gemung: yao: bam wa naonhaung" re jung" gaui: ako".

⁵Ngadqere: yao: bam wa kao so' daui: ra" mo, re we' shid: ra" mo, re dao: kho' nae" jin" jin" ngad: ra" Mao"So re yao: bam yao" khyo we' sin: yang: japhin: qhu" byid: qo: li" genae".

⁶Ce: mathao mae Ngaui Bau: Lau Dao: wa shid: ra" mo, rere: kho" kyo: byid' ra". Ai: shid: ra" mo, wa yao: bam: gaung khyao we' kao so' daui: na shiko" gu:- byu yaug khao: ngo" we' dakhyo: dao: phyid' ru qhug' ako". Ai: Ngaui Bau" Lau Dao: yao: bam re kho" kyo" ra" khyo wa yao: Byo kao so' mae Mao"So kao so' daui: na: ru we' dakhyo:- yao: bam kao so' qo" daui: na nae" qhid' mae" ngad: ra".

⁷Cao jab alhab' qhid' mae" lo" thao" ba na jhao" li" ava". Airumung: naonhaung" wa akyu" qo" mho' na genae" qhid' mae" naonhaung" yao" gaung re khang" mung: so: so: za: gyang" na ge,

⁸Alhab' tho' mae je: akhyag: ra" khyo wa yao: cao: kyid za: jho" jhid'de; ge,- pe"mung:ga"re jhid'de; myid wa qobo myo: sho' re qo" nghoe' byid' ra".

⁹Naonhaung" wa manyhung lo:- yao: cao: bang" jho" da" byid: ge,

¹⁰yaug khao: ngo" wa Mao"So: jeju jhaung qhu" aja: ja: re zam: pyo yaug we' dakhyo: Mao"So: lo, mae" yao: qo" khae: yu: to" ra" gakai: lai: ra" jeju jhaung qhu" re su gaje qenho" gai: ra" khyo qhid' mae" ci yhung: qo: ra".

¹¹Tarha" kho" kyo" ra" yaug khag' ngadqere: Mao"So: mungdao: re kho" kyo: ca" ra". Caung da" byid' yaug wa Mao"So yao: re byid' to" ra" qam o: we' caung da" byid: ca" ra". Ailao" za: ja: cao jab alhab' mae Yesu Khristu khyo" yang Mao"So re qo" caung: khin" li" nae". Yesu Khristu wa apyad ato mae phungbao we' qam: so' bo: jo; ra". A men.

¹²Nga" jhid'de; ra" ba nam qe we"- Ana" naonhaung" re jham" qu" ra" qug: khai: dayin dayo: xo sho' kham zo" na ko" ra" khyo re damug' ge,. Naonhaung" mae maboe" qu" ra" ja: boe" sho' ngadqere: damug' ge,-

¹³Khristu nho: qug: khai: dayin dayo: re naonhaung" qo" bokham zo" na ko" ruyang kam" wa ngaui bau: ge,- ailao" za: Khristu nho: phungbao myao: thug' li" au: naonhaung" wa gyai ngaui bau" ru qhug' li" genae".

¹⁴Naonhaung" wa Khristu nho: thao cao" mo, ngad geyang: maphug' makhyad' kad' ru qhug' ko" ngad: re wa naonhaung" wa ngaui lho" ko" ra". Pe"mung:ga"re Mao"So: Byo ngad: ra" phungbao byang" jo; ra" Byo wa naonhaung" dao mae na: jo; ru ngad: ra".

¹⁵Naonhaung" mae" dayaug yaug byu se' yaug mangad: lao"- khug' yaug mangad: lao"- yug: qo" yaug mangad: lao"- su gaje qe: khyo mae bocao: kaung: kag' yaug ngad: ruyang qug: khai: dayin dayo: dakham zo: nhao ge,.

¹⁶Ngadqere: naonhaung" wa Khristan phung: byu qe ngad geyang: qug: khai: dayin dayo: kham: zo: ko" ngad: re wa ai: mathao mae daqho' ge,- naonhaung" wa Khristu nho: mang re vin ko" ruyang Mao"So re jeju caung: khin" ge,.

¹⁷Dao: kho' nae" qhid' mae" ayo, joe" ava". Mao"So: byu qe sao qhid' dao: kho' ru qhug' qo: ako". Naonhaung" mae" dao: kho' qhid: ngad: re wa Mao"So mae" thug' li" ra" lau dao: gai re malam" ko" ra" mo; qhid' mae" khoru: boe" thao" nae" laug i?

¹⁸Jham: mugsug' mae Din:man" ra" byu qe: qhid' mae" khyad' yu: ru qhug' nae" qug' ra"- aire Mao"So re malam: ra" qobo jab qe wa pe" boe" genae" i? ga: tung" to" ru we' dakhyo: ngad: ra".

¹⁹Airumung: Mao"So myid o: ra" khyo" yang qug: khai: dayin dayo: kham zo: ko" ra" mo, wa- yao: bam: gaung re dao:so: zaung yaug ngad: ra". Yao: bam: phan" Asang re yao: bam yao" gaung ab byid: mung:- gai shab: ra" ave, lo,mau" re xo' kad' na vageshao:.