Read Maru 1PETRU 5 Bible Online

1PETRU 5 - Maru bible

1PETRU 5

¹Ngoyao: re: phung: lau:de, dayaug ngad: ra". Ngo wa mao:nhaung: phaung mae" phung: lau: de, qere mho' ke' ra". Ngo wa Khristu nho: qug: khai: dayin dayo: kham zo" rure myo, myao sagse: dayaug ngad mung:- myao: thug' li" nae" ra" phungbao re bokham zo: nae" ra" yaug ngad: ra".

²Naonhaung" re Mao"So ab byid' to" ra" yao kyaung" re manug masho: myid we' mangad: lo: Mao"So o: ru we' dakhyo: kao bau taung" gun caung lhaug' zaung" genae" qhid' mae" yao zam: mo, naonhaung" re ngo mho' ke' ra". Aphug' jhaung qhu" qhid' mae" za: mangad:- gaigai: yao: kao bau: ra" myid we' naonhaung" mau" zo" re vin vo; ge,-

³Naonhaung" re ab byid' ra" mo; dao mae eib zo: nae" qam: dake' ge,- yao kyaung" qhid' mae" ve, so: gai kam" wa qhu" byid: ge,-

⁴Yao zam: Au: jhaung Pho" thug' joe" li" lao"- bao qhui: ru khonhae" re: masham nae" ra" phungbao ba maug: re naonhaung" qo" khae: yu: li" genae".

⁵Ai we' dakhyo: apyad ngai: ra" mo, naonhaung" lau: de, qe: qao: mae na ge,- yao: cao: jho" caung da" byid: nae" qhid' mae" naonhaung" alhab' mo, wa nhag' lam: nyham: khyo" ru ga" ra" qhid' go pin: cug' re thab' ci ge,- pe"mung:ga"re jham: mugsug' mae Mao"So wa ngad beim" ra" mo, re tam" pye' mung:- nhag' lam: nyham: khyo" ra" mo, re kam" wa jeju byid' ra" ga: ta" to" ru we' dakhyo: ngad: ra".

⁶Airumung: Mao"So wa yao" ayo, gai mae naonhaung" re tau: to' byid: nae" qhid' mae" Mao"So: qam: so' bo: ra" lo, qao: mae naonhaung" yao" gaung re nyham: khyo" yang: na ge,-

⁷Mao"So wa naonhaung" re gun caung yaug ngad: ruyang naonhaung" myid: qug: myid: ci" ru jham alhab' re yao" lo, mae qhaug' to: byid: ge,

⁸Gyang: so: za: na ge,- lha" yang: lhaug' na ge,- naonhaung" gyevo Satan wa dayaug yaug re qo" myug: pye' nae" qhid' mae" khang khyi we' dakhyo: kyid' qho: lhang: qin" ra".

⁹Naonhaung" lam khug: myid re tang za: zaui" ci mung: ai: Satan re thaug' ngho' pye' ge,- pe"mung:ga"re mug: myid: dao mae" naonhaung" nho: Khristan mao:nhaung: qere: ai: qug: khai: qug: khai: khyo daja: reza: kham zo" lo ko" ru naonhaung" ba: ako".

¹⁰Ngadqere: naonhaung" wa dazab zo: qug: khai: qug: khai: rure bin: kham zo: gethao re nhag' myan" ra" jeju alhab' bo: ra" Mao"So- Khristu we' dadang: dalam: za: doe, nhao yang: apyad ato: phungbao re kham zo: nhao nae" qhid' mae" naonhaung" re khai: yu: ra" Mao"So wa naonhaung" re jab byang" nhao mung: nyhad' tang byid' ru we' qam: bo nhao yang: gang" tang: ra" apan aqao: byid' li" nae".

¹¹Yao: wa apyad ato khonhae" re: phung qam: so' bo: jo, vashao: wo"- A men.

¹²Ngo wa vhin tung" lang" zo: re Khristu mae mao:nhaung: dayaug khyo" ngo myid: lam: ra" Sila yang bao" thaug' byid: yaug naonhaung" re tung" vhin: ke' ru ngad: ra". Ngo wa naonhaung" re qam: byid: nug: ru we' ceru wa dangman" ra" Mao"So: nhag' myan" jeju ngad: rure sagse: kham: kyo: nae" qhid' mae" tung" ke' ru ngad: ra". Ai: jeju mae tang za: ye; jo, ge,-

¹³Mao"So: yang khyin: san: yu: to" ra" Babelon vogaung: mae" phung: byu qere: naonhaung" re au" ke' ako". Ai we' dakhyo: nga" zo: Marku re: naonhaung" re au" ke' ra".

¹⁴Naonhaung" yao: cao: dayaug we' dayaug Khristan jhid'de; myid we' bobaug jho" baug yang: jho" au" ge,. Ngaui pyo: yaug yo: ru wa Khristu yang sang: ra" mo, ngad: ra" naonhaung" alhab' we' daga" ngad: jo, vashao: wo".