Read Maru 2PETRU 3 Bible Online

2PETRU 3 - Maru bible

2PETRU 3

¹Nga" jhid'de; ra" ba nam qe we"- ana" ce: vhin tung" wa ngo naonhaung" re shid' lhang ein: lhang tung" vhin: ke' ra" mugsug' ngad: ra". Vhin tung" shid' lam" geim" mae cejham: khyo we' sin: yang naonhaung" re ta" peim: byid' ra" khyo" yang naonhaung" myid mae san sin" ra" khyo" ba: myid genae" qhid' mae" ngo qam: ke' yang: ta" ru ngad: ra".

²Gyang" Lho" ra" lapa qeyang ganhae" ta" to: co' ko" ra" mungdao: jham re we' naonhaung" lagyo: qeyang byid' to: co' ra" Asang we' khyad' yu: ra" Asang: amyin" dao: re naonhaung" re ngo myid: beim: nhao nug: ra".

³Ai: lo" thao" ra" ba na mae yao: bam yao" gaung sho: shab' ra" khyo: yang khang" mung: kao so' daui: ra" byu qe na: thug' li" genae" ngad: rure naonhaung" sao qhid' ba: to: ca" ako". Yao: bam wa naonhaung" re jung" gaui mung:-

⁴yao: wa dam: li" nae" ga: dao:so: byid' to: co' ra" mangad: i? Yao: khai: mae ngad: i? Ngonhaung" phug' pho" qe wa shid: byaug avako". Ngadqere: ja: khao: ngo" wa ana" joe" sho' mug:myid re phan" to" ra" au: we' dakhyo: za: ngad: ra"- ga: naonhaung" re myid' li" genae.

⁵Ganhae" Mao"So wa amyin" byid: mung: mug:gaung we' myid gaung re phan" to" ru we' myid gaung re qid: yang kyae yang: qid khug mae" thug' li" nhao mung:-

⁶ganhae" mae" ai: mug: myid xug' rere: qid: yang yao: daqid shi: yang nhai" pye' ra" khyo re yao: bam wa thaug yao: maba geim kad' ako".

⁷Ngadqere: ana" jo; jo; ra" mug:gaung we' myid gaung re myi" yang ngha" pye' nae" qhid' mae" azhao: mae" Mao"So: amyin" dao" yang tang" to: byid' ra". Mao"So: khyo macao" ra" mo, dao kho' qhug' ru we' phyo' pye' qhug' ra" ba na joe" sho' aijham re zam" to" ra".

⁸Ngadqere: nga" jhid'de; ra" mao:nhaung: qe we"- Asang: nho: qhid' kheim: mae daba wa zin na dataung we' dakhyo: zin na dataung wa daba za: ngad: rure dato" myhid' ge,.

⁹Damyo" myid: jho ko" ru we' dakhyo:- Mao"So wa yao: dao:so: byid' to" rure kad' nae" mayam" ngad: ra"- ai: atha" yao: wa naonhaung" re nhag' lam: qhang qhang to: byid' ra". Pe"mung:ga"re yao: wa naonhaung" dayaug rere: jeim" lo" byaug genae" rure yao: mangaui ngad: ra". Byu alhab' mo, re yao: bam: qobo jham mae" phaug' lo genae" rure kam" wa yao: o: ra".

¹⁰Asang: Ba Na wa khug' hab' we' dakhyo: joe" li" nae". Ai: Ba Na mae mug:gaung wa- lao thao wa shau ga: myang yang: byaug: lo" li" nae". Mug:gaung mae" ba kyi lho" mo" jham wa nga" jeim" lo" byaug; li" genae"- mug:myid dao mae" ja: khao: ngo" wa baui" byaug; lo" li" genae".

¹¹Ai: ja: cao jab alhab' wa cekhyo" byo; qeim: lo" li" genae" ngad mung: naonhaung" wa khoru" ra" mo, ngad ca" ko" i? Naonhaung" wa Mao"So: Ba Na re lao" na mung: ai: ba na phyad joe" li" nae" qhid' mae" gai: boe" ra" qhi" qam: ke' na ko" au:-

¹²naonhaung" kao so' daui khyo wa gyang" lho" ru we' Mao"So re qhaug' byid' to: qo: ako". Ai: Ba Na mae mug:gaung wa nga" jeim" lo" byaug: li" nae"- mug:gaung mae" ba kyi lho" mo" jham wa laung so' yang kao: yhug' pye' ru qhug' li" genae".

¹³Ngadqere: ngonhaung" wa Mao"So: dao:so: byid' to" ra" din: man" mo, na nae" yham jo; ra" mug:gaung sag' we' myid gaung sag' re lao" na: bam: ra".

¹⁴Airumung: nga" ba nam qe we"- ai: Ba Na re naonhaung" lao" na ko" au:- Mao"So: qhid' kheim: mae gyang" san: ru we' qo mabo lo: yao: we' mang: dae yaug yo nae" qhid' mae" gai: boe" ra" qhi" qam: ke' ge,-

¹⁵Ngonhaung" jhid'de; ra" mao:nhaung: pho" Polu wa Mao"So byid' ra" nyan: pha,jhi" re ci yang: naonhaung" re mugsug' tung" ke' ru we' dakhyo: ngonhaung" Asang: nhag' lam: qhang: ru wa naonhaung" khyad' yu: ru qhug' genae" qhid' mae" akho: akhang" agu byid' na: ru ngad: ra" khyo re ba: yu ge,-

¹⁶Polu wa cekhyo we' sin: yang: yao: tung" vhin: ke' ra" vhin tung" alhab' mae ce: khyo" tung" to" ra". Polu vhin tung" jham mae ba: gyo: qug' ra" khyo jham daqhae: bo mung: adu: adae: mo, we' lam khug: myid maqo" ra" mo, wa aijham re gatau: Jham: dau jham we' dakhyo: lajheim: shad' ra" khyo" ta" pye' ako". Airumung: yao: bam wa yao: bam yao" gaung re phyo' qheim" yu: ako".

¹⁷Ngadqere: nga" ba nam qe we"- ce: khyo re naonhaung" ba gau ngad: ako". Airumung: naonhaung" wa tarha" macao" ra" byu qe shad' ra" khyo" yang naonhaung" re majhui" nghung" lo" genae" qhid' mae" we' gang" tang: jo; rumae" magyang: lo" genae" qhid' mae" naonhaung" lha" ge,.

¹⁸Ngadqere: ngonhaung" Asang we' khyad' yu: Asang Yesu Khristu nho: nhag' myan" ra" jeju we' laba lajhao mae xo' yang: qi" qhang: li" ge,- Asang wa ana" mae" apyad ato phungbao qi" qhang: jo, vashao: wo"- Amen.