Read Maru 1YOHAN 1 Bible Online

1YOHAN 1 - Maru bible

1YOHAN 1

¹Ngonhaung" wa sao qhid' maqhid mae" jo; jo; ra" kao so' mungdao: khyo re naonhaung" re tung" vhin: ke' ra". Aimung dao: re ngonhaung" the' gyo: va"- ngonhaung" yao" myo; yang yao: the' myao va"- ngad: va"- ai re ngonhaung" the' myao va"- ngonhaung" yao" lo; yang yao: aire the' tin: va".

²Ce: kao so' myao: thug' li" au: ngonhaung" myao: lo: bam va". Airumung: ai: khyo re ngonhaung" jhau mung: Pho" we' daga" na yang: ngonhaung" re qhu" byid' ra" apyad ato: kao so' khyo we' sin: yang: naonhaung" re ta" hau" kyo: byid' ra".

³Ngonhaung" wa Pho" we' yao" Yao: Zo: Yesu Khristu we' jho" zam" khug: ra" khyo qo" yu va" rumae naonhaung" re: ngonhaung" we' daga" qo" bobo genae" qhid' mae" ngonhaung" the' myao va" ru we' ngonhaung" the' gyo" yu va" gu: re naonhaung" rere: ta" hau" kyo: byid' ra".

⁴Ngonhaung" nho: ngaui bau" ru jab byang" sho' boe" nae" qhid' mae" ce: vhin tung" re ngonhaung" tung" ke' ru ngad: ra".

⁵Mao"So wa bo" bao ngad: ru we' yao: mae mug: cad' dajhid' re: mabo ga" ra" ce: mungdao: re yao" Yao: Zo: mae" ngonhaung" the' gyo" yu mung: naonhaung" re ngonhaung" ta" hau" ra".

⁶Airumung: ngonhaung" wa yao: we' daga" zam" khug: na: ru ngad: ga: ta" ngadqere: mug: cad' khug mae na: jo; ngad: re wa ngonhaung" wa nhad' dao: thoe we' lo, mau" shid' ja" geim" mae mhug' na mo, ngad: ra".

⁷Ngadqere: yao: wa mug: bo" mae na: ru we' dakhyo: ngonhaung" wa mug: bo" mae na: bam: ngad: re ngonhaung" wa yao: cao: jho" zam" khug: na mo, ngad: ra". Amung: yao" Yao: Zo: Yesu Khristu nho: sa" yang qobo ja: khao: ngo" mae" ngonhaung" re kyang" san: pye' byid' ra".

⁸Ngonhaung" qobo maqo" ein: ta" bam: ngad: re ngonhaung" wa yao: yao" gaung re mhug' pyag' mo, ngad mung: ngonhaung" khug mae dangman" ru mabo ngad: ra".

⁹Ngadqere: ngonhaung" nho: qobo jham re lhang: yu: bam: ngad: re kam" wa yao: wa yao" dao:so: re dang sho' kad' mung: din: vang" ra" khyo" kad' li" li" nae". Yao: wa ngonhaung" nho: qobo jham re khyad' pye' byid: mung: ngonhaung" shad' nghung" ra" qobo jham alhab' rere: kyang" san: pye' byid' li" nae" ngad: ra".

¹⁰Ngonhaung" wa qobo makad' lai: lo ein: ta" bam: ngad: re ngonhaung" wa Mao"So re mhug' hab' khyo" toe' pye' yang: yao" dao: wa ngonhaung" khug mae mabo ngad: ra".