Read Maru 1YOHAN 2 Bible Online

1YOHAN 2 - Maru bible

1YOHAN 2

¹Nga" zo: dau qe we"- naonhaung" qobo makad' genae" qhid' mae" ce: vhin tung" naonhaung" re tung" ke' ra". Ngadqere: dayaug yaug qobo kad' yang: ngad: re ngonhaung" gaung tha" Pho" re bobao" goe; mho' byid' ra" byu dayaug qo: ra". Ai: yaug wa din:man: yaug Yesu Khristu ngad: ra".

²Khristu wa Ngonhaung" qobo jham: qhid' mae" qobo jhin xe' pye' byid: mung: ngonhaung" qobo jham re khyad' pye' byid' ra". Ngonhaung" qobo jham: qhid' mae" za: mangad:- yaug khao: ngo" qhid' mae" re: qobo jhin xe' pye' byid: yaug ngad: ra".

³Ngonhaung" wa Mao"So: amyin" dao: jham re phug' cao" ngad: re wa yao: re ngonhaung" ba se" rure ngonhaung" zhaug' za: ba: ra".

⁴Byu dayaug yaug wa Mao"So re ba: ga: ta" ngadqere: yao" amyin" dao: jham re maphug' cao" ngad: re wa airu" ra" yaug wa mhug' hab' ngad mung: yao" khug mae dangman" ru mabo ngad: ra".

⁵Mao"So: mungdao: re phug' cao" ra" yaug khag' ngadqere: yao" khug mae" Mao"So: jhid'de; myid wa gaigai: yao: jab byang" sho' qhu" byid' ava". Ngonhaung" wa Mao"So we' dagaung dasho: za: doe; na: rure cekhyo" yang ngonhaung" ba: ra".

⁶Yao: wa Mao"So we' dagaung dasho: za: doe; na yaug ngad: ga: ta" ra" yaug khag' ngadqere: Yesu Khristu kao so' daui: ru we' dakhyo:- kao so' daui ca" ra".

⁷Nga" jhid'de; ra" ba nam qe we"- ngo naonhaung" re tung" vhin: ke' ra" ce: amyin" dao: wa asag' mangad:- ai: aqhid mae" naonhaung" qo" yu: to" ra" amyin" dao: axug' ngad: ra". Ai: amyin" dao: axug' wa naonhaung" gyo" qu" vako" ra" mungdao: ngad: ra".

⁸Ngadqere: ngo ana" naonhaung" re tung" ke' ra" amyin" dao: wa Asag' ngad: ra". Pe"mung:ga"re ai: amyin" dao" nho: dangman" ru wa Khristu mae the' myao mung: naonhaung" mae re: the' myao: ra". Pe"mung:ga"re mug: cad' wa lai: lo" byaug mung: mug: bo" agyang" wa zho: bao: na: ava".

⁹Yao: wa mug: bo" khug mae na yaug ngad: ga: ta" ngadqere: yao: yao" mao:nhaung: pho" re nghang" ra" yaug wa ana" joe" sho' ai: mug: cad' khug mae na: jo, yaug ngad: ra".

¹⁰Yao: yao" mao:nhaung: pho" re jhid'de; ra" yaug wa mug: bo" khug mae na: ra" yaug ngad: ra". Yao: wa khag' rere: yao" mathao mae qobo shad' nhao nae" mangad:.

¹¹Ngadqere: yao: yao" mao:nhaung: pho" re nghang" ra" yaug wa mug: cad' khug mae na: jo, yaug ngad: ra". Yao: wa ai: mug: cad' khug mae su" na mung: yao: khai: ye" lo" na: ru maba ngad: ra". Pe"mung:ga"re ai: mug: cad' wa yao: re myo, jid boe" nhao: ra".

¹²Nga" zo: dau qe we"- naonhaung" wa Khristu mathao mae naonhaung" qobo jham re khyad' pye' byid: qhug' vako" ruyang ngo naonhaung" re mugsug' tung" ke' ra".

¹³Pho" qe we"- naonhaung" wa sao qhid' maqhid mae" na: jo; ra" yaug re ba mo, ngad ko" ruyang ngo naonhaung" re mugsug' tung" ke' ra". Zolau: qe we"- naonhaung" wa ai: Makhyang" ra" Yaug re aung: pye' vako" ruyang ngo naonhaung" re mugsug' tung" ke' ra".

¹⁴Nga" zo: dau qe we"- naonhaung" wa ai: Pho" re ba ko" ruyang ngo naonhaung" re mugsug' tung" ke' ra". Pho" qe we"- naonhaung" wa sao qhid' maqhid' mae" na: jo; ra" yaug re ba ko" ruyang ngo naonhaung" re mugsug' tung" ke' ra". Zolau: qe we"- naonhaung" wa qam: bo ko" ruyang re:- Mao"So: mungdao: wa naonhaung" khug mae kao so' daui: na: ruyang re:- naonhaung" wa ai: makhyang" ra" yaug re aung: pye' vako" ruyang re: ngo naonhaung" re mugsug' tung" ke' ra".

¹⁵Mug: myid re dajhid'de, ge,- mangad: lao" ai: mug: myid we' sin" ra" ja: re dajhid'de, ge,- naonhaung" ai: mug: myid re jhid'de; ko" ngad: re wa Pho" re majhid'de, ko" ngad: ra".

¹⁶Gaung sho: shab' ru- myo; yang myao mung: kao bau myid: o: ru- ce: mug: myid dao: byu qe mae phug nhao: ra" ja: ru" ra" ce: myid gaung we' sin" ra" ja: daja: re: ai: Pho" mae" joe" li" ru mangad: ngad: ra". Ai: gu: alhab' wa mug: myid mae" thug' li" ru ngad: ra".

¹⁷Mug: myid we' ai: mae na: ra" byu qe kao bau myid: o: ra" ja: alhab' wa lai: lo" na: ra". Ngadqere: Mao"So myid o: rure phug' cao" ra" yaug wa apyad ato kao so' daui: na: ra".

¹⁸Nga" zo: dau qe we"- lo" thao" ayo, wa jhao" va" ra". Naonhaung" re ta" kyo" to" ra" Khristu nho: Gyevo wa joe" li" nae" ngad: ra". Ana" yao: Khristu nho: gyevo qe myo: sho' mo, thug' joe" na: bam: avako". Airumung: lo" thao" ayo, wa jhao" va" rure ngonhaung" ba: ra".

¹⁹Ai: byu qe wa ngonhaung" nho: phaung mae" mo, mangad: ko" rumung: yao: bam wa ngonhaung" mae" thug' lo" byaug: avako". Yao: bam wa ngonhaung" nho: phaung mae" mo, ngad ko" re wa yao: bam ngonhaung" we' daga" na genae" ngad: ra". Ngadqere: yao: bam mae" dayaug re: ngonhaung" nho: phaung mae" mo, mangad' rure de: de: za: myao: thug' li" nae" qhid' mae" yao: bam wa ngonhaung" mae" thug' lo" byaug: ako".

²⁰Ngadqere: naonhaung" wa Khristu yang Gyang" Lho" Byo vhe' sheim: byid' ru qhug' avako". Aimung: naonhaung" alhab' mo, wa ai: dangman" rure ba: ako".

²¹Ai rumung: ai: dangman" rure naonhaung" maba geyang: ngo naonhaung" re mugsug' tung" ke' ru mangad:- ai: atha" ai: dangman" rure naonhaung" ba ko" ru we' ai: dangman" rumae" mhug' ru khonhae" re: mathug' li" rure re: naonhaung" ba geyang: ngo naonhaung" re tung" ke' ru ngad: ra".

²²Airulao"- mhug' hab' khag' ngad: ra" i? Ai: mhug' hab' wa Yesu re Meshia mangad: ga: ta" ra" yaug ngad: ra". Airu" yaug wa Khristu nho: Gyevo ngad mung: yao: wa yao: Pho" we' yao: Zo: re ngag: ha: pye' ra" yaug ngad: ra".

²³Pe"mung:ga"re yao: Zo: re ngag: ha: pye' yaug wa yao: Pho" rere: ngag: ha: pye' yaug ngad: ra". Airumung: yao: Zo: re khae: yu: ra" yaug wa yao: Pho" rere: khae: yu: ra" yaug ngad: ra".

²⁴Airumung: sao qhid' maqhid mae" naonhaung" the' gyo" yu ko" ra" ai: mungdao: re naonhaung" aung khug nhag' lam: mae ke' to: ge,- ai: mungdao: re naonhaung" nhag' lam: mae ke' ci ko" ngad: re wa naonhaung" wa yao: Zo: we' re: yao: Pho" we' re: dagaung dasho: za: khonhae" re: doe, yang: kao so' daui: na: li" genae".

²⁵Ceru wa Khristu yao: ngonhaung" re byid: nae" dao:so: byid' to" ra" apyad ato: kao so' ngad: ra".

²⁶Naonhaung" re mhug' pyag' yu nae" qam: ke' na ko" ra" mo; khyo we' sin: yang: ngo naonhaung" re mugsug' tung" ke' ru ngad: ra".

²⁷Ngadqere: naonhaung" re kam" wa Khristu wa naonhaung" dao mae yao" Byo vhe' sheim: byid' ava". Naonhaung" dao mae yao" Byo ana: jo, jo, wa naonhaung" re khag' yang re: mho" shid' byid: maqo ngad: ra". Pe"mung:ga"re yao" Byo wa ja: khao: ngo" naonhaung" re mho" shid' byid' ra". Ai: Byo: yang mho" shid' byid' ra" gu: wa dangman" ru ngad mung: shad' nghung" ru mabo ngad: ra". Airumung: Byo: yang mho" shid' ra" khyo re phug' cao" mung: Khristu we' dagaung dasho: za: doe, yang: kao so' daui: na ge,.

²⁸Ngad va"- nga" zo: dau qe we"- yao: joe" li" ra" ba na mae yao: re qho' yang: phao: vho' maqo lo: yao" qhid' kheim: mae mazag mavae qo" ye; jo, genae" qhid' mae" yao: we' dadang: dalam: za: doe; na ge,-

²⁹Khristu wa din:man: yaug ngad: rure naonhaung" ba: ako". Airumung: jo: ra" mau" re kad' ra" yaug khag' ngadqere: yao: wa Mao"So: zo: dau ngad: rure naonhaung" ba: na nae" ngad: ra".