Read Maru 1YOHAN 3 Bible Online

1YOHAN 3 - Maru bible

1YOHAN 3

¹Pho" wa ngonhaung" re khoqhi" sho' jhid'de; rure qu" qu" ge,- yao" jhid'de; myid wa gyai qi" qhang: jo; ruyang ngonhaung" wa Mao"So: zo: dau qe ga: mhang" ru qhug' va". Gai gai: yao: ngonhaung" wa Mao"So: zo: dau qe ngad: ra". Ce: khyo: mathao mae myid gaung byu qe ngonhaung" re maba ko" ru wa yao: bam Mao"So re sao qhid' maba geyang: ngad: ra".

²Nga" jhid'de; ra" ba nam qe we"- ana" ngonhaung" wa Mao"So: zo: dau qe ngad: ra". Ngadqere: ngonhaung" pe" boe" nae" ru de: de: za: maba ngad: ra". Ngadqere: Khristu thug' li" lao" ngonhaung" wa yao: we' dau nae" ngad: rure ngonhaung" ba: ra". Pe"mung:ga"re ngonhaung" wa yao: re yao: the' myao nae" ngad: ra".

³Khristu mae ce: myid: lao" khyo qo" ra" yaug khao: ngo" wa Khristu wa gyang" san yaug ngad: ru we' dakhyo: yao: yao" gaung re gyang" san sho' kad' yaug ngad: ra".

⁴Qobo shad' lhoe" yaug khag' ngadqere: Mao"So kham" to" ra" tarha" re lhoe" ra" qobo qo" ra". Pe"mung:ga"re tarha" re lhoe" ra" khyo wa qobo ngad: ra".

⁵Khristu wa qobo jham re yu: pye' byid: nae" qhid' mae" thug' li" va" rure naonhaung" ba: ako". Yao: mae qobo made, ngad: ra".

⁶Airumung: Khristu we' dagaung dasho: za: doe, mung: kao so' daui: ra" yaug wa xo' yang: qobo makad' ngad: ra". Ngadqere: xo' yang: qobo kad' ra" yaug wa Khristu re mamyao: qu" yaug mangad: lao"- maba shi" yaug ngad: ra".

⁷Nga" zo: dau qe we"- khag' yang re: naonhaung" re damhug' pyag' nhao: pye' ge,- Khristu wa din:man: yaug ngad: ru we' dakhyo: din:man" ra" mau" zaui: so" ra" yaug khag' ngadqere: din: man" ra" yaug ngad: ra".

⁸xo' yang: qobo kad' ra" yaug khag' ngadqere: yao: wa min: yui: nho: byu ngad: ra". Pe"mung:ga"re min: yui wa sao qhid' maqhid' mae" qobo kad' lo yaug ngad: ra". Ai: min: yui: nho: lo, mau" re phyo' pye' nae" qhid' mae" Mao"So: yao: zo: joe" li" ru ngad: ra".

⁹Mao"So: zo: dau ngad: ra" yaug khag' ngadqere: xo' yang: qobo makad' ngad: ra". Pe"mung:ga"re Mao"So: ve, khyao wa yao" khug mae bo: jo; ra". Mao"So wa yao" yao: Pho" ngad: ruyang yao: wa xo' yang: qobo maqo" kad' ngad: ra".

¹⁰Ce wa Mao"So: zo: dau qe we' min: yui: nho: zo: dau qe: agyo: mae de: de: za: jho" shai" ra" khyo ngad: ra". Jo: ra" mau" zo" makad' ra" yaug- mangad: lao" yao: yao" mao:nhaung: pho" re majhid'de; ra" yaug wa Mao"So: zo: dau mangad: ngad: ra".

¹¹Sao qhid' maqhid mae" naonhaung" gyo" yu ko" ra" mungdao: wa- ngonhaung" wa yao: cao: jho" jhid'de; ca" ga" ra" mungdao: ceru ngad: ra".

¹²Ngonhaung" wa Ka-in: we' magai: dau ngad: ra". Yao: wa ai: makhyang" ra" yaug we' sin" ra" yaug ngad mung: yao" yao: nhaung: Abela re se' pye' ra". Ka-in wa pe"mung: yao: re se' ra" i? Yao" lo, mau" wa shad' mung: yao: nhaung" nho: lo, mau" wa jo: ruyang ngad: ra".

¹³Airumung: nga" mao:nhaung: qe we"- myid gaung byu qeyang naonhaung" re nghang: ko" re damyid: mug' ge,.

¹⁴Ngonhaung" wa ngonhaung" yao" mao:nhaung: qere jhid'de; va" ruyang shid: rure to" pye' co' yang: kao so' daui: ra" khyo lai: vao: ye: va" ra" khyo re ngonhaung" ba: ra". Jhid' de; myid mabo: ra" yaug khag' ngadqere: shid: runho: qam: so' khug mae na: jo; ashi".

¹⁵Yao" mao:nhaung: pho" re nghang" ra" yaug khag' ngadqere: byu se' yaug ngad: ra". Amung: byu se' yaug mae apyad ato: kao so' mabo: rure naonhaung" ba: ako".

¹⁶Khristu wa ngonhaung" qhid' mae" yao" kao so' re byid' pye' va" ruyang ngonhaung" wa jhid'de; myid pe" ngad: rure ba: bam va". Airumung: ngonhaung" re: ngonhaung" nho: kao so' re ngonhaung" mao:nhaung: qe: qhid' mae" byid' pye' ang: ra".

¹⁷Jo,nho" qo" ra" byu dayaug wa yao" mao:nhaung: pho" myaung sho" na: rure the' myao ngadqere: nhag' maqu" khyag' ra" yaug wa Mao"So re jhid'de; ga: khoru: qo" ta" nae" i?

¹⁸Nga" zo: dau qe we"- ngonhaung" nho: jhid'de; myid wa nhad' dao: thoe za: magai: ngad ngad: ra". Lo, mau" khyo" qhu" byid' ra" dangman" ra" jhid'de; myid ngad qo: ra".

¹⁹Airu: mung: ce: khyo" yang ngonhaung" wa dangman" ru we' sin" ra" mo, ngad: rure ba nae" ngad: ra". Mao"So: qhid' kheim: mae re: lam lam za: qo" ye; li" nae".

²⁰Ngonhaung" nho: aung khug nhag' lam" yang ngonhaung" re dao: phyid' yang: ngad: re wa Mao"So wa ngonhaung" nho: aung khug: nhag' lam: tho' je: qi: yaug ngad: ru we' ja: khao: ngo" re ba yaug ngad: rure ngonhaung" ba: ra".

²¹Airumung: nga" jhid'de; ra" ba nam qe we"- ngonhaung" nho: aung khug: nhag' lam" yang ngonhaung" re dao: maphyid' yang: ngad: re wa ngonhaung" wa Mao"So: qhid' kheim: mae mazag mavae: myid qo" li" nae" ngad: ra".

²²Ngonhaung" wa yao" amyin" dao: jham re phug' cao" mung: yao" nga:ye; ra" mau" zo" re kad' mo, ngad: ruyang ngonhaung" mho' yao: ra" ja: pe" ngadqere: yao" lo, mae" qo" khae: yu nae" ngad: ra".

²³Mao"So: amyin" dao: jham wa Yao" yao: Zo: Yesu Khristu re ngonhaung" lam" mung: Khristu yao: ngonhaung" re amyin" byid' to: co' ru we' dakhyo: yao: cao: jho" jhid'de; qo: ra" ga" ru ngad: ra".

²⁴Mao"So: amyin" dao: jham re phug' cao" ra" yaug wa Mao"So we' dagaung dasho: doe, yang: kao so' daui yaug ngad mung: Mao"So re: yao: we' dagaung dasho: za: doe, yang: na: ra". Mao"So: yang ngonhaung" re byid' to" ra" khyo" yang Mao"So wa ngonhaung" we' dagaung dasho: za: doe; na: rure ngonhaung" ba: ra".