Read Maru 1YOHAN 4 Bible Online

1YOHAN 4 - Maru bible

1YOHAN 4

¹Nga" Jhid' de; ra" ba nam qe we"- Byo re qo" khae: yu yang: ngad: ga: ta" ra" mo, alhab' re dalam" ge,- ngadqere: yao: bam qo" khae: yu: to" ra" byo wa Mao"So mae" joe" li" ru ngad mangad: rure jham" qu" ge,- pe"mung: ga"re lapa pyag' qe myo: sho' wa khyi" khao: ngo" khyo thug' ye" lo" byaug: avako".

²Mao"So: byo ngad mangad: rure naonhaung" ba genae" ra" khyo wa ceru: ngad: ra". Yesu Khristu wa xao su byu ve, vin yang: joe" li" yaug ngad: ra" khyo re lhang: yu: ra" Byo wa Mao"So mae" joe" li" ra" Byo ngad: ra".

³Ngadqere: ceru re ha: pye' ra" yaug wa Mao"So mae" joe" li" ra" Byo re qo" khae: yu: ra" yaug mangad: ngad: ra". Yao: qo" yu: to" ra" byo wa Khristu nho: Gyevo pho" mae" joe" li" ra" byo ngad: ra". Ai: byo joe" li" nae" rure naonhaung" the' gyo" to: gau ngad: ako". Ai: byo wa ana" ce: mug: myid dao mae joe" na: ava".

⁴Nga" zo: dau qe we"- naonhaung" wa Mao"So: byu qe ngad gemung: lapa apyag' qere aung: pye' avako". Pe"mung:ga"re naonhaung" khug mae na: ra" Byo wa ai: mug: myid byu qe: khug mae na: ra" byo tho' qam: so' je: bo yaug ngad: ra".

⁵Lapa apyag' qe wa mug: myid we' sin" ra" khyo re ta" ako". Mug: myid wa yao: bam re tae" gyo: byid' ra". Pe"mung:ga"re yao: bam wa mug:myid byu qe ngad: ako".

⁶Ngadqere: ngonhaung" wa Mao"So: byu qe ngad: ra". Mao"So re ba: ra" yaug khag' ngadqere: ngonhaung" ta" ra" dao: re tae" gyo" ra"- Mao"So: byu mangad: ra" yaug khag' ngadqere: ngonhaung" nho: dao: re matae" gyo: ngad: ra". Airumung: ceru re qu" yang: dangman" runho: Byo we' shad' runho: byo khoru: jho" shai" rure ngonhaung" qo" ba: kho' ta" ra".

⁷Jhid' de; ra" ba nam qe we"- ngonhaung" yao: cao: jho" jhid'de; gelang:- pe"mung:ga"re jhid'de; myid wa Mao"So mae" joe" li" ru ngad: ra". Jhid' de; myid bo: ra" yaug khag' ngadqere: Mao"So: zo: dau ngad mung: yao: wa Mao"So re ba yaug ngad: ra".

⁸Jhid' de, myid mabo: ra" yaug wa Mao"So re maba ngad: ra". Pe"mung:ga"re Mao"So wa jhid'de; myid ngad: ra".

⁹Ngonhaung" wa yao: Zo: khyo" yang kao so' qo" yu nae" qhid' mae" Mao"So wa yao" zote: Zo: re mug: myid khyo nhao: ke' byid' ra" khyo" yang yao" jhid'de; myid ngonhaung" re qhu" byid' ava".

¹⁰Jhid'de; myid ga" ru wa ceru ngad: ra". Ngonhaung" wa Mao"So re sao qhid' jhid'de; ru mangad:- Mao"So wa ngonhaung" re jhid'de; mung: ngonhaung" qobo jham re khyad' pye' byid: nae" qhid' mae" yao" yao: Zo: re nhao: ke' byid' ru ngad: ra".

¹¹Jhid'de; ra" ba nam qe we"- Mao"So wa ngonhaung" re ceqhi" jhid'de; yang: ngad: re wa ngonhaung" re: yao: cao: jho" jhid'de; nae" ngad: ra".

¹²Mao"So re khag' khonhae" re: mamyao: qu" ngad: ra". Ngadqere: ngonhaung" wa yao: cao: jho" jhid'de; ngad: re wa Mao"So wa ngonhaung" we' dagaung dasho: za: kao so' daui mung: yao" jhid'de; myid wa ngonhaung" khug mae jab byang" nhao: ra".

¹³Mao"So wa ngonhaung" re yao" Byo byid' to: va" ruyang ngonhaung" wa Mao"So we' dagaung dasho: za: kao so' daui: na: rure we' yao: re: ngonhaung" we' dadang: dalam: za: kao so' daui: na: rure ngonhaung" jhaug' za: ba: ra".

¹⁴Yao: Pho" wa yao" yao: Zo: re mug: myid byu qenho: Khyad' Yu: Asang boe" nhao nae" qhid' mae" nhao: ke' ra" khyo re ngonhaung" the' myao yang: ai: khyo re su gaje qere re: ngonhaung" ta" kyo: byid' ra".

¹⁵Yesu wa Mao"So: yao: Zo: ngad: ra" ga: ta" lhang: yu: ra" yaug khag' ngadqere: yao: wa Mao"So we' dagaung dasho: za: kao so' daui yaug ngad mung: Mao"So re: yao: we' dagaung dasho: za: kao so' daui: ra".

¹⁶Mao"So: yang ngonhaung" re byid' to" ra" jhid'de; myid re ngonhaung" yao: ngonhaung" ba mung: lam: ra". Mao"So wa jhid'de; myid ngad: ra". Jhid'de; myid khug mae kao so' daui: ra" yaug khag' ngadqere: yao: wa Mao"So we' dagaung dasho: za: na mung: Mao"So re: yao: we' dagaung dasho: za: na: ra".

¹⁷Ai: dao: kho' ra" Ba Na mae ngonhaung" mazag mavae ngad nae" qhid' mae" jhid'de; myid wa ngonhaung" khug mae jab byang" nhao: ra". Pe"mung:ga"re ce: mug: myid dao mae ngonhaung" kao so' daui: ra" khyo wa Khristu nho: kao so' daui khyo we' dakhyo: za: ngad: ruyang ai: vae" ra" myid re ngonhaung" qo" yu: li" nae".

¹⁸Jhid'de; myid mae gyaug: ru mabo ngad: ra". Jab byang" ra" jhid'de; myid wa gyaug ci" ru alhab' re khe' thug' pye' ra". Airumung: gyaug: ra" yaug khag' mae re: jhid'de; myid majab byang" ngad: ra". Pe"mung:ga"re gyaug myid wa qobo dae byid' ru we' sin" ru ngad: ra".

¹⁹Mao"So wa ngonhaung" re sao qhid' jhid'de; yang: ngonhaung" jhid'de; ru ngad: ra".

²⁰Byu dayaug yaug- yao: wa Mao"So re jhid'de; yaug ngad: ga: ta" ngadqere: yao: yao" mao:nhaung: pho" re nghang" ngad: re wa yao: wa mhug' hab' ngad: ra". Pe"mung:ga"re yao: myao: ra" yao" mao:nhaung: pho" re yao: majhid'de, ngad: re wa yao: mamyao: qu" ra" Mao"So re yao: khoru: magai: jhid'de; ngad: ra".

²¹Khristu ngonhaung" re byid' to" ra" amyin" dao: wa- Mao"So re jhid'de; ra" yaug khag' ngadqere: yao: yao" mao:nhaung: pho" rere: jhid'de; ca" ga" ru ngad: ra".