Read Maru 1YOHAN 5 Bible Online

1YOHAN 5 - Maru bible

1YOHAN 5

¹Yesu re Meshia ngad: ga: lam" ra" yaug khag' ngad qere: Mao"So: yao: zo: ngad: ra". Yao: pho" re jhid'de; ra" yaug khag' ngad qere: ai: yao: Zo: rere: jhid'de; ra".

²Mao"So re jhid'de; mung: yao" amyin" dao: jham re phug' cao" ra" khyo" yang ngonhaung" wa Mao"So: zo: dau qere jhid'de; ra" khyo re ngonhaung" ba: ra".

³Pe"mung:ga"re ngonhaung" Mao"So re jhid'de; ga" ru wa yao" amyin" dao: jham re phug' cao" ru ngad: ra". Yao" amyin" dao: jham wa ngonhaung" qhid' mae" gyai mataung" qug: ngad: ra".

⁴Pe"mung:ga"re Mao"So: zo: dau yaug khao: ngo" wa mug: myid re qo" aung: pye' ra". Ngonhaung" wa ai: mug:myid re ngonhaung" nho: lam khug: myid khyo" yang aung: pye' ra".

⁵Ai: mug: myid re khag' qo" aung: pye' ra" i? Yesu wa Mao"So: yao: Zo: ngad: ga: lam" ra" yaug za: qo" aung: pye' ra".

⁶Yesu Khristu wa yao" nho: Qid nyhab' kham: yu ra" qid we' yao" nho: shid: ra" sa: we' joe" li" ra" yaug ngad: ra". Yao: wa qid khyo" yang za: joe" li" ru mangad:- qid we' sa: shid' ja: geim" we' joe" li" yaug ngad: ra". Ce:ra" khyo dangman" rure Byo yao: yao: sagse: kham byid' ra". Pe"mung:ga"re ai: Byo wa dangman" ru ngad: ra".

⁷Sagse: sam ja: jo; ra".

⁸Ai jham wa Byo- Qid we' Sa: jham ngad: ako". Ai: sagse: sam ja: gu: alhab' wa sagse: daja: re za: kham: ako".

⁹Byu: nho: sagse: dao: re ngonhaung" lam" ra". Ngad qere: Mao"So: sagse: dao: wa je yang: lam ga" ra". Mao"So: sagse: kham: ra" khyo wa yao" yao: Zo" nho: khyo we' sin: yang: ngad: ra".

¹⁰Airumung: Mao"So: yao: Zo: re lam" ra" yaug khag' ngad qere: yao: yao" nhag' lam: khug mae ce: sagse: kham: ru bo: jo; ra". Ngad qere: Mao"So re malam: ra" yaug wa Mao"So re mhug' hab' ga: jho: ra". Pe"mung:ga" re yao: wa yao: Zo" nho: khyo we' sin: yang: Mao"So ta" to" ra" dao: re malam" yang: ngad; ra".

¹¹Ai: sagse: dao: wa Mao"So wa ngonhaung" re apyad ato: kao so' byid' to: mung:- Yao" nho: yao: Zo: wa ai: kao so' nho: ajhaung ngad: ra".

¹²Yao: Zo: re qo" yaug khag' ngad qere: kao so' re qo" yaug ngad: ra". Mao"So: yao: Zo: re maqo" ra" yaug wa kao so' maqo" ngad: ra".

¹³Mao"So: yao: Zo: re lam" ko" ra" mo, naonhaung" wa apyad ato: kao so' re qo" yu vako" ra" khyo re naonhaung" ba genae" qhid' mae" ngo wa naonhaung" re ce: mugsug' tung" vhin: ke' ru ngad: ra".

¹⁴Yao" myid o: rure cao" yang: ngonhaung" wa yao: re daja: ja: mho' yang: ngad: re yao: ngonhaung" re tae" gyo: byid: nae" ngad: rure ngonhaung" jhaug' za: ba: ruyang ngonhaung" wa Mao"So: qhid' kheim: mae mazag mavae qo" vao ye" ra".

¹⁵Ngonhaung" yao: re khonhae" mho' ngad qere: yao: tae" gyo: byid' ra". Cera" khyo dang: rure ngonhaung" ba: ruyang yao: mae" ngonhaung" mho' ra" ja: ngonhaung" re byid' li" nae" rure re: ngonhaung" ba: ra".

¹⁶Mao: nhaung: dayaug shid man" ra" qobo mangad' ra" qobo shad' rure nao myao: re nao wa yao" qhid' mae" Mao"So re akyu" bao" mho' byid: qo: ra". Mao"So wa yao: re kao so' byid' li" nae". Ceru wa shid man" ra" qobo mangad: lo: qobo shad' ra" mo; qhid' mae" za: ngad: ra". Ngad qere: shid man" ra" qobo ga" ru jo; ra". Shid man" ra" qobo shad' ra" mo; qhid' mae" akyu" bao" mho' byid: ca" ein: ta" ru mangad:-

¹⁷Shad' nghung" ra" lo, mau" alhab' wa qobo ngad: ra". Ngad qere: shid man" ra" qobo mangad: ra" qobo ga" ru jo; ra".

¹⁸Mao"So: zo: dau ngad yaug wa xo' yang: qobo makad' rure ngonhaung" ba: ra". Pe"mung:ga"re Mao"So: yao: Zo: wa yao: re gug: gam byid: yang: makhyang" ra" yaug wa yao: re dae maqo" te' ngad: ra".

¹⁹Mug: myid geim" wa ai: makhyang" yaug: yang eib: ra" qao: mae ngad: jo, sho' ngad qere: ngonhaung" wa Mao"So: byu qe ngad: rure ngonhaung" ba: ra".

²⁰Dang man" ra" Mao"So re ngonhaung" ba nae" qhid' mae" Mao"So: yao: Zo: wa joe" li" mung: ba: gyo" ra" laba lajhao re byid: yaug ngad: rure ngonhaung" ba: ra". Ngonhaung" wa dangman" ra" Mao"So we' dagaung dasho: doe; na: ra". Ai wa Yao" yao: Zo: Yesu Khristu we' ngonhaung" dagaung dasho: za: doe; na: ru ngad: ra". Ceru wa dangman" ra" Mao"So ngad mung: ce wa apyad ato kao so' ngad: ra".

²¹Nga" zo: dau qe we"- so apyag' jham re jao" pye' ge,.