Read Maru TARHA" AGYI 10 Bible Online

TARHA" AGYI 10 - Maru bible

TARHA" AGYI 10

¹Abimeleg shid thao re Pua nho: yauggai zo: ngad mung: Dodo nho: yao: myid: Tola wa Israel byu qere loe; beim nhao nae" joe" li" ra". Yao: wa Isakha amyu" kaung mae" ngad mung: Ephrim bam mug: Shamira mae na yaug ngad: ra".

²Yao: wa shid' xe: sam zin Israel byu qere au: jhaung kad' yang: na: ra". Ai: thao yao: shid: lo" mung: Shamira mae nyhab' pye' ako".

³Tola thao re Gilead mae" Yaira po" thug' li" ra".

⁴Yao: wa shid' xe: shid' zin Israel byu qere au: jhui" ra". Yao wa loze sam xe dau: dao mae jhui" ra" yauggai zo: sam xe yaug qo" ra". Yao: bam wa Gilead mung" mae vogaung: sam xe qo" ako". Aijham re ana" ba joe" sho' Yaira vogaung: jham ga: mhang" ashiko".

⁵Yaira wa shid lo" mung: Kamon mae nyhab' pye' ako".

⁶Israel byu qe wa Bala we' Astard so jham re Suri so- Sidon so- Moba so- Amon so- Philisti so jham re caung" pa" ko" ra" khyo" yang ASANG re qobo dalhang dam: shad' lhoe" ako". Yao: bam wa ASANG re to" pye' mung:- yao: re caung:pa" byid' ru thang: pye' ako".

⁷Airumung: ASANG wa Israel byu qere nhag' yo" ra". Amung: Philisti we' Amon byu qere yao: bam re aung: pye' nhao: ra".

⁸Pe"mung:ga"re yao: bam wa Gilead mung" mae Yodan gyaung: ba thug' shad' Amori mung" mae na ko" ra" Israel byu qere daxe: she' zin lam: lam: deim" zag zo: mung: yhin" lo: ako".

⁹Amon byu qe wa Yuda- Benyamin- Ephrim amyu" kaung qere khe' zin: nae" qhid' mae" Yodan gyaung: re lhao" gau" de; ako". Isreal byu qe wa qi: sho' kyi" khyag' ru qhug' ako".

¹⁰Ai: thao Israel byu qe wa ASANG re yao mung: ngonhaung" wa nao re qobo shad' lhoe" bam va". Pe"mung:ga"re ngonhaung" nho: Mao"So nao re ngonhaung" to: co' mung:- Bala so jham re caung:pa" bam va" ga: ta" ako".

¹¹ASANG wa yao: bam re ce: dao: phyid byid' ra". Aiwa- Egutu- Amori- Amon- Philisti-

¹²Sidon- Amaleg- Maon byu qeyang lai: lo: yo, mae naonhaung" re zag zo" lo gemung: naonhaung" ngore yao: ako". Naonhaung" re yao: bam: lo, mae" ngo makhyad' yu: lo i?

¹³Ngadqere: naonhaung" wa ngore to" pye' mung: gatau so jham re caung:pa" shiko" ra". Aimung: naonhaung" re ngo madam: khyad' yu lo nae".

¹⁴Naonhaung" khyin: yu: ra" so jham khyo ye: yang: yeyao ge,- naonhaung" qug: khai: qhug' lao" yao: bam re khyad' yu nhao ge,- ga: ta" ra".

¹⁵Ngadqere: Israel byu qe wa ASANG re ngonhaung" qobo shad' lhoe" va"- nao o: khyo" kad' wa,. Ngadqere: ana" ngonhaung" re khyad' yu la,- ga: ta" ako".

¹⁶Airumung: yao: bam wa yao: bam: taung bug so jham re yu pye' mung:- ASANG re caung:pa" ako". Yao: wa Israel byu qenho: qug: khai: kyi" khyag' rure myid: ci" byid' ra".

¹⁷Ai: thao Amon gyetab wa gyekhe' poe qhid' mae" nyhang" seim" mung: Gilead mae jamu li" kad' na: ako". Israel byu qe wa zang" phaung mung: Gilead mae" Mizpa mae jamu kad' na: ako".

¹⁸Aimae amyu" byu qe we' Israel amyu" kaung qenho: au: jhaung qe wa yao: cao:- Amon byu qere khag' au: she yang: gye jhui" zin: nae" i? Au: jhaung kad' nae" yaug khag' ngadqere: Gilead mae na: ra" mo, alhab' nho: au: jhaung ngad: li" nae" ga: jho" ta" ako".