Read Maru TARHA" AGYI 11 Bible Online

TARHA" AGYI 11 - Maru bible

TARHA" AGYI 11

¹Gilead mae" sulhe: gyezo: pho" Yebtha wa shava myhi" nho: yauggai zo: ngad: ra". Yao: pho" Gilead wa yao" yham sang myhi" gatau: yang khau: ra" yauggai zo: gatau qere: qo" ra".

²Yao: bam qi" li" gelao"- Yebtha re yham mae" khe' thug' pye' ako". Yao: bam wa yao: re nao wa ngonhaung" nho: yao: pho" ma daja: rere: maqo" sang nae"- nao wa gamyhi" zo: ngad: ra" ga: ta" ako".

³Yebtha wa yao: mao: yao: nhaung: qe mae" phao: ye: mung: Toba mung" mae yena: ra". Aimae byugao: qe daphung: re yao: zhang: yu mung: yao: bam wa yao: we' daga" du" lhang: lhau: ako".

⁴Dayo, zo: kyo thao re Amon byu qe wa Israel qere gyekhe' nae" to" ako".

⁵Ceru: boe" lao"- Gilead mae" au: jhaung qe wa Toba mung" mae" Yebtha re yedam: tug jhui" lo: ako".

⁶Yao: bam wa yao: re- Amon byu qere ngonhaung" gye qo" zin: nae" qhid' mae" ngonhaung" re au: jhui" she la,- ga: ta" ako".

⁷Ngadqere: Yebtha wa naonhaung" ngore gyai nghang" geyang: nga" pho" yham mae" ngore naonhaung" khe' thug' ke' ko" ra. Ana" naonhaung" qug: khai: qhug' gelao" pe"mung: ngojhao" li" i? ga: tau" ra".

⁸Yao: bam wa Yebtha re- nao ngonhaung" we' daga" Amon byu qere gye li" bozin: mung: Gilead byu alhab' re au: jhui" she nae" rure ngonhaung" o yang ana" ngonhaung" nao jhao" phaug' lo ru ngad: ga: tau" ako".

⁹Ailao" Yebtha wa naonhaung" wa ngore Amon byu qere gyekhe' nae" yham khyo jhui" tug' lo" gemung:- ASANG ngore aung: pye' nhao yang: ngad: re ngo wa naonhaung" zug: kad' nae"- ga: ta" ra".

¹⁰Yao: bam wa- ngonhaung" myid vang" ra"- ASANG wa ngonhaung" sagse: ngad: ra" ga: phaug' tau" ako".

¹¹Airumung: Yebtha wa Gilead au: jhaung qe we' daga" cao" ye: mung: mo,byu qe wa yao: re yao: bam: zug: we' au: jhaung kad' nhao: ako". Yebtha wa ASANG: qhid' kheim: Mizpa jo, qo mae yao" khyo re ta" pyo: ra".

¹²Ai: thao Yebtha wa Amon kho:kham jhao" lagyo: jham nhao: ke' mung: nao ngonhaung" we' jho" byo; nae" ru wa pe" ngad: i? Nao pe"mung: ngonhaung" mung"dan: khyo jhin" vao li" i? ga: ta" nhao: ke' ra".

¹³Amon kho:kham wa Yebtha nho: lagyo: qere- Israel byu qe Egutu mung" mae" thug' lo ko" au:- yao: bam wa nga" mug: myid re- Arnon gyaung: mae" Yabog gyaung: joe" sho' we' Yodan gyaung: joe" sho' re yu: pye' byid: geli"- ana" naonhaung" ai mug: myid re ngaui pyo: yaug yo za: dam: tug' byid: qo: ako"- ga: tau" ra".

¹⁴Yebtha wa Amon kho:kham re ce: dao: phyid we' daga" lagyo: qere dam: tug' nhao: ke' ra".

¹⁵Israel byu qe Moba mung"- mangad: lao" Amon mung" re yu: pye' ra" khyo wa madang ngad: ra".

¹⁶Cekhyo wa ceru: boe" ru ngad: ra". Israel byu qe Egutu mung" mae" to" lo" ko" au:- yao: bam wa din"pyad' yo re su" lai: ye: mung: Pang:lai:: ne qid kaui ye: yang: Kade khyo joe" ye" ako".

¹⁷Ailao"- yao: bam wa Edom kho:kham re yao" mung"dan: khyo" su" lai: ye: nae" akhang" mho' nae" qhid' mae" lagyo: qere nhao: ke' ako". Ngadqere: Edom kho:kham wa yao: bam re akhang" manug: byid: ngad: ra". Yao: bam wa Moba kho:kham rere: akhang" mho' ako". Ngadqere: yao: re: yao" mung"dan: khyo" su" lai: lo" nae" yao: bam re akhang" mabyid: ngad: ra". Airumung: Israel byu qe wa Kade mae thang: na: jo; ako".

¹⁸Amung: yao: bam wa Arnon gyaung: thoete' Moba ba thug' shad' khyo joe" ye: sho' din"pyad' yo khyo" Edom we' Moba mung" re su" lhang" qin" ako". Yao: bam wa ai tau mae jamu kad' na: ako". Yao: bam wa Moba mug: kyo: ngad: ruyang Arnon gyaung: re magau" de; ye: ngad ako".

¹⁹Ailao" Israel byu qe wa Heshbon mae" Amori kho:kham Sihon jhao" lagyo qere nhao: ke' mung:- yao" mung"dan: khyo" yao: bam: mung" khyo su" lai: ye: nae" qhid' mae" yao: re akhang" mho' nhao: ke' ako".

²⁰Ngadqere: Sihon wa Israel qere akhang" mabyid: tho' mago" yao" gyetab geim" re zhang: yu yang: Yaha mae jamu kad' na mung: Israel qere gye zin" ra".

²¹Ngadqere: Israel nho: ASANG Mao"So wa Sihon we' yao" tab re Israel qere aung: pye' nhao: ra". Airumung: Israel byu qe wa ai: mung"dan: mae na ko" ra" Amori byu qe: mug: myid alhab' re sang: yu: pye' ako".

²²Yao: bam wa mug: thao shad' mae Arnon gyaung: mae" mug: am: shad' Yabog gyaung: joe" sho'- ba thug' shad' din"pyad' yo mae" ba vao shad' Yodan gyaung: joe" sho' ngad: ra". Amori byu qe: mug: myid alhab' re sang: yu: ako".

²³Amung: airu wa- yao" byu qe ngad: ra" Israel qe: qhid' mae" Amori byu qere khe' thug' pye' byid' ra". Israel byu qenho: Mao"So ASANG kad' ru ngad: ra".

²⁴Nao ai rure dam: tug' yu nae" seim" i? Nao wa ni" so Khemo yang byid' to" ra" gu: re qo" sang: ra". Ngadqere: ngonhaung" wa ngonhaung" nho: ASANG Mao"So yang ngonhaung" re yu byid' to" ra" gu: ja: khao: ngo" re sang nae".

²⁵Nao wa- Moba kho:kham Zippo yauggai zo: Balag tho' je yaug ngad: ein: jho: i? Yao: khonhae" Israel qere myo, byo, qho: qu" ra" i? Yao: ngonhaung" re gye li" khe' qu" ra" i?

²⁶Israel qe wa Heshbon Aroe lhang" gam: mae" vogaung: jham- Arnon qid yae mae" vogaung: alhab' re sam yo zin lam: lam: sang: to" ako". Ai gyo: mae nao pe"mung: ai: mug: myid jham re madam: tug' yu i?

²⁷Nao re ngo pe" re: mashad'. Nao ngore gyekhe' ra" khyo" yang nao wa ngore shad' na: ra". ASANG wa tarha" agyi ngad: ra". Yao: wa ana" ba Israel byu qe we' Amon byu qe: agyo: mae dao: phyid' li" nae"- ga: ta" ra".

²⁸Ngadqere: Amon kho:kham wa Yebtha ta" ke' ra" mungdao: re matae" gyo: ngad: ra".

²⁹Ailao" ASANG byo wa Yebtha jhao" joe" li" ra". Yao: wa Gilead we' Manashe mug: khyo jao: sho' ye: mung:- Gilead mae" Mizpa khyo tug' lo yang: Amon khyo xo' ye" lo" ra".

³⁰Yebtha wa ASANG re- nao ngore Amon byu qe aung: pye' nhao yang: ngad: re-

³¹Ngo aung poe mae" dam: tug' lo: au:- ngore tug: yu nae" qhid' mae" nga" yham mae" sao qhid' thug' li" ra" yaug re xeim: khyo" ngo nao re phad' ngaui" byid: nae". Ngo wa byu aiyaug re ngaui" xeim: khyo" qhaug' byid: nae"- ga: dao:so: to" ra".

³²Airumung: Yebtha wa Amon byu qere khe' zin: nae" qhid' mae" qid gyaung: re gau" de, ye" ra". ASANG wa yao: re aung doe; ru byid' ra".

³³Yao: wa yao: bam re Aroe mae" Minnid lhang" gam: vogaung: shid' xe alhab' khyo we' Abela Keramim khyo joe" sho' khe' zin" ra". Myo: sho' se' tam" pye' mung: Israel qeyang Amon byu qere aung: pye' ako".

³⁴Yebtha Mizpa- yham khyo phao: lo" au: yao" myiqe: zo: wa yao: re tug: yu nae" qhid' mae" go" yang: jhu pau: be, yang thug' li" na: ra". Yao: wa Yebtha nho: zote: myiqe: zo: ngad: ra".

³⁵Yebtha yao: re myao lao"- kaug' yang: yao" mai bau: jham lao" cad' pye' yang: o"- nga" myiqe: zo: we"- nao wa nga" nhag' lam: re go; sin" lo" nhao: ava". Pe"mung: ngore kaug' nhao nae" yaug nao boe" ca" i? Ngo wa ASANG re jhaug' zaug: ra" dao:so: dalam: byid' to: va". Aire magai: qo" tug' yu: lo:- ga: ta" ra".

³⁶Yao: wa yao: pho" re- ASANG wa ni" gyevo qe ngad: ra" Amon byu qere loge, phaug' byid: nhao va" ruyang- nao ASANG re dao:so: byid' to: yang: ngad: re wa nao nga" dao mae kad' nae" ta" ra" mau" re kad' wa,- ga: ta" ra".

³⁷Ngadqere: yao: wa yao: pho" re- nga" qhid' mae" ce daja: re kad' byid: la,- ngo wa khonhae" re: yham maqo" lo nae" ngad: ruyang ngo wa nga" byin cao: qe we' daga" bam jham khyo ye: mung: kaug' ngug: du" lae" qin" nae" qhid' mae" ngore za: lho" shid' khye' nha: to: la,- ga: ta" ra".

³⁸Ailao" Yebtha wa yao: re lho" shid' khye' yena: lhau nae" ye: nhao: ke' ra". Yao: we' yao" byin cao: myhi" qe wa- yao: yham maqo" lo nae" ngad: ruyang bam jham khyo do, ye: mung: ye kaug' ngug: ako".

³⁹Lho" shid' khye' thao re yao: wa yao: pho" khyo dam: tug' joe" lo: ra". Yebtha wa ASANG re yao: dao:so: byid' to" rure kad' ra". Yao: wa zomyi: gyang" ngad: ra".

⁴⁰Ceru wa Israel myiqe: qe wa Gilead mae" Yebtha nho: myiqe: zo: qhid' mae" thug' ye: mung: zin khao: ngo" byid ba ye kaug' ngug: qin" ra" thung" li Israel amyu" qemae boe" thug' li" ra" khyo ajhaung ngad: ra".