Read Maru TARHA" AGYI 12 Bible Online

TARHA" AGYI 12 - Maru bible

TARHA" AGYI 12

¹Ephrim byu qe wa gyekhe' poe qhid' mae" seim" jin" ako". Yao: bam wa Yodan gyaung: re gau" de, mung: Zaphon khyo ye: yang: Yebtha re- nao wa ngonhaung" re nao we' daga" makhai: jhui: lo: Amon byu qere gye zin: nae" qhid' mae" nao pe"mung: mug: kyo: re lai: phyid' ye" i? Nao re yham we' daga" ngonhaung" ngha" pye' nae"- ga: ta" ako".

²Ngadqere: Yebtha wa yao: bam re- nga" byu qe we' ngo wa Amon byu qe we' gyai xo sho' jho" myan" myo: va". Ngo wa naonhaung" re khai va"- ngadqere: naonhaung" wa yao: bam: lo, mae" ngore makhyad' yu ko" ngad: ra".

³Ngo wa naonhaung" maye: genae" ngad: rure myao lao" nga" kao so' re dan: pye' mung: yao: bam re khe' zin: nae" qhid' mae" mug: kyo: re lai: phyid' ye" ra". ASANG wa ngore yao: bam re aung: pye' nhao: ra". Aire ana"- naonhaung" wa ngore gyezin: nae" pe"mung: joe" li" ko" i? ga: ta" ra".

⁴Ailao" Yebtha wa Gilead byu qe alhab' re khai: zhang" yu mung: Ephrim byu qere khe' zin: gemung: yao: bam re aung: pye' ako". (Ephrim byu qe wa- Ephrim we' Manashe mug: myid mae na ko" ra" naonhaung" Gilead byu qe we"- naonhaung" wa Ephrim mae" khug' phao: ra" gyezo: phao qe ngad: ako" ga: ta" qu" ko" ra".)

⁵Ephrim byu qe maphao: loe, genae" qhid' mae" Gilead byu qe wa Yodan gyaung: gau: khung: jham re sang: ci: ako". Ephrim byu dayaug yaug phao: loe, nae" seim" yang: qid gau" de, nae" akhang" mho' mung:- Gilead byu qe wa aiyaug re- nao Ephrim byu ngad: i? ga: myid: gelao"- yao: wa mangad: ga: ta" yang: ngad: re-

⁶Yao: bam wa yao: re- Shiboled ga: yao: re ta" nhao: ako". Ngadqere: yao: wa Siboled ga: ta" ra". Pe"mung:ga"re yao: wa aire jo sho' magai: ta" thug' ngad: ra". Ailao" yao: bam wa yao: re taung" yu mung: ai tau Yodan gau: khung: mae" dalam: mae yao: re se' pye' ako". Ai: ayo, mae Ephrim byu byid tug: shid' taung re se' pye' ako".

⁷Yebtha wa Israel byu qere khyaug' zin jhui" au: she: na: ra". Ai: thao yao: shid: lo" mung: yao" co' phyid' vogaung: Gilead mae nyhab' pye' ako".

⁸Yebtha thao re- Betlehem mae" Ibzan wa Israel byu qere jhui" au: she: ra".

⁹Yao: wa Yauggai zo: sam xe yaug we' myiqe: zo: sam xe yaug qo" ra". Yao: wa yao" myiqe: zo: qere taung bug amyu" kaung qere byid: zho: mung:- yao" yauggai zo: qe lo, xo' yu nae" qhid' mae" taung bug amyu" kaung mae" myiqe: nau" sam xe yaug re jhui" yu: ra". Ibzan wa Israel byu qere nhad' zin lam: lam: jhui" au: she: ra".

¹⁰Ai: thao yao: wa shid: lo" mung: Betlehem mae nyhab' pye' ako".

¹¹Ibzan thao- Zebulun kaung mae" Elon wa Israel byu qere daxe zin au: jhui" she: ra".

¹²Ai: thao yao: wa shid: lo" ra". Yao: re Zebulun mug: kyo: mae" Aiyalon mae nyhab' pye' ako".

¹³Elon thao- Pirathon mae" Hile nho: yauggai zo: Abdon wa Israel byu qere jhui" au: she: ra".

¹⁴Yao: wa loze nhad' xe dau: dao mae zaung ko" ra" yauggai zo: byid xe zo: we' yao: myid: yauggai nau" sam xe zo: qo" ra". Abdon wa Israel byu qere she' zin" au: jhui" she: ra".

¹⁵Ai: thao yao: wa shid: lo" mung: Amaleg byu qenho: bam mug: mae" Ephrim mug: kyo mae jo, ra" Pirathon mae nyhab' pye' ako".