Read Maru TARHA" AGYI 15 Bible Online

TARHA" AGYI 15 - Maru bible

TARHA" AGYI 15

¹Dayo, kyo thao re Samson wa jung: gaug yad yo, gyo: mae yao" yham sang myhi" re ye qhug' nae" qhid' mae" cad' be, nau" dadau: she yang: ye" ra". Yao: wa myiqe: nau" yao: pho" re- nga" yham sang myhi" qe, khyo ngo vao ye: nug: ra"- ga: ta" ra". Ngadqere: yao: wa ye: nae" akhang" mabyid: ngad: ra".

²Yao: wa Samson re- nao wa yao: re nghang" ru gaigai: yao: ngo myid: jho mung:- ngo wa ni" byin cao: pho" re byid: zho" pye' va". Ngadqere: yao: nhaung: je: yaung" ru dayaug na: ra" ai: atha" nao aiyaug re yu wa,- ga: ta" ra".

³Samson wa celhang wa Philisti byu qere kad' ra" mau" zo" qhid' mae" ngo qo mayu nae"- ga: ta" ra".

⁴Airumung: yao: wa thug' ye" lo" mung: zag ne sam yo dau: yetaung" yu: ra". Shid' dau: dazam" zam" shomyi: we' shomyi: jho" xo' taui: byid: yang: taui: pad' mae myidam myag: te' ra".

⁵Ai: thao yao:wa myidam re myi: te' mung: zag ne jham re Philisti byu qenho: jung: gaug yo khyo pheim: nhao: ke' ra". Ceru: yao: wa yad: to" ra" jung: gaug re za: mangad: yo jham mae yaug: jo, shi" ra" jung: gaug jham re ngha" khyo" pye' byid' ra". Zhan:lun: khyae jham rere: ngha" pye' byid' ra".

⁶Ceru khag' kad' ga: Philisti qe myid: gelao"- yao" yaug pho" ngad: ra" Timna vobyu dayaug wa Samson nho: yham sang myhi" re Samson nho: byin cao: pho" re byid' zho" pye' yang: Samson kad' rure ba: yu: ako". Airumung: Philisti byu qe wa ai: myiqe: myhi" re yengha" se' pye' mung: yao: pho" yham rere: ye ngha" khyo" byid' ako".

⁷Samson wa yao: bam re- naonhaung" ceru: kad' ko" ruyang lage, bin: phaug' byid: sho' ngo mathang nae" ein: ngo jham tang" ra"- ga: ta" ra".

⁸Yao: wa yao: bam re qu" gyaug qu" lhaung yekhe' zin: mung: yao: bam mae" myo: sho' re se' pye' ra". Ai: thao yao: wa Etam laug byo, mae" laug aug' mae yena: jo; ra".

⁹Philisti byu qe wa li" mung: Yuda mung" mae jamu li" te" mung: Lehi vogaung: re gye li" zin" ako".

¹⁰Yuda byu qe wa yao: bam re naonhaung" pe"mung: ngonhaung" re gye zin: ko" i? ga: myid' ako". Yao: bam wa- ngonhaung" Samson re taung" yu mung: ngonhaung" re yao" yang kad' ru we' dakhyo:- yao: rere: ngonhaung" kad' nae" qhid' mae" joe" li" ru ngad: ga: tau" ako".

¹¹Airumung: Yuda byu qe sam taung yaug Etam laug byo; mae" laug aug' khyo ye: yang: Samson re Philisti byu qe wa ngonhaung" re eib mo, ngad: rure nao maba i? Nao ngonhaung" re pe" kad' va" i? ga: ta" ako". Yao: wa yao: bam ngore kad' ra" gu: za: ngo yao: bam re kad' ru ngad:- ga: tau" ra".

¹²Ailao" yao: bam wa ngonhaung" nao re yao: bam: lo, khyo qo" byid: sho' nao re taui" yu nae" qhid' mae" ce jo, qo khyo ngonhaung" joe" li" ru ngad: ga: ta" ako". Samson wa naonhaung" yao" lo; yang yao: ngore mase' genae" ein: ra" dao: ngore byid: gela,- ga: ta" ra".

¹³Yao: bam wa gai:- ngonhaung" wa nao re taui: za: taui: mung: yao: bam: lo, khyo ab byid: nae". Ngonhaung" nao re mase' nae" ga: ta" ako". Airumung: yao: bam wa yao: re taui: asag' shid' khe' yang taui: mung: ai: laug byo, mae" yao: re jhui" tug' lo: ako".

¹⁴Yao: Lehi khyo joe" lo lao"- Philisti byu qe wa yao: jhao" tao" li" mung: yao: re hug' ako". ASANG: qam: so' wa yao: re qam: bo nhao mung: yao" lo,pau" we' lo, mae taui" to" ra" taui: jham wa khyang we' dakhyo: byid: lo" byaug: ako".

¹⁵Ailao"- yao: wa mataung" myao" shire shid: ra" Loze mae" ae khao: dalam: re qho: myao: ra". Aire gaug: yu mung: ai: yang byu dataung yaug re se' pye' ra".

¹⁶Airumung: Samson wa loze ae khao" yang ngo byu dataung re se' pye' va". Loze ae khao: dalam" yang ngo yao: bam re mao bam bam nhao va" ga: nghaui" caung" ra".

¹⁷Ai: thao yao: wa ai: ae khao: re shapye' pye' ra". Ceru: boe" ra" jo, qo re Ramad Lehi ga: mhang" ako".

¹⁸Ai: thao Samson wa qid gyai shab' li" mung: yao: wa ASANG re nao wa ngore ce: qi" qhang: ra" aung doe; rure ngore byid' ra". Ana" ngo qid shab' yang: shid: lo" na: kyi: va". Ce: Mao"So re malam" ra" Philisti byu qeyang taung" yu: ru qhug' zai i? ga: yao: ra".

¹⁹Ailao" Mao"So wa ai: Lehi jo, qo mae myid khyaung dalam: phung" byid' ra". Aimae" qid yug: thug' li" ra". Samson wa aimae" shaug' mung: na pyo" li" ra". Airumung: ai: qid thug' re Hakore ga: mhang" ako". Airu wa ana" ba joe" sho' Lehi mae jo; ashi".

²⁰Samson wa Philisti eib: ra" ayo, gyo: mae shid' xe zin Israel byu qere jhui" au: she byid' ra".