Read Maru TARHA" AGYI 17 Bible Online

TARHA" AGYI 17 - Maru bible

TARHA" AGYI 17

¹Dalhang mae Ephrim bam mug: mae Mikha ga: mang: ra" byu dayaug na: ra".

²Yao: wa yao: myhi" re byu dayaug yaug ni" ngaui dataung: dayo khug' lo" byaug: au:- nao wa ai: khug' hab' re nhang" ra". Nao airu: nhang" ru ngo the' gyo" ra". Qu" wa, ai: ngaui nga" lo, mae jo;- ai: ngaui re yu yaug wa ngo angad:- ga: ta" ra". Yao: myhi" wa- nga" zo: we"- ASANG nao re shaman" byid: vashao:- ga: ta" ra".

³Yao: wa ai: ngaui re yao: myhi" re dam: tug' byid' ra". Ailao" yao: wa- nga" zo: re nhang: kheim: mazao" nae" qhid' mae" ai: ngaui re ngo yao: ASANG re qhaug' byid' ra". Sag' yang kad' ra" so alho re ngaui: yang thab' rumae ci nae" qhid' mae" ngad: ra". Airumung: ana" ai: ngaui nao re dam: tug byid: nae"- ga: ta" ra".

⁴Ai: thao- ai ngaui jham yao: myhi" re dam: tug' byid' ra". Yao: myhi" wa aimae" ngaui shid' yo kye' re- yu mung: sag' yang so alho kad' mung: aire ngaui: yang thab' lham" ra" to' lo, mau" zaui: yaug re byid' ra". Aire Mikha nho: yham mae to" to" ako".

⁵Mikha ceyaug wa yao: yao: caung:pa" nae" jo, qo qo" ra". Yao: wa so alho daqhae: we' qao nghoe' dalam re kad' mung: yao" yauggai zo: qemae" dayaug re khinjaung khyo" san: to" ra".

⁶Ai: ayo, mae Israel mung" mae kho:kham mana ngad: ra". Yaug khao: ngo" yao: yao: o: ra" khyo" kad' ako".

⁷Ai: ayo, mae yao: Yuda mung" mae" Betlehem vogaung: mae Levi zolau: dayaug na: ra".

⁸Yao: wa Betlehem mae" to" mung: na jo, qo gatau yeqho: ra". Yao: gyaung: su" qin" au:- Ephrim bam mug: mae" Mikha nho: yham khyo joe" lo: ra".

⁹Mikha wa yao: re- nao khai: mae" joe" li" i? ga: yao: re myid' ra". Yao: wa- ngo wa Yuda mung" Betlehem vogaung: mae" Levi byu dayaug ngad:- ngo wa na jo, qo qho: qin" yaug ngad:- ga: tau" ra".

¹⁰Mikha wa- ngo we' daga" na lang:- nga" pha,jhi" byid: yaug we' nga" nho: khinjaung- ngo wa nao re dazin re ngaui daxe kye' ve,mai ve,bau: daqhae:- zo:ve byid: nae" ga: lhaung: ra".

¹¹Ai: Levi zolau: wa Mikha we' daga" na nae" myid vang" mung: yao: zo: we' dakhyo: boe" lo: ra".

¹²Mikha wa yao: re yao" khinjaung khyo" san yu mung: yao: wa Mikha yham mae na: ra".

¹³Mikha wa- ana" nga" khinjaung khyo" Levi byu dayaug qo" va"- ASANG ngore gai kad' byid: nae" rure ngo ba va"- ga: ta" ra".