Read Maru TARHA" AGYI 18 Bible Online

TARHA" AGYI 18 - Maru bible

TARHA" AGYI 18

¹Ai: ayo, mae Israel mung" mae kho:kham mana ngad: ra". Ai: apyad mae Dan amyu" kaung qe wa na jo, qo qho: qin" ako". Pe"mung:ga"re Israel amyu" phaung mae yao: bam yao" mug: myid dacug' re: maqo" khae: yu shiko" ngad: ra".

²Airumung: Dan amyu" kaung qe wa yao: bam: amyu" kaung mae" boe" doe; ra" byu ngo" yaug re khyin: yu: ako". Aimung: ai bam re mug: yequ" nae" jin" byu yekad' nae" qhid' mae" Zoa we' Esthao vogaung: mae" nhao: ke' ako". Yao: bam Ephrim mug: khyo joe" ye: gelao"- yao: bam wa Mikha yham mae yethang: na: ako".

³Yao: bam aimae na: jo; au:- yao: bam wa ai: Levi zolau: pho" myan" re ba: xam" yu gemung:- yao: jhao" ye: mung:- nao cetau mae pe" kad' na: i? Nao re cekhyo khag' yang jhui" lo: i? ga: myid' ako".

⁴Yao: wa ngore khinjaung khyo" caung da" nae" aphug' byid' ra" Mikha we' nga" shid' yaug mau" jho" dang: to"- ga: tau" ra".

⁵Yao: bam wa jeju khyo"- ngonhaung" gyaung: khyo aung myaug nae" ru Mao"So re myid: byid: la,- ga: ta" ako".

⁶Khinjaung pho" wa- naonhaung" pe" maci" ca" ngad: ako". ASANG wa ce: gyaung: khyo re qu" gam byid' na: ra" ga: tau" ra".

⁷Ailao" ai: byu ngo" yaug wa to" mung: Laisha vogaung: khyo ye" lo" ako". Yao: bam wa ai: mae" mo, wa Sidon byu qe we' dakhyo: gug: gug: za: na ko" rure myao: ako". Yao: bam wa yaug yo nau" nhae" mo, khag' we' pe" myan" majho" myo: mo, ngad gemung: yao: bam qo ca" gu: jab sho' qo" mo, ngad: ako". Yao: bam wa Sidonian byu qe we' jho" va: mung: gatau khag' we' re: majho" zam" khug mo, ngad: ako".

⁸Ai: byu ngo" yaug Zoa we' Esthao khyo dam: tug' joe" lo gelao"- yao: bam: mug: bao: wa yao: bam pe" myao: lo ko" ra" khyo myid' ako".

⁹Yao: bam wa sage,- Laisha re gye yezin: gelang: ngonhaung" wa mung: myid myao va"- ai wa gyai gai: ra". Cemae pe" dakad' na lage,- phyad mung ge,- ai: mug: re yesang: yu ge,-

¹⁰Naonhaung" aikhyo joe" re: byu qe wa mabeim: maso: na: jo; ko" rure naonhaung" myao: li" genae"- ai: mung" wa gyai qi" ra". Byu qo: ja: alhab' jo; ra" aire Mao"So wa naonhaung" re byid' to" ava" ga: phaug' tau" ra".

¹¹Airumung: Dan amyu" kaung mae" khyaug' yo yaug wa Zoa we' Esthao mae" to" mung: gyekhe' poe qhid' mae" jin" jin" ngad: ako".

¹²Yao: bam ye" lo" mung:- Yuda mae" Kiriad Yearim ba vao shad' mae jamu yete" na: ako". Ce: mathao mae ana" joe" sho' Dan qenho: Jamu ga: mhang" ashiko".

¹³Yao: bam wa ai: jo, qo mae" xo' ye" lo" mung: Ephrim bam mug: mae" Mikha nho: yham khyo joe" lo: ako".

¹⁴Ailao"- Laisha mug: lhang" gam: mug: khyo jin" byu kad' nae" ye: ko" ra" ai: byu ngo" yaug wa yao: bam: zam" cao: qere- Cetau mae ai: yham jham mae" dayham mae ngaui: yang thab' to" ra" sag' solho dalam: jo, rure naonhaung" ba ko" i? Ai mae gatau so alho jham we' qao nghoe' dalam: re: jo; ra". Ngonhaung" pe" kad' ang: ein: naonhaung" myid ko" i? ga: ta" ako".

¹⁵Airumung: yao: bam wa Levi zolau: pho" na: ra" Mikha nho: yham khyo ye: mung: Levi byu re yao: pe" kad' na: ra" khyo re myid' ako".

¹⁶Dan amyu" kaung gyezo: qe khyaug' yo zo: wa gyekhe' poe qhid' mae" jin" jin" kad' mung: kham: dung: mae ye; jo, ko" au:-

¹⁷Ai: jin" byu ngo" yaug wa yham khyo din: za: vao ye: mung: ngaui: yang thab' to" ra" sag solho we' gatau solho jham we' qao nghoe' re yeyu: yu: ako". Ai: au:- khinjaung pho" wa shae lhae ci: ra" gyezo: khyaug' yo zo: we' daga" kham: dung: mae ye; jo; ra".

¹⁸Ai: byu qe Mikha yham khyo vao ye: mung: gyang" lho" zai jham ye yu: na: ra" au:- khinjaung pho" wa yao: bam re- naonhaung" pe" kad' na ko" i? ga: myid' ra".

¹⁹Yao: bam wa yao: re sae za: na wa,- dao: dajhau wa,- ngonhaung" we' daga" cao: li" mung: ngonhaung" nho: khinjaung we' pha,jhi" byid: yaug li" kad' wa,- byu dayaug: nho: dinkhu: dalam: qhid' mae" khinjaung kad' ra" tho' Israel byumyu" geim" nho: khinjaung kad' nae" je: gai: mangad: i? ga: ta" ako".

²⁰Ce: dao: wa khinjaung pho" re gyai ngaui pyo: nhao: ra". Airumung: yao: wa ai: gyang" lho" zai jham re yu: ci mung: yao: bam: thao cao" lo" ra".

²¹Yao: bam lhang: lo mung:- yao: bam: zoshao qe- yao: bam: gug'nyhug' jham yao: bam: jo,nho" zai jham qhid' au: mae ke' yang: to" lo" ako".

²²Mikha yao" yham kyo: cao: qere gye poe qhid' mae" khai: ra" au:- yao: bam wa ai: yham mae" dajhid' va: sho' su" lo" avako".

²³Yao: bam wa Dan: kaung qere cao" myhi mung:- yao: bam re hug' ako". Dan: amyu" kaung qe wa lhang: lo mung:- Mikha re- pe" nam i? Ce: mo, byu qe pe"mung: cao" li" ko" i? ga: myid' ako".

²⁴Mikha wa- naonhaung" khoru: ein ko" i? Pe" ein: kad' ko" i? Naonhaung" wa nga" khinjaung we' ngo kad' to" ra" solho jham re yu yang: thug' lo" ako". Ngo pe" qo" lo" i? ga: tau" ra".

²⁵Dan kaung mae" mo, wa- nao pe" mata" re je: gai: ra". Airu: mangad: re cebam nhag' yo" li" mung: nao re gye zin" li" genae". Ailao" nao we' ni" yham byu qe alhab' shid genae"- ga: ta" ako".

²⁶Ai: thao Dan kaung mae" mo, wa xo' yang: ye" lo" ako". Yao: bam wa yao" qhid' mae" qam: saung" bo ko" rure Mikha myao: ra". Airumung: yao: wa yham khyo dam tug' phao: lo: ra".

²⁷Dan kaung mae" mo, khinjaung we' Mikha kad' to" rure yu: pye' byid: gethao re- yao: bam wa ngaui pyo: yaug yo: ra" vogaung:- Bethrehoba ru" ra"- ai: lao" khaung: mae yao: na ko" ra" yaug yo nau" nhae" ra" byu qe ngad ko" ra" Laisha vogaung: khyo ye: mung: gye yezin" ako". Yao: bam wa ai: vogaung: byu qere se' pye' yang: vogaung: re ngha" pye' ako". Yao: bam re khyad' yu nae" khag' mana ngad: ra". Pe"mung:ga"re Laisha wa Sidon we' gyai va" ra". Yao: bam wa gatau qe we' majho" zam" ngad: ako". Dan kaung mae" mo, wa vogaung: te: yang: aimae thang: na: ako".

²⁹Yao: bam wa yao: bam: phug' pho" Yaku yao: zo: Dan re cao" yang:- Laisha mae" Dan ga: mang tha" mhang" pye' ako".

³⁰Dan byu qe wa aire caung:pa" nae" qhid' mae" solho re tau: to' to" ako". Moshe yao: myid: Gershom nho: yauggai zo: Yonathan we' yao" myid:zo: qe wa yao: bam nho: khinjaung qekhyo"- amyu" byu qe taung" jhui" lo" ru qhug' ko" ra" ayo, joe" sho'- Dan amyu" kaung qenho: khinjaung kad' ako".

³¹Mikha nho: solho wa ai: jo, qo mae Shilo mae Mao"So re caung:pa" ra" Zaung jo; jo; ra" myhao" aimae jo; ra".