Read Maru TARHA" AGYI 3 Bible Online

TARHA" AGYI 3 - Maru bible

TARHA" AGYI 3

¹Airumung: ASANG wa Khanan mung" mae gyekhe' poe mavao: qu" lai: lo ko" ra" Israel byu qere jham" qu" nae" qhid' mae" byumyu" daqae: re ai mung"dan: mae tang" to: byid' ra".

²Yao: wa ceru re Israel byu qae: khao: ngo" gyekhe' poe qhid' mae" za: kad' ru ngad: ra". Jeyang: wa qhid' phyao: gyekhe' poe mae khonhae" re: mabo: qu" ra" mo; qhid' mae" ngad: ra".

³Ai: mung"dan: mae na: dang: jo; ra" mo, wa- Philisti vogaung: ngo" lam:- Khanan byu qe alhab' Sidon byu qe we' Baal Hermon bam mae" Hamad bam gyo: khyo joe" sho' na ko" ra" Lebanon bam mae" Hivi byu qe ngad: ako".

⁴Moshe khyo" yang yao: bam: phug' pho" qere ASANG: yang byid' to" ra" amyin" dao: jham re Israel byu qe mho dao: gyo: ko" ra" la,- magyo: ko" ra" la, ein: rure ba nae" qhid' mae" jham" qu" nae" yao: bam re tang" to" ru ngad: ra".

⁵Airumung: Israel byu qe wa Khanan byu qe- Hiti byu qe- Amori byu qe- Perizi byu qe- Hivi byu qe- Yebusi byu qe: phaung mae na: jo; ako".

⁶Yao: bam wa ai bam we' myi:byid: myiyu kad' mung: ai: bam: so jham re caung:pa" ako".

⁷Israel byu qe wa yao: bam: Mao"So ASANG re to" myhid' pye' ako". Yao: bam wa ASANG re qobo shad lhoe" gemung: Bala we' Ashe so jham re caung:pa" ako".

⁸Airumung: ASANG wa Israel byu qere nhag' yo" ra". Amung: Masopotemia kho:kham Kushan- Rishathaim re yao: bam re aung: pye' nhao: ra". Yao: bam wa yao" yang eib: ra" qao: mae she' zin na: ako".

⁹Ailao" Israel byu qe wa ASANG re zag: yao gemung: yao: bam re loe; beim nhao: ra" dayaug re ASANG nhao: ke' byid' ra". Ceyaug wa Khaleb nho: yao: nhaung: Kena nho: yauggai zo: Othnie ngad: ra".

¹⁰ASANG: byo wa yao" dao mae joe" li" mung:- yao: wa Israel byumyu" nho: au: jhaung boe" lo: ra". Othnie wa gyekhe' poe khyo ye: mung: ASANG wa yao: re Mesopotamia kho:kham re aung: pye' nhao: ra".

¹¹Mung"dan: mae byid xe zin ngaui pyo: yaug yo mung:- ai:thao Othnie shid: lo" ra".

¹²Israel byu qe wa ASANG re qobo dam: shad' lhoe" pye' ako". Ce: mathao mae ASANG wa Moba kho:kham Eglon re Israel tho' qam: je: bo nhao: ra".

¹³Eglon wa Amon byu qe we' Amaleg byu qe we' xo' yu: ra". Yao: bam wa Israel byu qere aung: pye' mung: laso' gae vogaung: Yerikho re sang: yu: pye' ako".

¹⁴Israel byu qe wa Eglon eib: ra" qao: mae daxe: she' zin lam lam: na: jo; ako".

¹⁵Ai: thao Israel byu qe wa ASANG re dam: zag: hug' gemung:- yao: bam re loe, beim nhao nae" byu dayaug nhao byid' ra". Ce yaug wa Benyamin kaung mae" Gera nho: yauggai zo: lo, kaung: kaung: yaug Ehud ngad: ra". Israel byu qe wa Ehud re kho:kham pho" Eglon jhao" jhaung qhu" jham we' daga" nhao ke' ako".

¹⁶Ehud wa shae su: shid' shad' de; mung: dadaung" ko qhang: ra" shae pyang: dakhyae: re yao" qhid' mae" be; yu: ra". Yao: wa aire lo, yo shad' phyid' dam: mae yao" mai bau: khug mae myag: te' ci: ra".

¹⁷Ai: thao yao: wa gyai xau yaug ngad: ra". Eglon jhao" jhaung qhu" ceye: byid' ra".

¹⁸Ehud wa jhaung qhu" jham Eglon re bin: byid: lao" yao: wa ai: jhaung qhu" re vin: li" mo, re yham khyo phao: lo" genae" qhid' mae" ta" ra".

¹⁹Ngadqere: Ehud yao: yao: wa Gilgala nhae mae jo; ra" laug pyo' zang jham mae" tug' mung: Eglon jhao" dam: tug' ye yang: kho:kham pho" we"- ni" qhid' mae" dao: nyham: dakheim: ngo qo" ga: lo" ta" ra". Ailao" kho:kham pho" wa yao" daui daui mo, re nga" shid' zo: za: jho" jhau nae" lo" ge,- ga: amyin" byid' ke' ra". Airumung: yao: bam alhab' mo, thug' lo" ako".

²⁰Kho:kham pho" wa yao" cae: ngin" ra" qe, tho' pyae mae yao: za: zaung: jo; au: Ehud wa yao: jhao" te' ye: mung:- ni" qhid' mae" Mao"So mae" joe" li" ra" mungdao: ngo qo"- ga: ta" ra". Ailao" kho:kham pho" wa to" ye; li" ra".

²¹Ehud wa yao" lo, kaung: lo, yang: lo, yo shad' phyid' dam: mae" shae pyang: re she: yu yang kho:kham pho" vae: dug: re thug' kyao" ke' ra".

²²Shae pyang: wa shae zhaug' nab sho' vao lo" byaug mung: aire xau: yang nghoe' pye' ra". Kho:kham pho" Ehud wa kho:kham pho" vae: dug: mae" ai: shae re mashe: yu ngad: ra". Aiwa nhaung thao" shad' khyo kyao" lo" mung: khyid gyo: mae thug' sho' ngad: ra".

²³Ailao"- Ehud wa taung gaung khyo thug' lo" yang: kham: pyid' mung: kham: kyao" kyao" co' yang:- ai:thao yao: thug' lo" ra".

²⁴Daui daui mo, wa joe" li" mung: kham: jham kyao" to" rure lamyao: ako". Kho:kham pho" wa akhug mae ngha ye" na sam" ra" gaza: myid: jho: ako".

²⁵Yao: bam lao" ang: ra" myhao" lao" qu" gengadqere: yao: wa kham: maphung" lo: na: jo; lao"- yao: bam wa kham: thug' re yu mung: phung" ke' ako". Akhug mae yao: bam: asang wa phyao: gaung mae shid: lang" jo; ra".

²⁶Yao: bam airulao" na shiko" au: re Ehud phao: loe; byaug: ra". Yao: wa laug pyo' zang jham re Lai co' mung: Seira khyo phao loe; lo" ra".

²⁷Yao: wa Ephrim bam mug: khyo joe" lao" gyekhe' poe to" ye: nae" qhid' mae" Israel byu qere khai: ra" labo" re mad: ke' ra". Aimung: yao: wa ai bam re bam mug: mae" jhui" gyo" lo" ra".

²⁸Yao: wa yao: bam re nga" thao cao" ge, ASANG wa naonhaung" gyevo Moba byu qere aung: pye' nae" naonhaung" re akhang" byid' ava"- ga: ta" ra". Airumung: yao: bam wa Ehud thao cao" gyo" lo" gemung: Moba byu qe Yodan gyaung: gau" de, genae" ra" jo, qo re sang: yu: pye' ako". Yao: bam wa dayaug rere: gau" de; nae" akhang" mabyid: ko" ngad: ra".

²⁹Aiba mae yao: bam wa lhe" thao" ra" Moba gyezo: datug ko re se' pye' ako". Aibam mae" dayaug re: maloe, ngad: ako".

³⁰Aiba re Israel byu qe wa Moba byu qere khe' aung: pye' mung: mung"dan: mae she' xe zin ngaui pyo: yaug yo: jo; ra".

³¹Ai: thao mae" au: jhaung wa Anad nho: yauggai zo: Shamga ngad: ra". Yao: re: thaung kang aceim: yang Philisti byu khyaug' yo re se' pye' yang: airu: Israel byu qere khyad' yu: ra".