Read Maru TARHA" AGYI 5 Bible Online

TARHA" AGYI 5 - Maru bible

TARHA" AGYI 5

¹Aiba mae Debora we' Abinoam nho: yauggai zo: Barag wa ce: nghaui" caung: yang caung" ako".

²ASANG re caung:khin" ge,- Israel byu qe wa gye kad' nae" ga: myid: phyid' mung: amyu" byu qe ngaui bau: za: yao: yao" myid khyo" bobo: ako".

³Kho:kham qe naonhaung" we"- tae" gyo: ge,. Zug: qe naonhaung" we"- nyang" za: tae" gyo: ge,. Ngo wa Israel nho: Mao"So ASANG re pyo" ra" tang: thoe we' nghaui" caung: nae".

⁴ASANG we"- Seira bam mae" nao gyo" lo mung:- Edom mung" mae" nao thug' li" ra" au:- myid gaung wa laui" nin" mung: mug:gaung mae" mug: qu: gyo" lo: ra". Ngad va"- jham thaui: mae" mug qid gyo" ra".

⁵Israel byu qenho: ASANG Mao"So: qhid' kheim: Sina bam mae" ASANG qhid' kheim: mae bam jham lab: ako".

⁶Anad nho: yauggai zo: Shamga nho: pyad mae we' Yaela nho: pyad mae phaga: lhin" jham ai: mung" khyo" masu" lai loko" ngad: ra". Gyaung: su: mo, re: khyo jao" khyo" za: su" ako".

⁷Israel byu qenho: vogaung: jham wa cae: jhug tag ngad: jo; ra". Debora we"- nao joe" li" sho'- aijham wa akeim ngad: jo; ako". Debora wa Israel byu qe: qhid' mae" yao: myhi" we' dakhyo: joe" li" ra".

⁸Israel byu qe so asag' re khyin: yu gelao" ai: mung"dan: mae gyekhe' poe boe" li" ra". Israel byu byid tug mae" dayaug yaug gye go ci: i? Lhae tad' ci: i?

⁹Nga" nhag' lam: wa Israel byu qe: gyezug: qe we' daga" re: ngaui bau: za: yao: yao" myid khyo" cao" ko" ra" mo, we' daga" re: ngad: ra". ASANG re caung:khin" ge,.

¹⁰Loze phyu jham: dao mae jui: mo,- do: jham: dao mae zaung: ra" mo,- khyid khyo" su: ca" mo, naonhaung" we"- ai: khyo re ta" ge,.

¹¹Tae" gyo: ge,- qid thaung: jham: lhang" gam: mae hug' yhai: na ko" ra" mo,byu phaung: wa ASANG: aung doe; ru jham re we' Israel byu qenho: aung doe' ru jham: khyo re ta" na: ako". Ailao"- ASANG: byu qe wa yao: bam: vogaung: jham mae" yan" gyo" lo: ako".

¹²So: wa, so: wa, Debora we"- so: wa, so: wa, nghaui" caung: wa,- Abinoam nho: yauggai zo: Barag we"- to" wa,- ni" nho: kyam: byu qere jhui" lo" wa,.

¹³Ailao"- Jhaug' zaug: ra" yaug wa yao: bam: au: jhaung qejhao" gyo" li" mung: ASANG: byu qe wa gyekhe' nae" jin" jin" yao: jhao" joe" li" ako".

¹⁴Yao: bam wa Ephrim mae" lao:khaung: khyo joe" li" mung: Benyamin amyu" kaung we' yao" byu qenho: nhaung thao" mae ngad: ako". Makhira mae" gyezug: jham thug' li" mung:- Zebulun mae" zug: aya: qo" mo, thug' li" ako".

¹⁵Isakha amyu" kaung: nho: au: jhaung qe wa Debora we' daga" joe" li" ako". Ngad: ra" Isakha joe" li" mung: Barag re: joe" li" ra". Amung: yao: bam wa lao: khaung: khyo yao" thao cao" ye" ako". Ngadqere: Rubin amyu" kaung wa jho" kho' lo" ako". Yao: bam wa li" nae" maqo" myid: phyid' ngad: ako".

¹⁶Yao: bam nhaung thao" mae yao jham we' pe"mung: thang: na ko" ra" i? Yao lhaug' mo, yao kyaung" re khai: ra" thoe re tae" gyo: nae" qhid' mae" i? Ngad: ra"- Rubin amyu" kaung wa jho" kho' lo" ako". Yao: bam wa li" nae" maqo" myid: phyid' ngad: ako".

¹⁷Gad amyu" kaung wa Yodan gyaung: ba thug' shad' mae thang: na: ako". Dan amyu" kaung wa qid sang pho jham: nhae mae na: jo; ako". Ashe amyu" kaung wa panglai: qid yae nhae mae thang: na: ako". Yao: bam wa gyagao: cao" yang: na: jo; ako".

¹⁸Ngadqere: Zebulun amyu" kaung we' Nabhtali amyu" kaung wa gyekhe' poe mae yao: bam: kao so' shidgyan nogyan qhug' ako".

¹⁹Megido qid zo: gyaung: yae Tanag jo, qo mae kho:kham qe li" yang gyekhe' ako". Khanan kho:kham jham gyekhe' ko" ra". Ngadqere: yao: bam ngaui maqo" yu: lo" ko" ngad: ra".

²⁰Kyi jham wa mug:gaung mae qhui" lhau: ra" khyo" yao: bam mug:gaung mae" gyekhe' ako". Yao: bam wa Sisera re gye kad' ako".

²¹Qid bug thin: ra" Kishon gyaung: qid gyui: yang yao: bam re khyad' she: myung: lo" byaug: ra". Ngo wa qam: we' qhid' khyo khe' ye: nae".

²²Ailao"- myao: jham wa thug' byae yang: joe" li" mung: myid gaung wa yao: bam: khusin: zab thoe za: ngad: ra".

²³ASANG mug: lagyo: wa Mero re nhang: kheim: ke' ge,- aimae na mo, wa nhang: kheim: zao" ako"- ga: ta" ra". Yao: bam wa ASANG re mali" bao" yu ko" ngad: ra". Yao" qhid' mae" gyekhe' nae" gyezo: khyo" mali" ko" ngad: ra"- ga: ta" ra".

²⁴Zhau: vha: bo: thao" yaug wa Keni byu Hebera nho: yham sang myhi" Yaela ngad: ra". Yao: wa zaung jham: khug mae na: ra" myiqe: qe tho' zhau: vha: bo: thao" yaug ngad: ra".

²⁵Sisera wa qid mho' ra". Ngadqere: yao: wa nung: nug' byid: jhaug' ra". Yao: wa khug' yaung" khug' gai mae nung: nug' pe' yao: re celo byid' ra".

²⁶Yao: wa lo, dashad' mae zaung daung" zang ci mung:- dashad' mae dau ci: ra". Yao: wa Sisera re be, mung: yao" au: gao: qug: re be; khyoe' ra". Yao: wa aiyaug: au: re be; kyao" pye' ra".

²⁷Yao: wa yao" pad' laug khyo nhe' gyo" lo" ru we' lang" lo" mung: Yaela nho: khyid qao: mae malab lo: lang" jo; ra". Yaela khyid qao: mae yao: wa yao" pad' laug khyo nhe' gyo" lo" mung: lang" lo" ra". Yao: wa myid gaung khyo shid: lang" lo" ra".

²⁸Sisera nho: yao: myhi" wa bao: zo: kham: khyo" qu" ke' ra". Qe,kyo pin: lung: nhaung thao" mae" zhaug' qu" na: ra". Yao: nho: gyekhe' myao: lhin" pe"mung: ce qhi" thao gyo" na: i? ga: yao: myid' ra". Yao" myao: jham wa dam: tug' lo phyao: ai qhi" yam" na ko" i?

²⁹Yao" nho: pha,jhi" bo: thao" myiqe: qe wa yao: re dao: tau: mung: yao: yao: re paug' yang: yang: ta" ko" ru wa-

³⁰Yao: bam wa lanyab jham re cao" taung" yu mung: jho" gae: yu genae" re:- Gyezo: dayaug re zomyi: nau" dayaug mangad: lao"- shid' yaug Sisera qhid' mae" pin: gai- kho:kham myhi" lang zang: mae ve, nae"- nag: thug' shaung: ra" ja: jham re cao" qho: na ko" ru za: ngad genae"- ga: ta" ra".

³¹ASANG we"- ni" gyevo qe alhab' wa ai we' dakhyo: shid vageshao: wo"- Ngadqere: ni" ba nam qe wa ba we' dakhyo: zho: vageshao: wo"- ga: nghaui" caung" ako". Aimung: mung"dan: mae zin lam: byid xe ngaui pyo: yaug yo: jo; ra".