Read Maru TARHA" AGYI 8 Bible Online

TARHA" AGYI 8 - Maru bible

TARHA" AGYI 8

¹Ailao"- Ephrim kaung mae" mo, wa Gidon re Midian byu qere nao gye yezin" ra" au: ngonhaung" re pe"mung: makhai i? Nao pe"mung: ngonhaung" re ceru: kad' i? ga: yao: bam xo sho' nyhung: ako".

²Ngadqere: yao: wa yao: bam re- ngo qo" kad' ru wa naonhaung" kad' vako" ra" mau" we' pe" magai: tho' tau" ngad: ra". Naonhaung" Ephrim kaung mae" mo, kad' ra" mau" dajhid' lhao" re nga" amyu" kaung geim" mo, kad' ra" mau" tho' je: phug' de; ra".

³Pe" ngad ngad Mao"So: qam: so' khyo" yang naonhaung" wa Midian zug: Oreb we' Zeeb shid' yaug re se' pye' ako". Ngo kad' ru we' ai: rure mathae: tau" ngad: ra"- ga: ta" ra". Yao: cedao: ta" lao"- yao: bam nhag' gyai mayo: loko" ngad: ra".

⁴Ceyo, mae Gidon we' yao" byu sam yo zo: wa Yodan gyaung: khyo joe" lo mung: logau" de; ako". Yao: bam myaung: geyang: re: gyevo qere cao" khe' ashiko".

⁵Yao: bam Sukhod khyo joe" gelao"- yao: wa ai: vobyu yauggai qere- jeju khyo" nga" byu qere mug dajhid' byid: zho: ge,- yao: bam wa myaung: gemung: ngo wa Midian kho:kham Zeba we' Zalmunna re cao" khe' na:- ga: ta" ra".

⁶Ngadqere: Sukhod au: jhaung qe wa nao wa Zeba we' Zalmunna re maqo" taung: shi ngad: ra". Ngonhaung" pe"mung: ni" gyetab re zo:ve byid: ang nae" i? ga: ta" ako".

⁷Airumung: Gidon wa gai va"- ASANG wa Zeba we' Zalmunna re nga" lo, mae ab byid: va" lao"- ngo wa din"pyad' yo mae" zau: kyao we' zau: gae: yang naonhaung" re lobe, nae"- ga: ta" ra".

⁸Gidon wa Penue khyo ye: mung: aimae" mo, re ai we' daja: za: yemho' ra". Ngadqere: Penue mae" mo, re: Sukhod mae" mo, we' dakhyo: za: tau" ako".

⁹Ailao" yao: wa- ngo wa pe" dae made; zau: mazao" lo: qao" qao" za: dam: tug' phao: lo lao" ngo wa ce: gyebyu zaung re lophyo' khyo" pye' nae"- ga: ta" co' ra".

¹⁰Zeba we' Zalmunna shid' yaug wa yao: shid' yaug: gyezo: qe we' daga" Karko mae na: jo; ako". Din" pyad' yo mae na ko" ra" byumyu" qe wa gyetab geim" lhao" re: 15,000 yaug za: adang: aloko" gyezo: 120,000 yaug wa se' pye' ru qhug' ako".

¹¹Gidon wa Noba we' Yogbeha ba thug' shad' din"pyad' yo ayae khyo cao" yang: ye" lo" mung: ai: gyetab re nyag din taung" yezin" ra".

¹²Midian kho:kham Zeba we' Zalmunna shid' yaug wa phao: lo" byaug: ako". Ngadqere: yao: wa cao" khe' mung: yao: shid' yaug re taung" yu: ra". Yao: shid' yaug: nho: gyetab geim" re byodin byosho: boe" nhao: pye' ra".

¹³Gidon wa gye poe mae" Here bam gyo: khyo khyo" tug' phao: lo: ra".

¹⁴Yao: wa Sukhod mae" Zalau: dayaug re taung" yu yang: dao: myid: myid' ra". Ai: Zalau: pho" wa Sukhod mae" au: jhaung nhad' xe: nhad' yaug: mang re Gidon re tung" byid' ra".

¹⁵Ailao" Gidon wa Sukhod vogaung: byu qejhao" ye: mung:- ngore bao" yu nae" naonhaung" ha: pye' ko" rure beim: ko" i? Naonhaung" wa Zeba we' Zalmunna re ngo mathe' taung: shi" ruyang nga" nho: myaung: dug: ra" gyezo: qere zo:ve dajhid' re: maqo" byid: ga: ta" ako". Ngad va"- ai shid' yaug cemae ngad: ra"- ga: ta" ra".

¹⁶Ailao" yao: wa din"pyad' yo mae" zau: kyao: we' zau: gae jham re yu: yu mung:- ai yang Sukhod vogaung: mae" au: jhaung qere qobo dae byid' ra".

¹⁷Yao: wa Penue mae jo; ra" gyebyu zaung rere: phyo' khyo" pye' mung: vobyu qere re: se' pye' ra".

¹⁸Ai: thao Gidon wa Zeba we' Zalmunna shid' yaug re Tabo mae ni" shid' yaug se' pye' ra" mo; khyo wa khoru: i? ga: myid' ra". Yao: shid' yaug wa yao: bam wa nao we' dau: ako". Yaug khao: ngo" wa kho:kham nau" we' dau: ako"- ga: ta" ako".

¹⁹Ailao" Gidon wa yao: bam wa nga" mao:nhaung: qe- nga" myhi" nho: yauggai zo: qe ngad: ako". Ni" shid' yaug yao: bam re mase' ko" ngad: re wa ngo ni" shid' yaug re mase' nae" ngad: rure ngo dang za: jham tang" ra"- ga: ta" ra".

²⁰Amung: yao: wa yao" zoqhid' yauggai zo: Yetha re- ce shid' yaug re yese' pye' wa,- ga: ta" ra". Ngadqere: zolau: pho" wa yao" shae mashe: thug' ngad: ra". Yao: wa zolau: nau" za: shi" ngad: ruyang: airu: yam" na: ru ngad: ra".

²¹Ailao" Zeba we' Zalmunna shid' yaug wa Gidon re nao yao" yang se' la,- gai lo: re wa gai lo" yang kad' ca" ga: ta" ako". Airumung: Gidon wa yao: shid' yaug re se' mung: yao: shid' yaug: nho: gola:u jham: lang zang: mae ve; ci: ra" shaung zai re yu: yu: ra".

²²Ai: thao Israel byu qe wa Gidon re- nao we' ni" myid:zo: joe" sho' ngonhaung" nho: zug: kad' ge,- nao wa ngonhaung" re Midian byu qe: lo, mae" khyad' yu: ava" ga: ta" ako".

²³Gidon wa- ngo we' nga" yauggai zo: wa naonhaung" zug: makad' nae". ASANG wa naonhaung" zug: kho:kham ngad: li" nae" ga: phaug' tau" ra".

²⁴Ngadqere: yao: wa xo' yang:- naonhaung" re ngo daja: myid: geli"- Naonhaung" yaug khao: ngo" naonhaung" yu: to" ra" noxaui: jham ngore byid: gela,- ga: ta" ra" (gatau: din"pyad' yo mae" byu qe we' dakhyo: Midian byu qe wa qhang noxaui: xaui" ako".)

²⁵Amyu" byu qe wa- aijham re ngaui ngaui bau: bau: nao re ngonhaung" byid: nae" ga: ta" ako". Yao: wa mai bau: myhung" ke' yang: yaug khao: ngo" yao: yao: yu: ci ra" noxaui: jham aimae khyad' ke' ako".

²⁶Gidon qo" khae: yu: ra" qhang noxaui: jham wa daxe: nhad' joe: ngad: ra". Ceru mae qhang zai- qhang qhui: Midian kho:kham qe ve; ra" pin: ne mai bau: jham yao: bam: gola:u lang zang mae de; ra" shaung zai jham mabo: bo ngad: ra".

²⁷Gidon wa ai qhang re so sulho dalam: kad' yang: yao" mug: Ophra mae to" ra". Israel byu qe alhab' wa ASANG re to" pye' mung: ai: so sulho re yecaung:pa" nae" qhid' mae" aikhyo ye" ako". Airu wa Gidon we' yao" yham byu qe: qhid' mae" myhi" nae" lha" boe" ra".

²⁸Airumung: Midian byu qere Israel byu qeyang aung: pye' mung: kyaug' nhin" ru majo, lo:ngad: ra". Ai: mung"dan: wa Gidon shid sho' byid xe zin lam: lam: ngaui pyo: yaug yo: jo; ra".

²⁹Gidon wa yao" yham khyo phao: lo" mung: aimae lo" na: ra".

³⁰Yao: wa yauggai zo: nhad' xe yaug qo" ra". Pe"mung:ga"re yao: wa yham sang myhi" myo: sho' qo" ra".

³¹Yao: wa Shekhem mae myingai re: qo" shi" ra". Ai: yaug wa Gidon re yauggai zo: dayaug khau byid' ra". Gidon wa yao: re Abimeleg ga: mhang byid' ra".

³²Yoasha nho: yauggai zo: Gidon wa gyai mao: thao shid: lo" mung:- Abieze amyu" kaung qenho: vogaung: Ophra vogaung: mae" yao: pho" Yoasha nho: lab mae nyhab' ako".

³³Gidon shid thao re Israel byu qe wa Mao"So re jhaug' mazaug lo: dam: kad' gemung: Bala so jham re caung:pa" ako". Yao: bam wa Bala re yao: bam: so khyo" dao: thang" kad' ako".

³⁴Yao: bam: lhang" gam: mae" yao: bam: gyevo qe alhab' mo; lo, mae" yao: bam re khyad' yu: ra" yao: bam: ASANG Mao"So re macaung da" loko" ngad: ra".

³⁵Yao: bam wa Israel byu qe: qhid' mae" yao: zaui: so" lo: ra" gai: ra" lo, mau" alhab' mathao mae Gidon nho: yham byu qere jeju maba: beim: so: ko" ngad: ra".