Read Maru QHU" BYID: 1 Bible Online

QHU" BYID: 1 - Maru bible

QHU" BYID: 1

¹Ce: mugsug' paug' wa Yesu Khristu re Mao"So: yang qhu" byid' ra" boe" ra" khyo jham re tung" xam" to" ra" mugsug' ngad: ra". Mao"So yao: re ce: qhu" lho byid' ru wa mataung" myao" re boe" ca" ra" khyo jham re Mao"So: daui daui mo, re qhu" byid: nae" qhid' mae" byid' ra" qhu" lho ngad: ra". Khristu wa yao" daui daui yaug Yohan jhao" yao" mug: lagyo: re nhao: ke' ra" khyo" yang ai: qhu" lho jham re ba nhao: ra".

²Aimung: Yohan wa yao: the' myao: ra" gu: alhab' re ce: mugsug' mae ta" to" ra". Ceru wa Mao"So mae" joe" li" ra" mungdao: we' Khristu yang yao: re qhu" byid' ra" dangman" ra" khyo we' sin" ra" lau dao: ngad: ra".

³Ce: mugsug' paug' re nghe' ra" yaug wa ngaui lho" ra". Amung: ce: lapa: mungdao: jham re tae" gyo: mung: ce: mugsug' paug' mae tung" to" ra" mungdao: re phug' cao" ra" mo, wa ngaui lho" ko" ra" wo". Pe"mung:ga"re ai: khyo jham alhab' boe" li" nae" yo, khyin: wa jhao" li" ava".

⁴Ngo Yohan wa Asia mung" mae" phung: nhad' lam: khyo mugsug' tung" ke' ra". Ana" pyad- lai: lo: ra" pyad- joe" lo nae" pyad mae na: jo; ra" Mao"So mae" re:- yao" kho:kham tao" qhid' au: mae na: jo; ra" byo nhad' yaug mae" re:-

⁵Amung: jhaug' zaug: ra" sagse: kham yaug- shid: rumae" sao qhid' daui: to" li" ra" yaug- mug:myid dao mae" kho:kham jham re eib: ra" yaug re:- ngad: ra" Yesu Khristu mae" re:- nhag' myan" ra" jeju we' ngaui pyo: yaug yo: ru wa naonhaung" we' daga" ngad: jo, vashao: wo". Yao: wa ngonhaung" re jhid'de; yang: yao: shid kham: byid' ra" khyo" yang ngonhaung" nho: qobo jham mae" loe, beim nhao mung:-

⁶Yao: yao" Pho" Mao"So re caung da" byid: nae" ra" mung"dan: nho: khinjaung ngonhaung" re toe' yu: ra". Yesu Khristu mae phungbao we' qam: so' apyad ato byang" jo, vashao: wo"- Amen.

⁷Qu" ge, Yao: wa jham thaui: dao mae zaung yang: joe" li" na: ra". Yao: re thug' kyao" ra" mo, bobo mung: yaug khao: ngo" wa yao: re qhug' myao: li" genae". Mug:myid dao mae" byumyu" alhab' wa yao" mathao mae kaug' qhui: li" genae". Airu: boe" li" vashao: wo"-

⁸Ngo wa sao qhid' we' lo" thao" yaug ngad: ga:- ana" pyad- lai: lo: ra" pyad- joe" lo nae" pyad mae na: jo, yaug ngad: ra" qam: bo: thao" ra" Asang Mao"So ta" ra".

⁹Ngo wa yao" Mung"dan: byu qe kham zo" ra" qug: khai: khyag' qhui: rure zang: qhao" kham zo" rumae Yesu thao cao" yaug khyo" naonhaung" we' daga" bokham zo: yaug naonhaung" mao:nhaung: pho" Yohan ngad: ra". Ngo wa Mao"So: mungdao: re we' Yesu yang qhu" byid' ra" dangman" ra" khyo re ta" hau" kyo: byid' ra" mau" mathao mae Pad Mu gagyo: kao" mae dai" nha: to" ru qhug' ra".

¹⁰Asang: ba na mae ai: Byo: yang ngore jaung" mung:- labo" thoe we' dau: ra" thoe qi: nga" nhaung thao" mae jhau: na: rure ngo the' gyo".

¹¹Ai: thoe qi: wa Nao the' myao: rure tung" mung:- ai: mugsug' re Ephesu- Samurna- Pergamum- Thuatira- Sardi- Philadelphia- Ladoki we' ce: vogaung: jham mae" phung: nhad' lam: khyo vhin: ke' wa,- ga: ta" ra".

¹²Ngo re jhau: na: ra" yaug khag' ngad: rure qu" nae" qhid' mae" ngo lhang: qu" ke' re qhang myikaug' tao" nhad' lam: re we' aijham: agaung: mae xao su byu we' dau: ru dayaug re ngo the' myao:-

¹³Yao: wa khyid vo: joe" ra" bau: qhang re ve; ci mung:- yao" qao gao mae qhang pye: phyid' cui: cui" ci: ra".

¹⁴Yao" xae wa sug'gug we' dakhyo:- mangad: lao" gyu: we' dakhyo: phyu: ra". Amung: yao" myo, jid' wa myi: we' dakhyo: de; ra".

¹⁵Yao" khyid wa kyang" pye' mung: boe; jhad' to" ra" gyid: ne we' dakhyo: bao mung:- yao" thoe wa qid coe: gyo" thoe we' dakhyo: ngad: ra".

¹⁶Yao: wa yao" lo,yo shad' mae kyi nhad' ce' re zaui" ci mung:- yao" nhad' mae" shid' shad' geim" tho' ra" shae thug' li" ra". Yao" myo,khung: wa ba khaung tau: au: mae" ba we' dakhyo: zho: jo; ra".

¹⁷Yao: re ngo myao lao"- yao" khyid qao: mae sushid we' dakhyo:- gyang: lang" jo; byaug: ra". Ailao" yao" lo,yo lo, nga" dao mae kai: byid: mung:- Dagyaug wa,- ngo wa sao qhid' yaug we' lo" thao" yaug ngad:- ga: ta" ra".

¹⁸Ngo wa kao so' daui: na yaug ngad:- ngo wa shid va"- ngadqere: ana" wa apyad ato kao so' daui: na yaug ngad va". Ngo wa shid: rure we' movo: mug: re eib: ra" kheim: so' qo" yaug ngad: ra".

¹⁹Airumung:- nao myao: ra" ja: jham rere:- ana" jo; ra" ja: jham we' thao re boe" li" nae" ra" ja: jham alhab' khyo re tung" to: wa,-

²⁰Nga" lo,yo lo, mae nao myao: ra" kyi nhad' ce' we' qhang myikaug' tao" nhad' lam" nho: no; thao" ra" lajheim: wa ceru: ngad: ra". Ai: kyi nhad' ce' wa phung: nhad' lam" nho: mug: lagyo: jham ngad: ako". Amung: ai: qhang myikaug' tao" nhad' lam: wa Phung: nhad' lam: ngad: ako".