Read Maru QHU" BYID: 2 Bible Online

QHU" BYID: 2 - Maru bible

QHU" BYID: 2

¹Ephesu vogaung: phung" nho: mug: lagyo: re ceru: tung" ke' wa,- ce: mungdao: wa yao" lo,yo lo, mae kyi nhad' ce' re zaui" ci: ra" yaug- qhang myikaug' tao" nhad' lam" agaung: mae su" lhau: ra" yaug mae" mungdao: ngad: ra".

²Nao kad' ra" ave, lo,mau" re ngo ba:. Nao khoqhi" qam: ke' yang: mau" zaui" lo: rure re:- nao khoqhi" sho' nhag' lam: qhang zang: kham: lo: rure re:- ngo ba:. Makhyang" ra" byu qere nao maqo" zang: kham: rure re:- lagyo: mangad' ra" mo, lagyo: ga: ta" ko" rure ca: qu" mung:- yao: bam mhug' ra" khyo myao: thug' li" nhao: ra" khyo rere: ngo ba:.

³Nao wa zang: qhao" mung: nga" mathao mae qug: khai: kham zo: va" ru we' nao qam: magyug: ngad: ra".

⁴Ngadqere: nao wa sao qhid' ngore jhid'de; ru we' dakhyo:- ana" nao ngore majhid'de, lo" ruyang qobo ceru ngo nao re vhin: ra".

⁵Amung: nao khovha" va: sho' gyo" lo" byaug va" rure myid: qu" wa,- ni" qobo jham mae" phaug' lo mung: nao sao qhid' kad' ru we' dakhyo: kad' wa,- ni" qobo jham mae" nao madam: phaug' lo re wa ngo nao jhao" li" mung:- ni" myikaug' tao" re yao" jo, qo mae" yu: pye' byid: nae".

⁶Ngadqere: Nikola thao cao" mo, re ngo nghang" ra" qhi" nao yao: bam re nghang" pye' ruyang khin" nae" khyo dalam: de; ra".

⁷Airumung: nao no: de; ngad: re wa Byo: yang phung: jham re ta" ra" dao: re tae" gyo: vashao:- Ngo wa aung doe; ra" mo, re Mao"So: khyae mae yaug: ra" kao so' sag' gae mae" ashi: re zo: nae" akhang" byid: nae".

⁸Samurna vogaung: phung" nho: mug: lagyo: re ceru: tung" ke' wa,- Ce: mungdao: wa sao qhid' we' lo" thao" yaug- shid mung: dam: daui: to" li" ra" yaug mae" ngad: ra".

⁹Ni" nho: qug: khai: jham re ngo ba:. Nao wa myaung sho: ngadqere: gaigai: yao: wa nao qo" rure ngo ba:. Yuda byu qe mangad: mo,- Yuda byu qe ngad: ga: ta" ra" mo; yang magai: ra" khyo" naonhaung" re ta" phoe: pye' byid' na ko" rure ngo ba:. Yao: bam wa Satan nho: phung: mae bobo mo, ngad: ako".

¹⁰Nao qhug' kham zo: nae" ra" qug: khai: jham: qhid' mae" dagyaug daci" wa,. Tae" gyo: ge,- Min: yui wa naonhaung" mae" damyo" re thaung: taung" lhaung" pye' ra" khyo" naonhaung" re jham" qu" li" nae". Ni" nho: qug: khai: wa daxe ba myao" li" nae". Shid sho' jhaug' zaug wa,- ailao" aung doe; aphug' jhaung qhu" khyo" nao re ngo kao so' byid: nae".

¹¹Airumung: nao no: de; ngad: re wa Byo: yang phung: jham re ta" ra" dao: re tae" gyo: wa,- Aung doe; ra" mo, re shid' lhang ein: lhang shid: ruyang qo" zao" genae" mangad:.

¹²Pergamum vogaung: phung" nho: mug: lagyo: re ceru: tung" ke' wa,- Ce: mungdao: wa shae su: shid' shad' geim" tho' ra" shae ci: ra" yaug mae" mungdao: ngad: ra".

¹³Nao khai: mae na: jo; rure ngo ba:- nao wa Satan" nho: tao" khau" jo; ra" jo, qo mae na: jo; ra". Nga" nho: jhaug' zaug: ra" sagse: pho" Antipa wa Satan na: ra" jo, qo mae se' pye' qhug' ra" ayo, gyo: mae lhao" re:- nao ngore jhaug' zaug mung:- ngore lam khug: ra" myid re nao mashapye' ngad: ra".

¹⁴Ngadqere: nao re qobo vhin nae" khyo dajhid' zo: bo: ra". Israel byu qere sulho re qhaug' byid' to" ra" zo:ve re zo: nhao nae" we' gaung sho: shab' ra" gintho' mau" zo" khyo re cao" nae" ju" phyo' ra" khyo" yang yao: bam re qobo shad' lhoe" sho' khoru: au: jhui" she nae" khyo Balag re mho" shid' byid' ra" Balam nho: mho" shid' khyo re phug' cao" ra" mo, damyo" naonhaung" phaung mae bo: ako".

¹⁵Ai we' dakhyo:- naonhaung" phaung mae Nikola nho: mho"zo: qe: mho" shid' ra" khyo re cao" ra" mo, bobo: ako".

¹⁶Ana" ni" qobo jham mae" dam: phaug' lo wa,- Airu: mangad: re wa nao jhao" ngo phyad phyad li" mung:- nga" nhad' mae" thug' ra" shae: yang ai: byu qere gye kad' li" nae".

¹⁷Airumung: nao no: de; ngad: re wa Byo: yang phung: jham re ta" ra" dao: jham re tae" gyo: wa, Aung doe; ra" mo, re nyham" to" ra" mana mug daqhae: ngo byid' nae". Ngo wa yao: bam mae" yaug khao: ngo" re qo" khae: yu: ra" yaug mae" je yang: khag' re: maba: ra" mang sag' re tung" te' to" ra" ai: laug baui aphyu rere: byid: nae".

¹⁸Thuatira vogaung: phung" nho: mug: lagyo: re ceru: tung" ke' wa,- Ce: mungdao: wa yao" myo,jid' wa myi: we' dakhyo: de, mung:- yao" khyid wa boe; qhui: to" ra" gyid: ne we' dakhyo: bao: ra" Mao"So: Yao: Zo: mae" mungdao: ngad: ra".

¹⁹Nao pe" kad' rure ngo ba:. Ngo wa ni" jhid'de; myid- ni" nho: jhaug' zaug: ra" myid- ni" nho: mau" zo" we' ni" nho: zang: qhao" ra" myid re ngo ba:. Ana" nao zaui: so" na: ru wa nao sao qhid' re zaui: so" lo: ra" tho' je: rure ngo ba:.

²⁰Ngadqere: nao re qobo vhin nae" khyo ceru bo: ra". Yao: yao" gaung re Mao"So: lagyo: ngad: ga: mhang" ra" ai: myiqe: Yezebe re nao zang: byid' ra". Yao" nho: mho" shid' khyo khyo" yang nga" daui daui mo, re sulho re qhaug' byid' to" ra" zo:ve re zo: nae" gaung sho: shab' ra" gintho' mau" zo" re kad' genae" qhid' mae" khyonghung: nghung: nhao: ra".

²¹Yao" qobo jham mae" myid tha" lo nae" ayo, re ngo byid' to: ngadqere: yao: wa yao" gaung sho: shab' ra" gintho' mau" zo" mae" myid matha" lo nug ngad: ra".

²²Airumung: ngo wa yao: re yab jaung: dao mae shapye' to: nae"- Aimae yao: we' daga" myi: shad' lao shad' ra" mo, qug: khai: khyag' qhui: ru qu" gyaug qu" lhaung: ru qhug' kham zo" li" genae". Yao: bam wa yao: we' daga" kad' ra" makhyang" ra" lo, mau" jham mae" myid matha" lo ko" re wa ce: qug: khai: khyag' qhui: rure kham zo: nhao nae".

²³Yao" mho"zo: qere re: ngo se' pye' byid: nae". Airumung: ngo wa yaug khao: ngo" nho: myid: o: ra" khyo re we' kao bau myid o: ra" khyo jham re ba yaug ngad: rure phung: jham alhab' ba: li" genae". Ngo wa naonhaung" mae" yaug khao: ngo" re yao: yao: zaui: so" lo: ra" lo,mau" re cao" yang: dam: tug' byid: nae".

²⁴Ngadqere: Thuatira vogaung: mae dang: ra" mo, naonhaung" wa ai: makhyang" ra" mho" shid' khyo re macao" ko" ngad: ra". Naonhaung" wa Satan" nho: no; thao" ra" nyham" to" ra" khyo ga: su gaje qeyang mhang" ra" khyo re mazhao: yu ko" ngad: ra". Ngo naonhaung" re ta" ru wa naonhaung" dao mae qola: pe" ja: re: ngo makai: byid: nae".

²⁵Ngadqere: ngo joe" li" sho' naonhaung" mho" zhao: yu: ra" khyo jham re tang za: naonhaung" zaui" zag: ci qo: ra".

²⁶Aung doe; ra" mo, re we' ngo o ngaui: ra" mau" re xo' yang: kyab' sho' zaui: byid: nae". Ngo wa yao: bam re byumyu" alhab' re eib nae" kheim: so' byid: mung:- ai: kheim: so' wa ai: mung"dan: jham re jo,to' zaung: bao" yang eib nae" we' zhogam: ug' jham re we' dakhyo:- aje, aman" be; kho' sin" pye' nae" kheim: so' yao: bam re ngo byid: nae". Bo" myhung rere: ngo yao: bam re byid: nae".

²⁹Airu: mung: no: de; ngad: re wa Byo: yang phung: jham re ta" ra" dao: re tae" gyo: wa,