Read Maru RUTHA 4 Bible Online

RUTHA 4 - Maru bible

RUTHA 4

¹Bua wa zabphaung jo, qo vogaung: kham: khyo ye: mung: yezaung: jo; ra". Ailao" Bua ta" ra" Elimeleg nho: sa: jhao" thao" yaug amyu" ba nam pho" joe" lo: ra". Bua wa yao: re nga" ba nam pho" we"- cekhyo li" zaung ri: ga: khai: yu: ra". Airumung: yao: wa ye: yang yecao: zaung: ra".

²Ailao" Bua wa vogaung: au: jhaung lau: de, daxe zo: re khai: yu mung: yao: bam rere: aimae zaung nhao: ra". Yao: bam bin: zaung gelao"

³Yao: wa yao" amyu" ba nam pho" re- ana" Naomi wa Moba mae" dam: phao: joe" lo: ava". Yao: wa ngonhaung" amyu" ba nam pho" Elimeleg sang: ra" yo re aung" pye' nug: ra".

⁴Airu re nao ba ca" ein: ngo myid: jho: ra". Aimung: ana" nao o: ngad: re wa cemae zaung: jo, ko" ra" byu qe: qhid' kheim: mae aire vai: yu wa,. Ngadqere: nao mavai nug lao" kam" wa ta" wa,. Pe"mung:ga"re aire vai: yu nae" akho: akhang" wa sao qhid' mae nao ngad mung: ai:thao re ngo ngad: ra"- ga: ta" ra". Aiyaug wa ngo aire vai: yu nae"- ga: ta" ra".

⁵Bua wa gyai gai va" ai: yo re Naomi lo, mae" nao vai: yu: re wa cug' mo" Moba myhi" Rutha rere: nao vai: yu: ca". Airulao" ai: yo wa shid yaug: nho: dinkhu: mae dang: jo; li" nae"- ga: ta" ra".

⁶Ai: yaug wa ce: mau" mae ai: yo re vai: yu nae" nga" akho: akhang" re ngo lo, tau: pye' nae". Pe"mung:ga"re lajheim: wa ai: yo re ngoyao" zoshao qe: ma maqo" sang: yu nae" ngad yang: ngad: ra". Nao vai: yu wa, ngo mavai lo nae"- ga: tau" ra".

⁷Ai: pyad mae zai aung" ra" khyo mangad: lao" Jo,nho" jho" tha" ra" mau" re pin" nae" qhid' mae" zai aung" ra" yaug wa yao" khyid zhaung: khyad' yu yang: vai yaug re ab byid' ra" thung" li" jo; ra". Ceru: kad' yang: mau" pin" va" khyo re Israel byu qe lhaung" kad' qhu" ako".

⁸Airumung: aiyaug wa Bua re ai: rure nao vai: yu wa, ga: ta" mung: yao" khyid zhaung: re khyad' yang: Bua re ab byid' ra".

⁹Ailao" Bua wa au: jhaung qere we' aimae na mo, alhab' re ana" ba Elimeleg we' yao" yauggai zo: tao ngad: ra" Khilion we' Malon sang ko" ru ja: khao: ngo" re Naomi mae" ngo vai: yu va" khyo ana" ba naonhaung" alhab' mo, sagse: ngad: ako".

¹⁰Aitho' mago" Malon nho: cug' mo" Moba myhi" Rutha wa nga" yham sang myhi" boe" lo: ra". Ceru wa shid yaug: nho: dinkhu: mae jo,nho" xo' yu: to: mung: yao" amyu" kaung wa yao" amyu" phaung mae we' yao" mug: mae xo' jo; li" nae" naonhaung" alhab' wa ana" ba sagse: ngad: ako"- ga: ta" ra".

¹¹Au: jhaung qe we' gaje qe wa ngad: ra" ngonhaung" wa sagse: ngad va". ASANG wa Yaku re zoshao myo: sho' khau byid: ko" ra" Rakhela we' Lea reru: ni" yham sang myhi" re boe" nhao vashao:. Nao wa Ephrad kaung mae jo,nho" qo" yaug we' Betlehem vogaung: mae baug thug' mang qi: yaug boe" vashao:-

¹²Ce: myiqe: khyo" ASANG: yang nao re byid: nae" ngad: ra" zoshao qe wa ni" amyu" re Yuda we' Tama tao: nho: yauggai zo: Pere nho: yham khaung byu qe we' dakhyo: boe" nhao vashao: wo"- ga: ta" ako".

¹³Airumung: Bua wa Rutha re yao" yham sang myhi" khyo" ngho" ra". ASANG wa Rutha re shaman" byid: mung: yao: wa gaung la" li" yang: yauggai zo: dayaug khau: ra".

¹⁴Myiqe: qe wa Naomi re ASANG re caung:khin" wa, yao: wa nao re gun caung nae" qhid' mae" yao: myid: dayaug ana" ba nao re byid' ava". Yauggai nau" wa Israel amyu" mae baug thug' mang qi: yaug boe" vashao:-

¹⁵Ni" dau mo" wa nao re jhid'de; mung: yauggai zo: nhad' yaug tho' mago" ni" qhid' mae" kad' ava". Ana" nao re kao so' asag' we' nao au: phyu zaui ne mao: yo, mae nao re gug:gam byid' ra". Yao: myid: dayaug yao: wa ana" nao re byid' ava"- ga: ta" ako".

¹⁶Naomi wa zonau" re vo; yu mung: yao: re te' te' vo; ci yang: yao: re gun caung byid' ra".

¹⁷Yham kyo: cao: myiqe: qe wa yauggai nau" re Obed ga: mhang" byid' ako". Yao: bam wa- Naomi re yauggai zo:khau byid' ava"- ga: yaug khao: ngo" re ta" ako". Obed wa- Yese yao: pho"- Yese wa Davi nho: yao: pho" boe" lo: ra".

¹⁸Ceru wa Pere mae" Davi joe" sho' she' ra" byuxag' ngad: ra". Aiwa Pere- Hezron- Ram- Amminadab- Nashon- Salmon- Bua- Obed- Yese- Davi bam ngad: ra".