Read Maru 1SAMUELA 1 Bible Online

1SAMUELA 1 - Maru bible

1SAMUELA 1

¹Ephrim amyu" kaung mae" Elkana ga: mang: ra" byu dayaug na: ra". Yao: wa Ephrim bam mug: mae" Rama vogaung: mae na: ra". Yao: wa Yeroham nho: yauggai zo:- Elihu nho: yao: myid: ngad: ra". Yao: wa Zupha nho: kaung mae bobo mung: Tohu nho: yham khaung mae bobo yaug ngad: ra".

²Elkana wa yham sang myhi" shid' yaug qo" ra". Hanna we' Peninna tao ngad: ako". Peninna wa zo: dau khau mung: Hanna wa makhau ngad: ra".

³Elkana wa qam bo: thao" ra" ASANG re caung:pa" nae" we' xeim: ngaui" byid: nae" qhid' mae" Shilo vogaung: khyo zin khao: ngo" ye" ra". Aimae khinjaung Eli nho: yauggai zo: Hepni we' Phineha tao wa ASANG: khinjaung qe ngad: ako".

⁴Elkana wa lhang khao: ngo" yao" xeim: ngaui" jham re Peninna qhid' mae" sho: gae bam dalam: yao: zo: qe: qhid' mae" gae bam dalam: lam: khyo" yang: ngaui" byid' ra".

⁵Hana re yao: gyai jhid'de; sho' ngadqere: yao" qhid' mae" wa gae bam dalam: za: byid' ra". Pe"mung:ga"re ASANG: wa Hana re zo: dau makhau nae" tam" to" ra".

⁶Yao: re ASANG: yang zo: dau mamyhung nae" qhid' mae" tam" to: yang: yao" mai qhi" cao: Peninna wa yao: re gug: kad' mung: maphug' makhyad' kad' ra".

⁷Ceru zin khao: ngo" xo' boe" na: ra". Yao: bam ASANG: yham khyo ye: khao: ngo" Peninna wa Hana re maphug' makhyad' gug: ce kad' na: ruyang yao: wa gyi: ngug: ru we' zo:ve mazo: lo: ha: pye' ra".

⁸Yao" yham sang pho" Elkana wa yao: re Hana we"- nao pe"mung: ngug: na: i? Nao pe"mung: zo mazo: i? Nao pe"mung: khonhae" re ai qhi" gyang" taung" kaug' i? Ngo wa yauggai zo: daxe yaug tho' ni" qhid' mae" je: gai: mangad: i? ga: myid' ra".

⁹Daba mae Shilo mae" ASANG: yham mae yao: bam zo bin: zo: gethao re Hana to" lo" ra". Yao: wa gyai nhag' lam: gyug: qam: shan: ru we' ASANG re akyu" mho' zo" re alokho: sho' ngug: ra". Ai: au: khinjaung Eli wa yao" jo, qo kham: dung: nhae mae" yao" zaung tao" mae zaung: jo; ra".

¹¹Hana wa- Qam: bo: thao" ra" ASANG we" ni" jeim myhi" ngore qu" la,- nga" qug: khai: re myao byid: mung: nao ngore myid: beim: la,- ngore dato" myhid' la, wo"- nao ngore yauggai zo: byid' ngad: re ngo wa yao: re yao" kao so' gyaung: khyo alhab' geim" nao re ngo qhaug' byid: mung: yao: khonhae" re: xae mako' pye' nae" ein: ngo nao re dao:so: byid' ra" ga: dao:so: to" ra".

¹²Hana wa ASANG re xo' yang: myao" sho' akyu" mho' ra". Eli wa yao" nhad' qid re lhaug' qu" na: ra".

¹³Yao: wa sae sae za: akyu" mho' na: ra". Yao" nhad' qid wa lab: na ngadqere: thoe mathug' ngad: ra". Airumung: Eli wa yao: re yhid yid jho: ra".

¹⁴Aimung: yao: wa yao: re yhid yid: qhu" na: rure thang: pye' wa,- nao yhid shaug' ru thang: pye' mung: gyang" li" wa,- ga: ta" ra".

¹⁵Mangad:- lau:de, pho" we"- ngo yhid mayid- ngo khonhae" re: yhid mashaug' qu" ngo wa nhag' lam: thao" na:- ngo wa ngoyao" qug: khai: jham re ASANG re ta" kyo: yang: akyu" mho' na: ru ngad:-

¹⁶Pe" phug' made; ra" myiqe: dayaug khyo" ngore dajho la,- ngo nhag' lam: saung" myo: yang: ceru: akyu" mho' na: ru ngad: ga: tau" ra".

¹⁷Eli wa- ngaui pyo: yaug yo za: lo" wa,- Israel nho: Mao"So wa nao akyu" mho' ra" ja: re byid: vashao: wo"- ga: ta" ra".

¹⁸Ailao" Hana wa- ni" qhid' kheim: mae khonhae" re: ngo wa myo,nho qo" vashao: wo"- ga: phaug' tau" ra". Ai: thao yao: wa to" lo" mung: zo:ve zo" ra". Aimae" nhag' makaug' lo:ngad: ra".

¹⁹Thao: ba ne, kao Elkana we' yao" yham byu qe wa no' mae" to" mung: ASANG re bin: caung:pa" thao Rama mae" yham khyo yao: bam to" phao: lo" ako". Elkana wa yao" yham sang myhi" Hana we' gaung sho: jho" zam" mung: ASANG wa Hana nho: akyu" mho' dao: re tau: byid' ra".

²⁰Airumung: yao: wa gaung la" li" mung: yauggai zo: dayaug re khau: ra". Hana wa yao: re Samuela ga: mhang" byid' ra". Lajheim: wa yao: re ASANG mae" ngo mho' yu: ru- ga" ru ngad: ra".

²¹Elkana we' yao" yham byu qe zin khao: ngo" xeim: ngaui: byid: nae" we' yao: dao:so: byid' to" ra" gakai: lai xeim: re ngaui" byid: nae" qhid' mae" Shilo khyo ye: nae" ayo, joe" lo: ra".

²²Ngadqere: celhang Hana macao: ye: ngad: ra". Yao: wa yao" yham sang pho" re zoshao nug' kao: we' ngo wa yao: re ASANG: yham khyo jhui" ye: nae". Yao: wa yao" pyad geim" aimae na: jo; li" nae"- ga: ta" ra".

²³Elkana wa- gai va"- nao myid: rure gai: thao" sho' kad' wa,- yao: re nug' kao" pye' sho' yham mae na wa,- ASANG wa ni" dao:so: re jab byang" li" nhao vashao: wo"- ga: tau" ra". Airumung: Hana wa yham mae na mung: zoshao re nug' jhaug' gun caung yang: na: ra".

²⁴Hana wa yao: re nug' bin: kao: thao yao: wa Samuela re- Shilo khyo- sam zin bo: ra" nung: jaung lo: dadau: she cin man" phaui: dabye:- sabyi qang: shoqid thaung dathaung vin yang: Samuela re jhui" ye" lo" ra". Hana wa Samuela ngai shi" au: Shilo mae" ASANG: yham khyo jhui" ye" lo" ra".

²⁵Yao: bam ai: nung: jaung lo: re bin: se' gethao- yao: bam wa ai: zoshao re Eli jhao" jhui" ye" ako".

²⁶Hana wa yao: re- Lau: de, pho" we"- ngore dazab dao: jhau nhao la,- nao ngore xam" i? Ngo wa cetau mae ye; jo, mung: ASANG re akyu" mho' na: rure nao myao: lai: lo: ra" myiqe: ngad:-

²⁷Ngo wa yao: re ce: zoshao mho' mung: yao: wa ngo mho' rure byid' ava".

²⁸Airumung: ngo wa yao: re ASANG re qhaug' byid' na: ru ngad:- yao: kao so' daui: na: myhao"- yao: wa ASANG: qhid' mae" ngad: li" nae"- ga: ta" ra". Ai: thao yao: bam wa aimae ASANG re caung:pa" byid' ako".